مەملەكەت باسشىسى قاسىم-جومارت توقاەۆ اقورداداعى پرەزيدەنتتىك جاستار كادر رەزەرۆىنە وتكەن ازاماتتارمەن كەزدەسۋ بارىسىندا جوبا جەڭىمپازدارىنا بەرىلگەن مۇمكىندىكتى اتاپ ءوتىپ, ولاردان ەلدى دامىتۋعا تىڭ سەرپىن بەرەتىن جاڭا يدەيا مەن ناتيجەلى جۇمىس كۇتەتىنىن جەتكىزدى.
«ارقايسىڭىزدان ەلدى دامىتۋعا تىڭ سەرپىن بەرەتىن جاڭا يدەيا مەن ناتيجەلى جۇمىس كۇتەمىز. الداعى ۋاقىتتا سىزدەردى مەملەكەتتىك ورگاندار مەن ۇلتتىق كومپانيالارعا جاۋاپتى قىزمەتكە جىبەرەمىز. قازىردىڭ وزىندە رەزەرۆكە وتكەن ەلۋ بەس ازامات جاڭا قىزمەتكە بەكىتىلدى», دەدى ەل پرەزيدەنتى ءوز سوزىندە.
سونداي-اق قاسىم-جومارت توقاەۆ جوبا مىندەتى دارىندى جاستارعا مۇمكىندىك بەرۋ ەكەندىگىن ەسكە سالدى.
ء«بىزدىڭ ماقساتىمىز سىزدەردى لاۋازىمدى قىزمەتكە تاعايىنداۋ عانا دەپ ويلاماڭىزدار. بۇل – ەلدى وركەندەتۋگە بەل بۋعان, سول ءۇشىن بار كۇش-جىگەرىن جۇمسايتىن ازاماتتارعا ارنالعان جوبا. باستى مىندەت – تالانتتى جاستاردىڭ قازاقستاندى جاڭا بەلەستەرگە كوتەرۋىنە مۇمكىندىك بەرۋ» دەپ اتاپ ءوتتى مەملەكەت باسشىسى.
ودان بولەك پرەزيدەنت كادرلىق رەزەرۆكە وتكەن ازاماتتارعا سەنىم ارتاتىنىن ايتتى.
«قازاقستاننىڭ بولاشاعى – سانالى ءارى تالاپتى ۇرپاقتىڭ قولىندا. سوندىقتان كادرلىق رەزەرۆكە وتكەن ازاماتتار وزدەرىنە جۇكتەلگەن جۇمىستى ابىرويمەن اتقارادى دەپ سەنەمىن. ءححى عاسىرداعى قازاقستاندى بيىك بەلەستەرگە سىزدەر سياقتى ءبىلىمى وزىق, ويى ۇشقىر جاستار باستاۋى كەرەك» دەدى ق.توقاەۆ.