سەناتتىڭ قارجى جانە بيۋدجەت كوميتەتىنىڭ توراعاسى ولگا پەرەپەچينا سولتۇستىك قازاقستان وبلىسىنىڭ اققايىڭ اۋدانىنداعى رۋبلەۆكا اۋىلىندا ورنالاسقان «زەنچەنكو» مال شارۋاشىلىعى كەشەنىندە بولدى. كەشەن 2018 جىلدىڭ سوڭىندا سالىنعان بولاتىن جانە سول كەزدەن باستاپ گەرمانيادان اكەلىنگەن مال باسى ەكى ەسە (596-دان 1063-كە دەيىن) ءوستى. ەلۋگە جۋىق جۇمىسشى ەڭبەك ەتەتىن كەشەندە كۇنىنە 10 توننا ءسۇت وندىرىلەدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
سەناتور ارالاعاش اۋىلىنداعى ارالاعاش ورتا مەكتەبىنىڭ ۇجىمىمەن كەزدەسىپ, دايىندىق اۋىلىنداعى «دايىندىق» ءسۇت تاۋارى فەرماسىنا بولدى, سول جەردە اۋداندىق ءماسليحات دەپۋتاتتارىمەن كەزدەسۋ وتكىزدى.
كەزدەسۋ بارىسىندا اگروونەركاسىپ كەشەندەرىن مەملەكەتتىك قولداۋ, الەۋمەتتىك جاۋاپكەرشىلىك جانە جەرلەردى ءتيىمدى پايدالانۋ ماسەلەلەرى, «پەداگوگ مارتەبەسى تۋرالى» زاڭنىڭ نەگىزگى ەرەجەلەرى, اتاۋلى الەۋمەتتىك كومەك كورسەتۋدىڭ جاڭا تەتىكتەرى, كەپىلدى الەۋمەتتىك پاكەت, مىندەتتى الەۋمەتتىك مەديتسينالىق ساقتاندىرۋ ماسەلەلەرى تالقىلاندى.
سەناتور ساپار اياسىندا پەتروپاۆل قالاسىنداعى «اتامەكەن» وبلىستىق كاسىپكەرلەر پالاتاسىندا دا بولدى. كەزدەسۋگە بيزنەس وكىلدەرى, اۋىل شارۋاشىلىعى, قۇرىلىس يندۋسترياسى قۇرىلىمدارى مەن وبلىستىق مەكەمەلەردىڭ باسشىلارى قاتىستى. كەزدەسۋ بارىسىندا ەلەكتر ەنەرگياسىنىڭ كوپتاراپتى تاريفتەرىن قايتارۋ, جەر داۋلارىن شەشۋ, سۋبسيديا تولەمدەرى بويىنشا قارىزدار, ايماقتى سۋمەن قامتاماسىز ەتۋ, شارۋا قوجالىقتارى مەن شاعىن بيزنەس سۋبەكتىلەرىنىڭ باقىلاۋ-كاسسالىق ماشينالارىن قولدانۋ قاجەتتىگى, ىشكى ىستەر مينيسترلىگىنىڭ كولىك قۇرالدارى بويىنشا دەرەكتەر قورىن جاڭعىرتۋ, شەكارا بەكەتتەرىنىڭ جۇمىسى جانە تاعى باسقا ماسەلەلەر كوتەرىلدى.