2019-2020 جىلعى وقۋ جىلىندا الماتى وبلىسىنداعى ءبىلىم بەرۋ مەكەمەلەرىنىڭ 1-سىنىبىنا 50 مىڭعا جۋىق وقۋشى قابىلدانعان بولاتىن. بالا سانىنىڭ كۇرت ارتۋى مەكتەپتەردەگى وقۋ سىنىپتارىنىڭ جەتىسپەۋىنە اكەلىپ, وقۋشىلار 3 اۋىسىمدا ءبىلىم الۋعا ءماجبۇر ەكەن.
قازىر وبلىستاعى 38 مەكتەپتە وقۋشىلار 3 اۋىسىمدا وقىپ جاتىر. ەسەپ بويىنشا 3 اۋىسىمدى مەكتەپتەردى جويۋ ءۇشىن بىردەن 21 وقۋ وشاعىن سالۋ قاجەت. ول ءۇشىن 52 ملرد تەڭگە جۇمسالادى. الايدا قۇرىلىس قارقىن العان كۇننىڭ وزىندە مۇنشا مەكتەپتى پايدالانۋعا بەرۋگە 2021 جىلى عانا قول جەتۋى مۇمكىن. ال بيىل 6 مەكتەپتىڭ قۇرىلىسى جۇرگىزىلەدى. بۇل تاعى 3000 وقۋشىنىڭ ەركىن وتىرىپ ءبىلىم الۋىنا قولايلى جاعداي تۋعىزباق.
جالپى, بيىل وبلىس اۋماعىنداعى مەكتەپ-ينتەرناتتاردى كۇردەلى جوندەۋ مەن ءبىلىم مەكەمەلەرىنىڭ ماتەريالدىق-تەحنيكالىق بازاسىن نىعايتۋعا 300 ملن تەڭگە قارجى بولىنگەن. بۇل وبلىس مەكتەپتەرىندەگى بىرقاتار ماسەلەنى شەشۋگە مۇمكىندىك بەرمەك.
اسىرەسە, ايماق مەكتەپتەرىندە ءتارتىپ پەن قاۋىپسىزدىكتى ساقتاۋ بويىنشا سىن كوپ. قازىر ءبىلىم بەرۋ نىساندارىندا 15 860 بەينەباقىلاۋ قۇرىلعىسى ىسكە قوسىلعان ەكەن. الايدا, كامەرالاردىڭ دەنى ەسكىرگەن. كوپتەگەن قۇرىلعى ءبىر باعىتتى عانا بەينەگە تۇسىرەدى. ولاردىڭ جازبالارىن قاراپ, سۇرىپتاپ وتىراتىن ارنايى مامان تاعى جوق. سول سەبەپتەن دە مەكتەپ ىشىندەگى بالا قۇقىنىڭ بۇزىلۋى نازاردان تىس قالىپ جاتادى.
سونداي-اق, وبلىستاعى ءۇش جۇزدەن استام مەكتەپتىڭ دارەتحاناسى عيمارات ىشىندە ەمەس, اۋلادا ورنالاسقاندىعى دا اتا-انالاردىڭ الاڭداۋىنا نەگىز بولىپ وتىر.
الماتى وبلىسى