ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ پاۆلودار وبلىسىنا جۇمىس ساپارى بارىسىندا ءوڭىر تۇرعىندارىنا اتاۋلى الەۋمەتتىك كومەك (بۇدان ءارى – ااك) تاعايىنداۋدىڭ جاڭا تەتىكتەرىن, «ەڭبەك» مەملەكەتتىك باعدارلاماسىنداعى جاڭاشىلدىقتاردى ءتۇسىندىردى, تابىسى از وتباسىلاردىڭ بالالارىنا ارنالعان كەپىلدىك بەرىلگەن الەۋمەتتىك توپتامانىڭ تۇساۋكەسەرىن وتكىزدى جانە ااك كورسەتۋ ماسەلەلەرى بويىنشا ءوڭىردىڭ قالالارى مەن اۋداندارى اكىمدىكتەرىنىڭ قىزمەتكەرلەرىمەن سەلەكتورلىق كەڭەس وتكىزدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.
پاۆلودار وبلىسىنا كەلگەننەن كەيىن ەرلان اۋكەنوۆ الدىمەن اۋداننىڭ جۇمىسپەن قامتۋ جانە الەۋمەتتىك باعدارلامالار ءبولىمى مەن اۋداندىق حالىقتى جۇمىسپەن قامتۋ ورتالىعىندا بولدى, وندا ااك تاعايىنداۋ ءۇشىن قۇجاتتارىن قابىلداۋ, ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسىن ىسكە اسىرۋ, سونداي-اق ارداگەرلەرمەن جانە مۇگەدەكتەرمەن جۇرگىزىلىپ جاتقان جۇمىستارمەن تانىستى.
جوعارىدا اتالعان نىسانداردى ارالاۋ بارىسىندا ۆيتسە-مينيستر اتاۋلى الەۋمەتتىك كومەك الۋعا ءوتىنىش بىلدىرگەن ازاماتتارعا جاڭا تاسىلدەرگە سايكەس قالاي كورسەتىلەتىنىن ءتۇسىندىردى.
ء«بىز بۇرىن قولدانىستا بولعان شەكتى ولشەمدى ساقتادىق, وعان سايكەس الەۋمەتتىك كومەك تاعايىنداۋ ءۇشىن وتباسىنىڭ ءاربىر مۇشەسىنە جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىنىڭ 70% - نان كەم بولۋى ءتيىس. وتباسىنىڭ بارلىق مۇشەلەرى ءۇشىن ااك مولشەرى جان باسىنا شاققانداعى تابىس پەن كەدەيلىك شەگىنىڭ اراسىنداعى ايىرماشىلىق رەتىندە ايقىندالاتىن بولادى. ااك اشىقتىعىن قامتاماسىز ەتۋ ءۇشىن توقسان سايىن تاعايىندالادى, ال وتباسىنىڭ ماتەريالدىق جاعدايىنا تەكسەرۋ جۇرگىزۋ مەرزىمى 3 كۇننەن 7 كۇنگە دەيىن ۇلعايتىلادى, بۇل پروتسەستە ۋچاسكەلىك كوميسسيالاردىڭ ءرولى كۇشەيتىلەدى» دەدى اۋكەنوۆ.
ول سونداي-اق اۋىل تۇرعىندارىنا ااك الاتىن تابىسى از وتباسىلاردىڭ بالالارىنا ۇسىنىلاتىن كەپىلدىك بەرىلگەن الەۋمەتتىك توپتامانى (بۇدان ءارى-كبات) تانىستىردى. ۆيتسە-مينيستر كبات-عا كىرەتىن تۇرمىستىق حيميا ونىمدەرى مەن تاۋارلارىنىڭ سانى مەن كولەمىن كورنەكى تۇردە كورسەتىپ, ونىڭ قۇرامى دەنساۋلىق ساقتاۋ مينيسترلىگىنىڭ ۇسىنىسى بويىنشا قالىپتاستىرىلعانىن, ول بالالاردىڭ جاس ەرەكشەلىكتەرىنە بايلانىستى: 1-دەن 3 جاسقا دەيىن جانە 3-تەن 6 جاسقا دەيىن ەرەكشەلەنەتىنىن اتاپ ءوتتى.
6 جاستان 18 جاسقا دەيىنگى بالالارعا مەكتەپتەردە ىستىق تاماقپەن, وقۋ قۇرالدارىمەن جانە مەكتەپ كيىمىمەن قامتاماسىز ەتىلەدى, سونداي-اق ولارعا مەكتەپكە دەيىنگى جول ءجۇرۋ شىعىندارى وتەلەدى. مەديتسينالىق, ونىڭ ىشىندە ستوماتولوگيالىق كومەك 18 جاسقا دەيىنگى بالالارعا تەگىن مەديتسينالىق كومەكتىڭ كەپىلدىك بەرىلگەن كولەمى جانە مىندەتتى الەۋمەتتىك مەديتسينالىق ساقتاندىرۋ شەڭبەرىندە كورسەتىلەتىن بولادى.
ەرلان اۋكەنوۆ, سونداي-اق, قازاقستاندا كوپبالالى وتباسىلاردى قولداۋ ماقساتىندا 2020 جىلعى 1 قاڭتاردان باستاپ 4 جانە ودان دا كوپ كامەلەتكە تولماعان نەمەسە 23 جاسقا دەيىنگى كۇندىزگى وقۋ بولىمىندە وقيتىن ستۋدەنت بالالارى بار وتباسىلارعا جاڭا مەملەكەتتىك جاردەماقى ەنگىزىلگەنىن اتاپ ءوتتى. بۇل مەملەكەتتىك جاردەماقى وتباسىنىڭ تابىسىنا قاراماستان تولەنەدى. وسى ايدا ونى جالپى سوماسى 17,7 ملرد تەڭگەگە 367 مىڭ وتباسى الدى.
سونىمەن قاتار ۆيتسە-مينيستر «ەڭبەك» مەملەكەتتىك باعدارلاماسىنىڭ جەتىلدىرىلگەن تەتىكتەرىن ەگجەي-تەگجەيلى ءتۇسىندىردى.
«كوپبالالى جانە تابىسى از وتباسى مۇشەلەرىن كاسىپكەرلىككە تارتۋ ءۇشىن ولارعا ميكروكرەديتتەر جىلدىق 4% - دان اسپايتىن پايىزدىق مولشەرلەمەمەن 7 جىلعا دەيىنگى مەرزىمگە جەڭىلدىكتى شارتتارمەن بەرىلەتىن بولادى. بۇدان باسقا, حالىقتىڭ بارلىق ساناتتارى ءۇشىن مەملەكەتتىك گرانتتاردىڭ بىرىڭعاي مولشەرى – 200 اەك بەلگىلەنگەن. سونىمەن قاتار كوپبالالى جانە تابىسى از وتباسى مۇشەلەرى الدىن الا وقۋسىز گرانت الۋعا قۇقىلى» دەدى ول.
وبلىستىق اكىمدىكتە ۆيتسە-مينيستر ءوڭىردىڭ قالالارى مەن اۋداندارىمەن جاڭا فورماتتاعى ااك تاعايىنداۋ جانە تابىسى از وتباسىلاردىڭ بالالارىنا كەپىلدىك بەرىلگەن الەۋمەتتىك توپتامالارمەن قامتاماسىز ەتۋ ماسەلەلەرى بويىنشا سەلەكتورلىق سەمينار-كەڭەس وتكىزدى. ەرلان اۋكەنوۆ, سونداي-اق اتاۋلى الەۋمەتتىك كومەك تاعايىنداۋعا ۇمىتكەر وتباسىلاردىڭ ماتەريالدىق جاعدايىنا تەكسەرۋ جۇرگىزۋ كەزىندە ۋچاسكەلىك كوميسسيالاردىڭ جۇمىسىن قالاي قۇرۋ كەرەكتىگىن ەگجەي-تەگجەيلى ايتىپ بەردى.
جۇمىس ساپارى بارىسىندا اۋكەنوۆ ء«بىر تەرەزە» قاعيداتى بويىنشا ءارتۇرلى مەملەكەتتىك قىزمەتتەردى ۇسىناتىن «Open Pavlodar» فرونت-كەڭسەسىنىڭ جۇمىسىمەن تانىستى.
ەستەرىڭىزگە سالا كەتەيىك, كەشە ۆيتسە-مينيستر شقو-دا قۇجاتتاردى قابىلداۋ بارىسىمەن تانىسىپ, ءوڭىر تۇرعىندارىنا ااك كورسەتۋدىڭ جاڭا تەتىكتەرىن ءتۇسىندىردى.