«ءبىزدىڭ اباي» ترامۆايى جىل بويى جۇرەدى

وسكەمەندە اباي قۇنانباي ۇلىنىڭ 175 جىلدىعىنا وراي ء«بىزدىڭ اباي» اتتى ەرەكشە ترامۆاي جولعا شىقتى.

ەرەكشەلىگى سول, قوعامدىق كولىكتىڭ سىرتىندا اقىننىڭ سۋرەتى بەدەرلەنسە, ىشىندەگى قابىرعالارىنا ھاكىمنىڭ ناقىل سوزدەرى, ولەڭدەرىنەن ۇزىندىلەر جازىلىپ, ارنايى سورەلەرگە وي الىبىنىڭ شىعارمالارى قويىلعان.

«بۇل ترامۆايدى جۋىقتا كۇردەلى جوندەۋدەن وتكىزدىك. جولعا شىعارار الدىندا وسىنداي وي كەلدى. وسى ارقىلى ءبىز ۇلى ابايدىڭ رۋحاني مۇراسىن ناسيحاتتاعىمىز كەلەدى» دەيدى قالا اكىمى جاقسىلىق ومار.

وزگەشە ترامۆايدىڭ ءىشى-سىرتىن بەزەندىرۋگە ورالحان بوكەي اتىنداعى قالالىق كىتاپحانا ايرىقشا ۇلەس قوسىپتى. ترامۆاي جولعا شىققان العاشقى كۇنى كىتاپحانا قىزمەتكەرلەرى جولاۋشىلارعا اقىننىڭ «قارا سوزدەرى» كىتابىن جانە شىعارمالارىنان ۇزىندىلەر جازىلعان كۇنتىزبەلەردى تارتۋ ەتتى.

«كولىك ىشىندەگى مەرەكەلىك كوڭىل كۇيگە بولەنگەن جۇرتشىلىق ارنايى تەلەەكران ارقىلى اباي ءومىرى جانە مۇراسىمەن تانىستى. ادەبي ترامۆاي ءىشى ابايدىڭ تاعىلىمعا تولى قارا سوزدەرى مەن ولەڭدەرىنەن الىنعان ۇزىندىلەرمەن, تانىمال تۇلعالاردىڭ اقىن تۋرالى وي-پىكىرلەرىمەن ورنەكتەلگەن. سونىمەن بىرگە جۇرتشىلىق اباي كىتاپتارىمەن تانىسىپ, قالاعان شىعارماسىن الىپ وقۋلارىنا دا مۇمكىندىك بار. اباي ءومىرى مەن شىعارماشىلىعىندا ايشىقتى ورىن الاتىن تۇلعالار – ش.قۇدايبەردى ۇلى, ە.ميحاەليس, ا.پۋشكين اتىنداعى ايالدامالاردا قىسقاشا تاريحي دەرەكتەر بەرىلىپ وتىرادى. بۇل №3 ادەبي ترامۆاي جولاۋشىلاردى دىتتەگەن جەرىنە جەتكىزۋمەن بىرگە رۋحاني بىلىمدەرىن بايىتۋعا دا ىقپال ەتەدى دەپ ۇمىتتەنەمىز» دەيدى قالالىق ىشكى ساياسات, مادەنيەت جانە تىلدەردى دامىتۋ ءبولىمىنىڭ باسشىسى قالقامان سارين.

وسكەمەن