سوڭعى كەزدە باتىس قازاقستان وبلىسىندا شەتەلدە, سونىڭ ىشىندە رەسەي فەدەراتسياسى مەن ارمەنيادا تىركەلگەن كولىك تىم كوبەيىپ كەتكەنى راس. ەۋرازيالىق ەكونوميكالىق وداعى ەلدەرىنەن اكەلىنگەن كولىكتەردى تىركەۋ ءتارتىبى قاتاڭ قاداعالاناتىنى تۋرالى ەسكەرتۋدەن كەيىن «بوتەن ءنومىرلى» كولىك يەلەرىنىڭ كوڭىلىنە الاڭ كىردى.
بۇگىندە قازاقستاندا رەسمي ستاتيستيكاعا سايكەس, شەتەلدەردەن اكەلىنگەن 170 مىڭنان استام اۆتوكولىك تىركەلگەن ەكەن.
باتىس قازاقستان وبلىستىق پوليتسيا دەپارتامەنتى ءباسپاسوز قىزمەتىنىڭ دەرەگىنشە, 2019 جىلدىڭ 12 ايىندا بقو اۋماعىندا شەتەلدىك كولىك قۇرالدارىنىڭ قاتىسۋىمەن 1335 جول-كولىك وقيعاسى تىركەلگەن. ونىڭ 1015-ءى – رەسەيدەن كەلگەن كولىكتەر, 320-سى – ارمەنيادان اكەلىنگەن كولىكتەرگە تيەسىلى. سونىڭ ىشىندە 147 جۇرگىزۋشى وقيعا ورنىنان قاشىپ كەتكەن. وكىنىشتىسى, وسى وقيعالاردان ءۇش ادام قازا تاپتى.
باتىس قازاقستان وبلىسىنىڭ پوليتسيا دەپارتامەنتى «جولدا قابىلداۋ» شاراسىن وتكىزىپ, كولىك يەلەرىنىڭ بارلىق ساۋالىنا جاۋاپ بەرۋگە كىرىستى.
بقو پوليتسيا لەپارتامەنتى اكىمشىلىك پوليتسيا باسقارماسىنىڭ باستىعى جانبولات جانشين ەۋرازيالىق ەكونوميكالىق وداق اۋماعىندا تىركەلگەن كولىك قۇرالدارى قازاقستان اۋماعىنا ءبىر جىلعا دەيىنگى مەرزىمگە اكەلىنۋى مۇمكىن دەيدى.
– بۇل رەتتە قىرعىز رەسپۋبليكاسىندا جانە ارمەنيا رەسپۋبليكاسىندا تىركەلگەن اۆتوكولىكتى سول ەلدەردىڭ اۋماعىندا تۇراقتى تۇراتىن ازاماتتار عانا قازاقستانعا اكەلە الادى. ال قازاقستان رەسپۋبليكاسىنىڭ ازاماتتارىنا اتالعان كولىك قۇرالدارىن اكەلۋگە جانە پايدالانۋعا, سونداي-اق ولاردى يەلىكتەن شىعارۋعا, باسقا ادامدارعا پايدالانۋعا بەرۋگە كەدەندىك رەسىمدەۋدەن وتكەن جانە تولەنگەن جاعدايدا عانا مۇمكىن بولادى. اۆتوكولىكتى شەتەلدىك ەسەپكە الا وتىرىپ ساتىپ العان يەلەرى كولىك قۇرالدارىن ۋاكىلەتتى ورگاندا ساتىپ العاننان كەيىن ون جۇمىس كۇنى ىشىندە تىركەۋگە مىندەتتى. ول ءۇشىن ارنايى حقكو-عا جۇگىنۋ قاجەت. تىركەۋ سوماسى كولىك شىعارىلعان جىلعا جانە قوزعالتقىش كولەمىنە بايلانىستى, - دەدى جانبولات جاسقايرات ۇلى.
ايتا كەتۋ كەرەك, شەتەلدىك كولىكتەردى تىركەۋ تالاپتارىن ورىنداماعان ادامدار قر اقبتك-ءنىڭ «كولىك قۇرالدارىن پايدالانۋ ەرەجەلەرىن بۇزۋ» بابى (590 باپ, 2-بولىك) بويىنشا اكىمشىلىك جاۋاپكەرشىلىككە تارتىلادى. ولارعا 10 اەك (26 510 تەڭگە) كولەمىندە ايىپپۇل كەسىلىپ, كولىك ارنايى ۋاقىتشا ساقتاۋ الاڭىنا قويىلادى.
دەگەنمەن, كولىك يەلەرىنىڭ اراسىندا بۇل تارتىپكە نارازىلىق كورسەتىپ جاتقان جاندار كوپ.
- ەگەر مۇنداي تالاپ بۇرىننان بولسا, نەگە سول 2014-2015 جىلدان بەرى جۇزەگە اسىرىلمادى؟ قازاقستاندا شەتەلدىك كولىك مۇنشا كوبەيمەس ەدى عوي. ەندى بۇل كولىكتى ەسەپكە قويۋ قۇنى وتە قىمباتقا, سول كولىكتىڭ ءوز باعاسىنان بىرنەشە ەسە ارتىق باعاعا شىعىپ تۇر. ءبىزدىڭ تالابىمىز – بۇل كولىكتەردى كەدەندىك راسىمدەۋ باعاسىن تومەندەتۋ كەرەك نەمەسە بۇرىنعىشا جۇرە بەرۋگە رۇقسات ەتىلۋى ءتيىس, - دەيدى شەتەلدە تىركەلگەن كولىك يەلەرىنىڭ ءبىرى ەربولات مۇساعاليەۆ.
بوتەن ءنومىرلى كولىك يەلەرى ورال قالالىق اكىمدىگىنە وسى ماسەلەگە وراي بەيبىت ميتينگ وتكىزۋ جونىندە ءوتىنىش بەرگەنىمەن, رۇقسات بەرىلگەن جوق. باتىس قازاقستان وبلىسىنىڭ پوليتسيا دەپارتامەنتى جوعارىدا ايتىلعانداي, اشىق ەسىك شارالارىن وتكىزىپ, تۇرعىنداردىڭ ۇسىنىستارىن, ساۋالدارىن تىڭداپ, ولاردى شەشۋ ماسەلەلەرىن بارىنشا قاراستىرىپ جاتىر. قاڭتاردىڭ 17-18 كۇندەرى پوليتسيا قىزمەتىنە 268 ادام ءتۇرلى ساۋالمەن جۇگىنگەن. ءبىر ءتاۋىرى, وبلىستىڭ ءار اۋدانىندا ارنايى شتاب قۇرىلىپ, تۇرعىنداردىڭ ساۋالدارىنا جاۋاپ بەرىلۋدە. كوبىنە مۇنداي اكتسيا ادام كوپ شوعىرلاناتىن جەردە وتكىزىلەدى. بۇل اكتسيا ازاماتتار ءۇشىن وتە ىڭعايلى, ءتيىمدى بولىپ تۇر.
– ەگەر ءبىزدىڭ ازاماتتارىمىز باسقا مەملەكەتتەردە اۆتوكولىك ساتىپ السا جانە وسى مەملەكەتتىڭ ۋاكىلەتتى ورگانىندا تىركەلسە, وندا مۇنداي كولىك قازاقستاندا ساتىپ العاننان كەيىن ون جۇمىس كۇنى ىشىندە بارلىق الىمدار مەن باج سالىعىن تولەي وتىرىپ تىركەلۋى ءتيىس. بۇل تالاپتاردىڭ بۇزىلۋى ەل جولدارىنداعى كولىك ءتارتىبىنىڭ جاي-كۇيىنە تەرىس اسەر ەتەدى, - دەيدى بقو پد اكىمشىلىك پوليتسيا باسقارماسىنىڭ باستىعى.
ايتا كەتەيىك, «جولدا قابىلداۋ» اكتسياسىنىڭ ءوتۋ بارىسى «Policebqo» ينستاگرام پاراقشاسى ارقىلى تىكەلەي ەفيردە ءجۇرىپ, ازاماتتاردان كەلىپ تۇسكەن سۇراقتارعا دا سول ساتتە جاۋاپ قايتارىلدى. ەكى كۇن تۇرعىنداردان 268 ءوتىنىش ءتۇسىپ, ولاردىڭ بارلىعى سول ساتتە قارالىپ, شەشىمىن تاپقان.
باتىس قازاقستان