«تۋعان اي تۇرسا – ۇركەرگە قارسى قاراپ, قىس تۇسەر – شاقىرايىپ بوران بوراپ» دەگەندەي, ارقادا اقتۇتەك بوران بوراپ تۇر. جىلىك جۇگىرەر قىستىڭ شىلدەسى بەل ورتاسىنان اۋعاندا باستالعان بوران بىرنەشە كۇنگە سوزىلادى دەيدى. ارينە قىس قىستىعىن قىلماسا, جاز جازدىعىن قىلمايدى. تابيعات ۇستەمدىگىن ءبىر تانىتىپ قويعانىنىڭ دا قايىرى بار شىعار...
اۋا رايىنىڭ بۇزىلۋىنا بايلانىستى ەل استاناسىنىڭ ءبىلىم باسقارماسى مەكتەپتەردىڭ بارلىق سىنىپتارى مەن كوللەدجدەردىڭ 1-2 كۋرس ستۋدەنتتەرىنە ساباقتاردى توقتاتقانىن حابارلادى. سونىمەن بىرگە پاۆلودار, قاراعاندى جانە سەمەي قالالارىندا دا مەكتەپ وقۋشىلارىنا ساباق بولعان جوق.
سونداي-اق نۇرسۇلتان نازارباەۆ حالىقارالىق اۋەجايىندا 38 اۆيارەيس كەشىكتىرىلىپ, 11 رەيس توقتاتىلدى. ماسەلەن, اۋە كەمەسىنىڭ باسقا قالالاردان كەش كەلۋى جانە باراتىن اۋەجايداعى ناشار مەتەوجاعدايلار سەبەبىنەن ۇشىپ كەلۋى ءتيىس 22 رەيس كەشىگۋدە. نۇرسۇلتان نازارباەۆ حالىقارالىق اۋەجايى ءباسپاسوز قىزمەتىنىڭ وكىلى جەڭىس احمەتجانوۆتىڭ ايتۋىنشا, جەلدىڭ قاتتى ەكپىنىنە بايلانىستى ۇشۋ قاۋىپسىزدىگى ماقساتىندا اۋە كەمەلەرىن مۇز قاتۋعا قارسى سۇيىقتىقپەن وڭدەۋگە جول بەرىلمەيدى.
اقتۇتەك بورانعا وراي نۇر-سۇلتان قالاسى اكىمدىگىندە وتكەن وتىرىستا شاھار باسشىسى التاي كولگىنوۆ توتەنشە جاعدايلار جانە پوليتسيا دەپارتامەنتتەرى مەن بارلىق كوممۋنالدىق قىزمەتتەردىڭ كۇشەيتىلگەن جۇمىس كەستەسىنە كوشكەنىن مالىمدەدى. قالا اكىمى iKOMEK 109 بىرىڭعاي بايلانىس ورتالىعىنا كوپتەگەن ءوتىنىش تۇسۋىنە بايلانىستى, قالانىڭ بارلىق اۋدانىنىڭ اكىمدەرى مەن باسقارمالارىنىڭ باسشىلارى ءبىرىنشى كەزەكتە اتالعان ماسەلەلەردى شەشۋگە جۇمىلدىرىلعانىن جەتكىزدى. ونىڭ ىشىندە كوشەلەر مەن اۋلالارداعى, الەۋمەتتىك نىساندارداعى قاردى تازالاۋعا باسىمدىق بەرىلدى. وعان پيك جانە جەكە كومپانيالاردىڭ تەحنيكالارىن تارتۋ جۇكتەلدى. «ەڭ باستىسى, قالا تۇرعىندارىنىڭ قاۋىپسىزدىگى» دەگەن ا.كولگىنوۆ ەلوردالىقتاردىڭ تابيعات رايىنا توزىمدىلىك تانىتۋىن سۇرادى. ال قالالىق توتەنشە جاعدايلار دەپارتامەنتىنىڭ باستىعى باۋىرجان سىزدىقوۆ قاڭتاردىڭ قارلى بورانىنىڭ توقتاماۋىنا بايلانىستى استانالىقتاردىڭ جۇمىس كۇنىن قىسقارتۋعا ۇسىنىس جاسادى. «حالىقتىڭ قالادان تىسقارى شىقپاۋىنا, باسشىلاردىڭ جۇمىس كۇنىن قىسقارتۋىنا, قۇرىلىس الاڭدارى جەتەكشىلەرىنىڭ بيىكتىكتەگى جۇمىستاردى توقتاتۋىنا, قاتتى قاجەتتىلىك بولماسا, قالا ىشىندەگى اۆتوكولىكتەر مەن ازاماتتاردىڭ قوزعالىسىن شەكتەۋگە كەڭەس بەرەمىز», دەدى اتالعان وتىرىستا ب.سىزدىقوۆ. ونىڭ ايتۋىنشا, تاڭعى ساعات 8.00-دە دەپارتامەنتتە جانە ءتورت اۋداندا اپاتتىق-قۇتقارۋ جانە اياقسىز قالدىرمايتىن جۇمىستاردى ۇيلەستىرۋگە ارنالعان جەدەل شتاب قۇرىلدى. دەپارتامەنتتىڭ كەزەكشى قىزمەتى كۇشەيتىلگەن قىزمەت كورسەتۋگە كوشتى, سونداي-اق اقمولا وبلىسىنىڭ توتەنشە جاعدايلار دەپارتامەنتىمەن ءوزارا ءىس-ارەكەت جوسپارى ەنگىزىلدى. ساعات تاڭعى 8.00-دەن كەشكى 18.00-گە دەيىن تجد قۇتقارۋشىلارىنىڭ كۇشىمەن اۆتوجولداردا جەل ۇرلەگەن قار قۇرساۋىندا قالعان 61 كولىكتەن 78 ادام قۇتقارىلىپ, قاردان تازالانعان اۋماقتارعا 39 جەڭىل كولىك, 1 اۆتوبۋس, 1 جۇك كولىگى, 1 قۇرىلىس تەحنيكاسى جەتكىزىلدى. قۇتقارۋ جۇمىستارى جالعاسىپ جاتىر.
«قازگيدرومەت» رمك ءباسپاسوز قىزمەتىنىڭ حابارلاۋىنشا, 23-25 قاڭتار ارالىعىندا ەلىمىزدىڭ كوپتەگەن وڭىرىندە قار جاۋىپ, بوران مەن جەل سوعادى.
«الداعى ءۇش تاۋلىكتە قازاقستاننىڭ اۋا رايىندا ايتارلىقتاي وزگەرىس بولمايدى. رەسپۋبليكا اۋماعى سولتۇستىكتەگى سكانديناۆيا مەن رەسەي ارقىلى كەلگەن اتلانتيكالىق تسيكلونعا بايلانىستى اتموسفەرالىق ىقپالدىڭ قۇرساۋىندا بولادى. سوندىقتان بىرقاتار وبلىستا قار جاۋىپ, جەل, باتىستان وتە قاتتى داۋىل تۇرادى. تەرىسكەي وڭىرلەردە جەلدىڭ ۇيىتقۋى سەكۋندىنا 30 مەترگە دەيىن سوعادى. سونىمەن قاتار تۇمان مەن كوكتايعاق بولادى», دەيدى حابارلامادا.
«جەلدىڭ سوققانىنا 28 ساعاتتان استى. قازىر ءسال باسىلدى. بىراق تاۋلىكتەن اسا سوزىلۋى مۇمكىن. ءبىز داۋىلدى دەر ۋاقىتىندا ەسكەرتەمىز. جاۋىن-شاشىن كولەمى – تاۋلىگىنە 37 سانتيمەتردەن استى. بۇل جاۋىن-شاشىن كولەمىنىڭ شامادان تىس ەكەنىن كورسەتەدى. ياعني, بيىل ەكى ايدىڭ نورماسىنا تاتيتىن قار جاۋدى», دەيدى «قازگيدرومەت» باسشىسى مەرەكە ابدراحمانوۆ.
سونىمەن بىرگە ەلوردا تۇرعىندارى ارەكەتسىز وتىرماۋعا, قالانى قاردان تازالاۋعا قولعابىس ەتۋگە بەل شەشە كىرىستى. ماسەلەن, استانالىق تەاتر قىزمەتكەرلەرى بارشا قاۋىمدى #bizbirgemiz چەلەندجىنە قاتىسۋعا شاقىردى. ولار الەۋمەتتىك جاعىنان از قامتىلعان جانە ۇيىندە قامقورشىسى جوق وتباسىلار مەن ازاماتتاردىڭ اۋلاسىن ۇرلەپ تاستاعان ءۇيىندى قاردى تازالاۋعا كومەكتەسۋدە.