بۇل كۇندەرى تايلاندتىڭ ناكحونراتچاسيما قالاسىندا ۆولەيبولدان ايەلدەر اراسىندا ءوتىپ جاتقان وليمپيا ويىندارىنىڭ ىرىكتەۋ تۋرنيرىندە قازاقستان قۇراماسى قاتارىنان ەكىنشى رەت جەڭىسكە جەتتى.
ازيا اۋماعىندا ورنالاسقان بىرقاتار مەملەكەت وكىلدەرىنىڭ باسىن قوسقان جارىستىڭ تۇساۋكەسەر كەزدەسۋىندە جەرلەستەرىمىز يران قۇراماسىن 3:0 (25:14, 25:16, 25:14) ەسەبىمەن ۇتقان ەدى.
كەلەسى ماتچتى قازاقستاندىقتار يندونەزياعا قارسى وتكىزدى. بۇل باسەكەدە دە ءبىزدىڭ ارۋلاردىڭ باسىمدىعى ەش كۇمان تۋعىزعان جوق. ەسەپ – 3:0 (25:22, 25:23, 25:18).
ەندى وتانداستارىمىز وڭتۇستىك كورەيا قۇراماسىمەن كۇش سىناسادى. وسى جارىستىڭ ەرەجەسىنە ساي ءار توپتا العاشقى ەكى ورىندى يەلەنگەن كوماندالار جارتىلاي فينالعا جولداما الادى.