اۆتوموبيل جولدار كوميتەتى «ۇلتتىق جول اكتيۆتەرى ساپاسى ورتالىعى» رمك 2019 جىلى اتقارعان جۇمىسىنىڭ العاشقى قورىتىندىلارىن شىعاردى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
وسىلايشا ورتالىق ماماندار قازاقستان جولدارىندا وتكەن جىلى 13 مىڭعا تارتا تەكسەرىس شاراسىن جۇرگىزىپ, 5 مىڭنان استام ءار الۋان ولقىلىقتى انىقتاعان بولاتىن.
ماسەلەن, وتكەن جىلى اقمولا وبلىسىنا قاراستى قوسشى كەنتىندە جولشىلار ۇيىمداستىرعان رەيدكە قوعام بەلسەندىلەرى, رەسپۋبليكالىق ارنايى مونيتورينگتىك توپ پەن بۇقارالىق اقپارات قۇرالدارىنىڭ وكىلدەرى قاتىستى. تەكسەرىس بارىسىندا ءتۇرلى ولقىلىقتار انىقتالىپ, تەحنيكالىق قاداعالاۋ, سۋبمەردىگەرلىك جانە جوبالىق ۇيىمداردىڭ ماماندارىنا اكىمشىلىك ايىپپۇل سالىندى.
سونداي-اق 2019 جىلى ورتالىق شىعىس قازاقستان, پاۆلودار جانە قىزىلوردا وبلىستارىنداعى جولداردىڭ دا تالاپقا سايكەستىگىن تەكسەردى. اتالمىش جۇمىستاردىڭ ناتيجەسىندە جەرگىلىكتى ماڭىزداعى «مايقايىڭ-ەكىباستۇز» جانە «جالاعاش-جوسالى» جولدارى ستاندارتتارعا ساي ەمەس ەكەندىگى انىقتالعان-دى.
ەسكە سالايىق, «ۇلتتىق جول اكتيۆتەرى ساپاسى ورتالىعى» ۇكىمەت قاۋلىسىنىڭ نەگىزىندە 2019 جىلى 16 «وبلجولزەرتحانا» رمم بىرىكتىرىلۋى ارقىلى قۇرىلعان بولاتىن. ورتالىقتى قۇرۋداعى ماقسات – رەسپۋبليكالىق ماڭىزى بار جولداردىڭ عانا ەمەس, جەرگىلىكتى جول جەلىسىنىڭ ساپاسىن تەكسەرۋ, جول اكتيۆتەرىن باسقارۋ, جول قاۋىپسىزدىگى دەڭگەيىن مونيتورينگتەن وتكىزۋ, جاڭا تەحنيلوگيالار مەن ماتەريالداردى ەنگىزۋ. بيىل اتالمىش كاسىپورىن قازاقستان جولدارىنىڭ ساپاسىن باقىلاۋ شارالارىن كۇشەيتە تۇسپەك.