«وزەنمۇنايگاز» اق مەن «قمگ ينجينيرينگ» جشس («قازمۇنايگاز» ۇك اق ەنشىلەس ۇيىمدارى) جاڭاوزەن قالاسىنىڭ اكىمدىگىمەن ءوزارا تۇسىنىستىك جانە ىنتىماقتاستىق تۋرالى مەموراندۋمعا قول قويدى. بۇل تۋرالى «قازمۇنايگاز» ۇك اق جۇرتشىلىقپەن بايلانىس دەپارتامەنتى حابارلادى.
قول قويىلعان قۇجات قازاقستان رەسپۋبليكاسىنىڭ پرەمەر-ءمينيسترى ا. ءماميننىڭ 2019 جىلعى 18 قىركۇيەكتەگى حاتتامالىق تاپسىرماسىنا سايكەس سۋ تۇششىتۋ زاۋىتىن سالۋ بويىنشا «قمگ ينجينيرينگ» جشس ازىرلەپ جاتقان تەحنيكالىق-ەكونوميكالىق نەگىزدەمەنى الەۋمەتتىك جوبا رەتىندە قايتا سارالاۋدى كوزدەيدى. تيىسىنشە, جاڭاوزەن قالاسىنىڭ تۇرعىندارىن ۇزاق ۋاقىت بويى اۋىز سۋمەن قامتۋدىڭ تالاپتارىنا ساي كەلەتىن سۋدىڭ ساپاسىنا تەحنيكالىق تاپسىرما وزگەرتىلدى. سۋ تۇششىتۋ زاۋىتى ماڭعىستاۋ وبلىسىنىڭ «كەندىرلى» دەمالىس ايماعى ماڭىندا «قازمۇنايگاز» ۇلتتىق كومپانياسىنىڭ قاراجاتى ەسەبىنەن سالىنادى دەپ جوسپارلانۋدا. زاۋىتتىڭ بولجامدى قۋاتى تاۋلىگىنە 50 مىڭ تەكشە مەتر سۋدى قۇرايدى. قازىرگى ۋاقىتتا جاڭاوزەن قالاسى قيعاش وزەنىنەن ەدىل سۋىن 2000 شاقىرىم قاشىقتىقتان تاسىمالداۋ ارقىلى اۋىز سۋمەن قامتاماسىز ەتىلىپ وتىر.
ماڭعىستاۋ وبلىسىندا سۋ تاپشىلىعى ەڭ وزەكتى ماسەلە بولىپ تابىلادى. سەبەبى, ءوڭىر جارتىلاي شولەيت ايماقتا ورنالاسقان. ونىڭ سۋ رەسۋرستارى شەكتەۋلى. «قازمۇنايگاز» جۇيەسىنە كىرەتىن «استراحان-ماڭعىشلاق» سۋ قۇبىرى مۇناي-گاز ءوندىرۋشى كاسىپورىندارىنان بولەك, ەدىل وزەنىنىڭ سۋىمەن جەرگىلىكتى حالىقتى, ونەركاسىپ نىساندارىن, كوممۋنالدىق جانە بيۋدجەتتىك ۇيىمداردى, اۋىل شارۋاشىلىعى ونىمدەرىن وندىرۋشىلەردى دە قامتاماسىز ەتۋدە. الايدا, حالىق سانىنىڭ وسۋىنە جانە جاڭا كاسىپورىنداردىڭ قۇرىلۋىنا بايلانىستى وڭىردەگى سۋدى تۇتىنۋ كولەمى دە ارتىپ كەلەدى. وسىنىڭ سالدارىنان اۋىز سۋمەن قامتۋ جۇيەسىنىڭ جاقسارۋىنا قاراماستان, سۋ قۇبىرىنىڭ قۋاتى جەتكىلىكسىز.
بۇدان قوسا, قمگ جالعىز سۋ قۇبىرى عانا ەمەس, سونداي-اق سۋ تۇششىتۋ قوندىرعىلارىنىڭ كومەگىمەن دە ءوڭىردى سۋمەن قامتىپ وتىر. قازىرگى ۋاقىتتا قاراجانباس كەن ورنىندا سۋ تۇششىتۋ زاۋىتى سالىنۋدا. بۇل زاۋىت ءوڭىر ءۇشىن ەدىل سۋىنىڭ تاۋلىگىنە 17 مىڭ تەكشە مەترىن بوساتۋعا مۇمكىندىك بەرەدى.
«قازمۇنايگاز» كومپانيالار توبى وڭىرلەردە ءوز قىزمەتىن جۇرگىزە وتىرىپ, ءوزىنىڭ جاۋاپكەرشىلىگىن جەتە تۇسىنەدى. كومپانيا ماڭعىستاۋ وبلىسىنىڭ الەۋمەتتىك-ەكونوميكالىق تۇرعىدان قارقىندى دامۋىنا مۇددەلى. سۋ تۇششىتۋ قوندىرعىلارىن سالۋ ماڭعىستاۋ وبلىسىنىڭ عانا ەمەس, سونىمەن بىرگە اتىراۋ ءوىڭىرىنىڭ حالقى ءۇشىن دە جاعىمدى اسەر ەتەتىنى ءسوزسىز.