قاراعاندى قالاسىندا وقيتىن باياناۋىلدىق ستۋدەنت ايىمبەك امانتايعا «كوحلەار» كومپانياسىنىڭ گرەم كلارك اتىنداعى حالىقارالىق ستيپەندياسى تاعايىندالدى. ستيپەنديا كومپانيانىڭ قۇرىلعى يمپلانتىن پايدالانۋشىلارعا ارنالعان.
قازىرگى كەزدە عىلىم مەن تەحنيكانىڭ دامۋى – ەستۋ قابىلەتى زاقىمدالعان بالالاردى, جاستاردى وڭالتۋ جولىندا بىرقاتار جاڭاشىلدىقتى اشۋعا مۇمكىندىك بەرۋدە.
اۋستريالىق عالىم گرەم كلارك جاساعان يمپلانت قۇرىلعىسى ەستۋ قابىلەتىن قالپىنا كەلتىرۋگە ارنالعان. كوحلەارلى يمپلانتاتسيا – قۇلاعى ەستىمەيتىن بالالارعا ءسوزدى ەستىپ جانە تۇسىنۋىنە مۇمكىندىك بەرەتىن وڭالتۋدىڭ ءتيىمدى ادىستەرىنىڭ ءبىرى. كوحلەار كومپانياسى بەكىتكەن ستيپەنديا ەستۋ قابىلەتى بۇزىلعان جاستارعا جوعارى ءبىلىم الىپ, ومىردە ءوز جولىن تابۋعا كومەكتەسەدى.
ال ستيپەنديانى تاعايىنداۋ بايقاۋىنا الەمنىڭ كەز كەلگەن ەلىندە تۇراتىن «كوحلەار نۋكلەۋس» ماركالى يمپلانتىن پايدالانۋشىلار قاتىسا الادى.
– مەن دە بايقاۋ تۋرالى ينتەرنەتتەن وقىپ ءبىلدىم. اكەممەن اقىلداسىپ, كومپانيانىڭ ەلىمىزدەگى وكىلىنە قوڭىراۋ شالدىق. ساۋالدامانى تولتىرىپ, اعىلشىن تىلىندە ەسسە جازىپ, ەلەكتروندى پوشتامەن اۋسترياعا جىبەردىك, – دەيدى ايىمبەك.
ءسويتىپ بىلتىر قازان ايىندا ايىمبەك شىعىس ەۋروپا توبىندا جەڭىمپاز اتانادى. الماتىداعى كومپانيا وكىلدىگىندە سەرتيفيكات بەرىلەدى.
امانتاي باياناۋىلداعى مەكتەپتى بىتىرگەننەن كەيىن قاراعاندى ەكونوميكا ۋنيۆەرسيتەتىنە وقۋعا تۇسكەن. ەستۋ قابىلەتىنىڭ بۇزىلۋى بالالىق شاقتاعى اۋرۋدان كەيىن پايدا بولىپتى. كۆوتا بويىنشا الماتىداعى رەسپۋبليكالىق بالالار ەمحاناسىندا وتا ارقىلى اتالعان كومپانيانىڭ اسپابىن ورناتادى. ال كومپانيانىڭ ستيپەندياسى قازىرگى وقۋى مەن ماگيستراتۋراداعى وقۋىن قارجىلاندىرادى. ستۋدەنت ايىمبەك اعىلشىن, تۇرىك تىلدەرىن مەڭگەرگەن. بوكس, باسكەتبول, دجيۋ-دجيتسۋ سەكىلدى سپورت تۇرلەرىمەن شۇعىلدانادى. – تابيعاتى سۇلۋ باياناۋىلدا تۋىپ-ءوستىم. ەكولوگ ماماندىعىن تاڭدادىم. حالىقارالىق ەكولوگيالىق جوبالاردى ازىرلەۋگە قاتىسىپ, قورشاعان ورتانى قورعاۋعا ۇلەسىمدى قوسقىم كەلەدى. الداعى ۋاقىتتا «بولاشاق» باعدارلاماسى بويىنشا شەتەلدە وقىسام دەگەن ءۇمىتىم بار, – دەيدى ستيپەنديانت.
پاۆلودار وبلىسى