ەلوردادا «قازاقستاننىڭ 100 جاڭا ەسىمى» جوباسى قورىتىندىلانىپ, سپورت, مادەنيەت, قوعام, مەديتسينا, عىلىم مەن ءبىلىم, بيزنەس سالالارىنداعى ۇزدىكتەر انىقتالدى. مۇنداعى باستى ماقسات – تاۋەلسىزدىك جىلدارىندا قازاقستاننىڭ دامۋىنا ەلەۋلى ۇلەس قوسقان ازاماتتاردىڭ تابىستىلىق, باسەكەگە قابىلەتتىلىك, پراگماتيزم جانە بىلىمگە تابىنۋ يدەيالارىن ىلگەرىلەتۋ بولىپ تابىلادى.
قورىتىندى شاراعا مەملەكەتتىك حاتشى قىرىمبەك كوشەرباەۆ, پرەمەر-ءمينيستردىڭ ورىنباسارى بەردىبەك ساپارباەۆ, اقپارات جانە قوعامدىق دامۋ ءمينيسترى داۋرەن اباەۆ جانە باق وكىلدەرى قاتىستى.
ءۇش كەزەڭدى قامتىعان جوبانىڭ العاشقى كەزەڭىندە «قازاقستاننىڭ 100 جاڭا ەسىمى» قاتارىنا ەنۋگە نيەت بىلدىرگەن قازاقستاندىق 1673 ازاماتتىڭ انكەتاسى قابىلداندى. كەلەسى كەزەڭ شارتى بويىنشا 5-25 قاراشا ارالىعىندا جوبانىڭ 100janaesim.ruh.kz رەسمي سايتىندا جالپىحالىقتىق داۋىس بەرۋ جۇرگىزىلدى. وندا وتانداستارىمىز تاراپىنان بارلىعى 700 مىڭنان استام داۋىس جينالىپتى.
ال 28 قاراشادا قۇرامىنا قازاقستاننىڭ حالىق ءارتىسى روزا رىمباەۆا, «تەحنودوم» كومپانياسىنىڭ نەگىزىن قالاۋشى ەدۋارد كيم, «Kaspi.kz» اق ديرەكتورلار كەڭەسىنىڭ توراعاسى ۆياچەسلاۆ كيم, وليمپيادا چەمپيوندارى الەكساندر ۆينوكۋروۆ پەن سەرىك ساپيەۆ, «BTS» ءبىلىم باعىتىنداعى كومپانيانىڭ جەتەكشىسى ساياسات نۇربەك, قوعام قايراتكەرى مۇرات ابەنوۆ, «تالاپ» قولدانبالى زەرتتەۋ ورتالىعىنىڭ جەتەكشىسى راحىم وشاقباەۆ, «قازاقستاننىڭ ازاماتتىق اليانسى» زاڭدى تۇلعالار بىرلەستىگىنىڭ پرەزيدەنتى اسىلبەك قوجاحمەتوۆ, كاسىپكەر, جازۋشى قۋانىش شونباي, مۋزىكانت, ديماش قۇدايبەرگەننىڭ پروديۋسەرى قانات ايتباەۆ ەنگەن قازىلار القاسىنىڭ وتىرىسى ءوتتى. ناتيجەسىندە, جۇزدەن جۇيرىك تانىلعان 32 جەڭىمپازدىڭ ەسىمى جاڭعىردى. ونىڭ 25-ءى ونلاين داۋىس بەرۋدە ەڭ كوپ داۋىس جيناعاندار بولسا, 7-ەۋىن قازىلار قۇرامى ۇسىنىپتى.
ولاردىڭ قاتارىندا مادەنيەت سالاسىندا الماتى وبلىسىنان الىبەك نۇربەك, نۇر-سۇلتان قالاسىنان قانات نۇرتازين مەن دينا بايتاسوۆا, پاۆلودار وبلىسىنان يمانبەك زەيكەنوۆ, شىعىس قازاقستان وبلىسىنان ولگا چاۆكينا; قوعام سالاسىندا الماتى قالاسىنان اسەل بايمۇقانوۆا, نۇر-سۇلتان قالاسىنان شىنار بولسامبەكوۆا, اسحات سادۋوۆ, نۇرگۇل ولجەكوۆا, اسەل جاناسوۆا, ەلنارا باينازاروۆا, شىمكەنت قالاسىنان الديار جۇماحانوۆ, تۇركىستان وبلىسىنان ايجان ءجۇزباي, شىعىس قازاقستان وبلىسىنان قۋاندىق قاناتوۆ پەن ەرجان ومارحانوۆ, الماتى وبلىسىنان ەلدار ساپاروۆ; عىلىم جانە ءبىلىم سالاسىندا اقمولا وبلىسىنان نازگۇل جاكەنوۆا, قوستاناي وبلىسىنان ماكسيم ريۋمين, جامبىل وبلىسىنان شاكارىم سەيسەنباي, الماتى قالاسىنان دانا شاياحمەت; مەديتسينا سالاسىندا قىزىلوردا وبلىسىنان ساۋلەت قالداشوۆ, الماتى قالاسىنان باۋىرجان راقىشەۆ; سپورت سالاسىندا قوستاناي وبلىسىنان رۇستەم ەرعالي, قاراعاندى وبلىسىنان ابىلايحان ءجۇسىپوۆ, يۆان سنەگۋروۆ, قوستاناي وبلىسىنان ماليكا مۇحتاروۆا, ماڭعىستاۋ وبلىسىنان يلدار ياگياەۆ; بيزنەس سالاسىندا باتىس قازاقستان وبلىسىنان اسەل اياپوۆا, الماتى وبلىسىنان ايگەرىم بەرەكەشەۆا, الماتى قالاسىنان رۇستەم ەرمەكباي, ازات سەمبينوۆ, قوستاناي وبلىسىنان دينارا شۋكيجانوۆا بار.
– ەلىمىزدەگى ەڭ جاس مەكتەپ ديرەكتورىمىن. مەكتەپ ۇجىمىندا 213 ازامات قىزمەت ەتىپ, 2 700 وقۋشى ءبىلىم الادى. ۇستازدىق قىزمەتتەگى ماقساتىم – مەملەكەتىمىزدىڭ ءبىلىم سالاسىن برەندكە اينالدىرىپ, الەمدىك باسەكەدەگى مارتەبەسىن ودان ءارى ارتتىرۋ. قازىرگى تاڭدا وكىنىشكە قاراي, بەدەلدى جوعارى وقۋ ورىندارىن تامامداعان ءبىلىمدى ازاماتتاردىڭ اراسىندا مەكتەپكە بارىپ, ۇستاز بولىپ ءبىلىم بەرۋ – ۇردىسكە اينالماعان. ال ءبىزدىڭ نەگىزگى بايلىعىمىز – جەر استىنداعى التىن ەمەس, مۇناي ەمەس, حالقىمىزدىڭ ۇشان-تەڭىز ءبىلىمى. سول سەبەپتەن بىزگە مىقتى ۇستازدار قاجەت. سەبەبى حاننىڭ دا, قارانىڭ دا ومىرلىك ۇستازدارى بولعان, – دەدى جوبا جەڭىمپازى, نۇر-سۇلتان قالاسىنداعى №54 مەكتەپ-ليتسەيىنىڭ ديرەكتورى شاكارىم سەيسەنباي.