قر پرەزيدەنتى قازاقتىڭ ۇلى اقىنى, ويشىل-فيلوسوفى, قوعام قايراتكەرى اباي قۇنانباەۆتىڭ 175 جىلدىق مەرەيتويىنا ارنالعان "اباي جانە ءححى عاسىرداعى قازاقستان" اتتى ماقالاسىندا قازاقستان حالقىن ۇلى ابايدىڭ مۇرالارى مەن ەڭبەكتەرىن قايتا زەردەلەۋ, پاراسات-پايىمىن قاجەتىمىزگە جاراتۋعا شاقىرا وتىرىپ, قازاق قوعامىن دامىتۋدىڭ الداعى جۇزجىلدىقتاعى ماڭىزدى باسىمدىقتارىن ايقىنداپ بەردى.
ۇلان-عايىر جەر مەن باي تابيعي رەسۋرستاردى يەلەنگەن قازاقستان دامۋدىڭ جارقىن بولاشاعىنا يە. بىراق ونى يگەرۋ ءۇشىن ەلىمىزگە ساپالى دامىعان ادام كاپيتالى قاجەت. بۇل جونىندە كەزىندە اباي ءدوپ باسىپ ايتقان. قوعامنىڭ ينتەللەكتۋالدى قۋاتىن قالىپتاستىرۋ مەن ارتتىرۋ, ادام كاپيتالى يدەياسىن دامىتۋدى پرەزيدەنتتىڭ ءوز ماقالاسىنا ارقاۋ ەتىپ الۋى كەزدەيسوقتىق ەمەس. ۇلى ويشىل ەڭبەكتەرىندە عىلىم مەن بىلىمگە اسا ءمان بەرۋى - دامۋدىڭ نەگىزى وسىلار ەكەندىگىن تۇيسىنگەندىگىندە. وسىنى ۇعىنا وتىرىپ ءبىزدىڭ پرەزيدەنتىمىز ق.ك.توقاەۆ ءبىلىم جۇيەسىن مودەرنيزاتسيالاۋ رەفورماسىن قولعا الدى.
بۇگىندە بۇل تەك ءسوز جۇزىندە عانا ەمەس, ناقتى قادامدارعا, ۇلتتىق ءبىلىم بەرۋ ءىسى مەن وتاندىق عىلىمدى قولداۋ مەن دامىتۋعا باعىتتالعان شىنايى باعدارلامالاردىڭ جۇزەگە اسۋىنا سەپ بولىپ وتىر. ناتيجەسىندە وتكەن جىلى باكالاۆريات پەن ماگيستراتۋراعا بولىنەتىن مەملەكەتتىك گرانتتىڭ ۇلەسى ارتسا, ونىڭ ىشىندە تەحنيكالىق, اگرارلىق جانە اقپاراتتىق تەحنولوگيالار ماماندىعىنا گرانتتار سانى كوبەيدى. بيىلعى وقۋ جىلىنان باستاپ بولىنگەن مەملەكەتتىك گارانتتىڭ قۇنى 349-دان 778 مىڭ تەڭگەگە دەيىن ءوستى, ءوز كەزەگىندە بۇل جوو-نىڭ ماتەريالدىق بازاسىنىڭ جاقسارۋىنا جانە كادرلاردى دايىنداۋ ساپاسىنىڭ جوعارلاۋىنا اكەلدى. 2025 جىلى مەملەكەت عىلىمي زەرتتەۋلەردى قارجىلاندىرۋدى 10 ەسەگە ارتتىرۋدى كوزدەپ وتىر!
ناتيجەسىندە وتاندىق عالىمداردىڭ عىلىممەن الاڭسىز اينالىسۋىنا جانە ەلىمىزدە بىلىكتىلىگى جوعارى كادرلاردى دايىنداۋعا داڭعىل جول اشىلاتىنى ءسوزسىز.
زاماناۋي جاستار بۇگىنگى وزىق ءبىلىمدى يگەرۋى ءتيىس, مەملەكەت پەن پرەزيدەنتىمىز بەرىپ وتىرعان وڭتايلى ءساتتى ۋىسىنان شىعارماعانى ابزال. ۇلى ويشىلدىڭ رۋحاني مۇراسىن بۇگىنگى كۇننىڭ تاريحي شىندىعى تۇرعىسىنان بويىنا سىڭىرە وتىرىپ جاستارىمىز ەل ەكونوميكاسىنىڭ دامۋىنا, بولاشاعىنا قىزمەت جاسارىن ۇعىنۋى ءتيىس. سوندا عانا ابايدىڭ ادام مەن قوعام, ءبىلىم مەن عىلىم, مەملەكەت پەن ۇكىمەت جونىندەگى ناقىل سوزدەرى مەن يدەيالارى ءوزىنىڭ ماڭىزىن, وزەكتىلىگىن قاي داۋىردە دە جويمايتىندىعىن سەنىممەن ايتا الامىز.
اقىلبەك كۇرىشباەۆ, اۋىل شارۋاشىلىعى عىلىمدارىنىڭ دوكتورى, پروفەسسور, «س.سەيفۋللين اتىنداعى قازاق اگروتەحنيكالىق ۋنيۆەرسيتەتى» اق باسقارما توراعاسى