ماڭعىستاۋ وبلىسىندا وتكەن جىلدىڭ ءساۋىر ايىندا ىسكە قوسىلعان «بيزنەسكە ارنالعان ۇكىمەت» جۇيەسى كاسىپكەرلەر جۇمىسىن شيراتا ءتۇستى. وسى ۋاقىت ارالىعىندا 5700-دەي ىسكەر جاڭا قىزمەت ءتۇرىن پايدالانعان. كاسىپ اشۋ, ونى ءساتتى جۇرگىزۋ, كەدەرگىلەردى بولدىرماۋ ماقساتىندا ء«بىر تەرەزە» قاعيداتى بويىنشا ساپالى قىزمەت كورسەتىلىپ وتىر.
«بيزنەسكە ارنالعان ۇكىمەت» جوباسى اياسىندا جۇمىس ىستەپ تۇرعان: قارجىلاندىرۋ; وتكىزۋ; تسيفرلى قىزمەت كورسەتۋ; قۇقىقتىق سۇيەمەلدەۋ جانە وقىتۋ دەپ اتالاتىن 5 ايماق بار. بۇدان باسقا مەملەكەتتىك قىزمەتتەردى دە وسى ورتالىقتان الۋعا بولادى. وندا ساندىق جۇيە ارقىلى ءبىر كىلتتىڭ كومەگىمەن بيزنەسكە قاجەتتى ورتالىقتاندىرىلعان قىزمەتتىڭ بارلىعىن الادى.
مارات بەگىموۆ اقتاۋ قالاسىندا شاشتاراز كاسىبىن قولعا الدى. ءبىر جىل بۇرىن «باستاۋ بيزنەس» جوباسىمەن ءبىلىم الىپ, جەكە ءىسىن وركەندەتىپ وتىر. كاسىپكەرلەر پالاتاسىنا ءوزىن تولعاندىرعان سۇرپاقتارمەن ءجيى باس سۇعادى. مامانداردان ۋىزشا كەڭەس العان سوڭ, ونلاين قىزمەت تۇرىنە جۇگىنۋدە.
«مەن مۇندا ءجيى كەلەمىن. بىلىكتى ماماندار كەڭەستەرىن بەرەدى. بۇل جولى سالىق تولەۋ, ەسەپ تاپسىرۋ بويىنشا حابارلاسىپ وتىرمىن. زاڭ تۇرعىسىنان دا كەڭەس الدىم. تەگىن قىزمەت ءتۇرىن لەزدە الىپ, كابينەت ارالاپ, سابىلماي جۇمىسىمدى ءبىتىرىپ كەتىپ بارا جاتىرمىن. ونلاين قىزمەت كورسەتۋدىڭ ۇتىمدى تۇسى وسى» دەيدى كاسىپكەر.
بارلىق قىزمەتتى ءبىر ورتالىقتان الۋعا قولايلى جۇيەنى ىسكەرلەر وزىنە ءوزى قىزمەت كورسەتۋ ايماعىندا قولدانا الادى نەمەسە ۇيدەن شىقپاي-اق ءتيىستى جۇمىستى جۇزەگە اسىرۋىنا مۇمكىندىك مول.
«كاسىپكەرلەر بيزنەسىن باستاپ كەتكەن سوڭ, سايت اشۋ, تاۋارىن عالامتور كومەگىمەن ساتۋ سىندى ادىستەردى قولدانعىسى كەلەدى. ولار ءبىزدىڭ تسيفرلى قىزمەتتەرىمىزدى پايدالانۋىنا بولادى. جاڭا جىلدان باستاپ بۇرىن-سوڭ بولماعان تىڭ جوبانى قولعا الامىز. وتاندىق تاۋار ءوندىرۋشى ءوز ءونىمىن قاي نارىققا شىعارا الادى, قالادا قانداي ساۋدا ورتالىقتارىندا بوس ورىندار بار, كىمدەردەن سۇرانىس كوپ ەكەنى تۋرالى اقپاراتقا جىلدام قول جەتكىزە الادى. وسى تۇستا وڭىرلىك كاسىپكەرلەر پالاتاسى ساۋدا ورتالىقتارىمەن ارادا جاسالعان مەموراندۋم ارقىلى ءتيىستى سۇيەمەلدەۋ قىزمەتىن كورسەتەدى. بارلىق كەڭەس تەگىن» دەپ وي قورىتتى مو كاسىپكەرلەر پالاتاسىنىڭ قارجىلاي ەمەس قىزمەت كورسەتۋ ءبولىمىنىڭ باسشىسى اققۋ ايتجانوۆا.
2020 جىلدان باستاپ «بيزنەسكە ارنالعان ۇكىمەت» جوباسى اياسىندا كاسىپكەرلەرگە تاعى دا تىڭ جوبالار قوسىلاتىن بولادى. مۇنىڭ ءبارى ىسكەرلەردىڭ ۋاقىتىن ۇنەمدەۋگە, قاعازباستىلىقتان ارىلۋعا, قاشىقتىقتا وتىرىپ ورتالىققا جۇگىرمەي بارلىق قىزمەتتى الۋعا بارىنشا جاعداي جاساۋ ماقساتىن كوزدەيدى.