ازيا ينفراقۇرىلىمدىق ينۆەستيتسيالار بانكى «ورتالىق – باتىس» ءدالىزىن رەكونسترۋكتسيالاۋ جوباسىن قارجىلاندىرۋعا قىزىعۋشىلىق تانىتتى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
ايب-نە قازاقستاندى قوسا العاندا 57 مەملەكەت مۇشە. بانكتىڭ نەگىزگى ماقساتى – ازيا-تىنىق مۇحيت ايماعىندا قارجىلىق ىنتىماقتاستىقتى ىنتالاندىرۋ, سونداي-اق ازياداعى ينفراقۇرىلىمدىق جوبالاردى قارجىلاندىرۋ. 2019 جىلى قازاقستاننىڭ مەملەكەتتىك ورگاندارى مەن بانك وكىلدەرىنىڭ قاتىسۋىمەن ايب تاراپىنان ەلىمىزدەگى جوبالاردى قارجىلاندىرۋ مەحانيزمدەرىن تالقىلاۋعا ارنالعان بىرقاتار شارا وتكەن بولاتىن. بانككە نۇر-سۇلتاندى قازاقستاننىڭ باتىس وڭىرلەرىمەن بايلانىستىراتىن «ورتالىق – باتىس» ءدالىزىن رەكونسترۋكتسيالاۋ جوباسى ۇسىنىلدى. ايب وكىلدەرى ۇكىمەت رەسمي تۇردە قىزىعۋشىلىق تانىتقان جاعدايدا اتالمىش جوبانى قارجىلاندىرۋ مۇمكىندىگىن قاراستىرۋعا دايىن ەكەندىگىن ايتتى.
ايتا كەتەيىك, قازاقستاننىڭ اۆتوموبيل جولدارى سالاسىنداعى جوبالار 5 حالىقارالىق قارجىلىق ينستيتۋتتىڭ قولداۋىمەن ىسكە اسىرىلادى. وسىلايشا دۇنيەجۇزىلىك بانكتىڭ قولداۋىمەن «باتىس ەۋروپا – باتىس قىتاي» ترانزيتتىك ءدالىزىنىڭ جالپى ۇزىندىعى 1098 شاقىرىمدى قۇرايتىن قىزىلوردا جانە تۇركىستان وبلىستارىنداعى ۋچاسكەلەرىنىڭ رەكونسترۋكتسياسى جۇرگىزىلدى. سونىمەن قاتار جوبا اياسىندا ۇزىندىعى 85 شاقىرىمدى قۇرايتىن «كۇرتى – بۋرىلبايتال» جانە 96 شاقىرىمدىق «ۇزىناعاش – وتار» اۆتوموبيل جولدارىنىڭ ۋچاسكەلەرىندە قۇرىلىس جۇمىستارى جالعاسىپ جاتىر.
ەۋروپا قايتا قۇرۋ جانە دامۋ بانكى دە قازاقستانداعى ينفراقۇرىلىمدىق جوبالاردى قارجىلاندىرۋ شارالارىنا بەلسەنە ارالاسادى. ەققدب-ءنىڭ قاتىسۋىمەن «باتىس ەۋروپا – باتىس قىتاي» ءدالىزىنىڭ قۇرامىنا كىرەتىن 102 شاقىرىمدىق «اقتوبە – مارتۇك» پەن ۇزىندىعى 62 شاقىرىمدى قۇرايتىن «تاشكەنت – شىمكەنت» جولدارىن رەكونسترۋكتسيالاۋ جوبالارى جۇزەگە اسىرىلدى. بۇدان بولەك, بۇگىنگى تاڭدا ۇزىندىعى 143 شاقىرىمدى قۇرايتىن «كۇرتى – بۋرىلبايتال», 67 شاقىرىمدىق «كۇرتى – قاپشاعاي» جانە اتىراۋ قالاسىنىڭ سولتۇستىك اينالما جولىن قوسا العاندا, جالپى ۇزىندىعى 243 شاقىرىم بولاتىن «اتىراۋ – رەسەي شەكاراسى (استراحان)» جولدارىن رەكونسترۋكتسيالاۋ جوبالارى جۇزەگە اسىرىلۋدا.
ازيا دامۋ بانكى «باتىس ەۋروپا – باتىس قىتاي» ءدالىزىنىڭ جامبىل جانە تۇركىستان وبلىستارىنداعى جالپى ۇزىندىعى 467 شاقىرىم بولاتىن ۋچاسكەلەرىن رەكونسترۋكتسيالاۋ جانە 470 شاقىرىمدىق «بەينەۋ – اقتاۋ» جولىن رەكونسترۋكتسيالاۋ جوبالارىن قارجىلاندىردى. جالپى ۇزىندىعى 299 شاقىرىمدى قۇرايتىن «اقتوبە – ماقات» جوباسى ىسكە اسىرىلىپ جاتىر.
يسلام دامۋ بانكى «باتىس ەۋروپا – باتىس قىتاي» ءدالىزىنىڭ ۇزىندىعى 57 شاقىرىمدى قۇرايتىن «وڭتۇستىك قازاقستان وبلىسى – تاراز قالاسى» ۋچاسكەسىن رەكونسترۋكتسيالاۋ جوباسىن قارجىلاندىردى. جاپونيا حالىقارالىق ىنتىماقتاستىق اگەنتتىگىنىڭ قولداۋىمەن «باتىس ەۋروپا – باتىس قىتاي» ءدالىزىنىڭ جامبىل وبلىسىنداعى ۋچاسكەلەرىن رەكونسترۋكتسيالاۋ جوباسى ىسكە اسىرىلدى.