ءبىرجان شايمەردەنوۆ باسقاراتىن سولتۇستىك قازاقستان وبلىسىنىڭ اققايىڭ اۋدانىنداعى «دايىندىك اگرو» سەرىكتەستىگى شارۋاسى شالقىعان شارۋاشىلىقتاردىڭ ءبىرى.
اققايىڭ اۋدانىنداعى دايىندىق اۋىلى ءبىر كەزدە بارلىق اۋىلدار سەكىلدى وتكەن عاسىردىڭ اياعىنداعى ەكونوميكالىق قۇلدىراۋدى باسىنان كەشىپ, تاراۋعا اينالىپ قالعان. سول كەزدە قولىنان ءىس كەلەتىن ءبىرجان شايمەردەنوۆ قالاداعى ءۇش بولمەلى ءۇيىن ساتىپ, تۋعان اۋىلىن كوتەرۋگە كەلگەن ەدى. سودان بەرى تىنىم تاپپاي ەڭبەكتەنگەندىگىنىڭ ارقاسىندا قازىر وبلىستاعى وزىق شارۋاشىلىقتاردىڭ بىرىنە اينالدى. ونىڭ اۋىل تۇرعىندارىن الەۋمەتتىك تۇرعىدان قولداۋ جونىندە جاساعان ىستەرىن ساناپ شىعۋدىڭ ءوزى ۇزاق اڭگىمەگە جۇك بولار ەدى.
قازىر ونىڭ فەرماسىندا 600 باس سيممەنتال تۇقىمدى ءسۇتتى سيىرلارى بار. ولاردىڭ ارقايسىسى تاۋلىگىنە 17-18 ليتردەن ءسۇت بەرەدى ەكەن. «دايىندىق اگرو» اسىل تۇقىمدى مالدى اۋستريادان ساتىپ الىپتى. قازىر سيىردىڭ سۋالاتىن مەزگىلى, سوعان قاراماي تاۋلىگىنە بەس تونناداي ءسۇت الادى. ال ءسۇت فەرماسىن سەرىكتەستىك بىلتىر ءتورت ايدىڭ ىشىندە سالىپ بىتىرگەن. وعان جۇمسالعان 1,2 ملرد تەڭگە سەرىكتەستىكتىڭ جەكە قاراجاتى.
– اسىل تۇقىمدى ءار سيىردى ساتىپ الۋعا مەملەكەتتەن 137 مىڭ, ال جەم-ازىق الۋعا 120 مىڭ تەڭگە سۋبسيديا الدىم, – دەيدى ءبىرجان شايمەردەنوۆ.
جاڭا فەرمانىڭ جۇمىسىمەن وبلىس باسشىسى قۇمار اقساقالوۆ تانىستى. زاماناۋي فەرما سوڭعى ۇلگىدەگى تەحنيكامەن جابدىقتالعان. قازىر وندا 28 تۇراقتى جۇمىس ورنى اشىلدى. جالپى ايتقاندا وسى اۋىلدىڭ تۇرعىندارى جىل بويى جۇمىسپەن قامتىلعان.
ال وبلىستا وسىنداي 3 زاماناۋي ءسۇت كەشەنى ىسكە قوسىلادى. الدىڭعى جىلى تورتەۋى اشىلعان. 2020 جىلى تاعى 10 كەشەننىڭ قۇرىلىسى باستالماق. جاڭا فەرمالار ءسۇت ءوندىرىسىن جىلىنا 20 مىڭ تونناعا كوبەيتۋگە مۇمكىندىك بەرەدى.
«مال شارۋاشىلىعى – وتە تابىستى بيزنەس, اسىرەسە ءسۇت ءوندىرىسى. وسى كاسىپپەن اينالىسىپ وتىرعاندار پايداسىن كورىپ وتىر. قازىر ءبىز اتالعان فەرمالاردىڭ سانىن كوبەيتۋ شارۋالارى بويىنشا ءتيىستى جۇمىستاردى جۇرگىزىپ جاتىرمىز», دەدى قۇمار اقساقالوۆ.
سولتۇستىك قازاقستان وبلىسى