جانگەلدين اۋدانىندا «تاتۋلاستىرۋ ورتالىعى» اشىلدى. وندا ازاماتتارعا ءتيىستى قىزمەتتەر كورسەتۋ ءۇشىن ءتۇرلى قۇجاتتار قويىلعان, جيھازبەن جابدىقتالعان. ورتالىقتىڭ اشىلۋ راسىمىندە اۋدان اكىمى شوتا وسپانوۆ قازاقستاننىڭ باستى جەتىستىكتەرىنىڭ ءبىرى بۇل ۇلتارالىق بىرلىك پەن قوعامدىق كەلىسىم ەكەنىن اتاپ ءوتتى.
«بۇگىندە قازاقستاندىقتار ۇلت جوسپارىن ىسكە اسىرۋ اياسىنداعى وتاندىق سوت جۇيەسىندە ءجۇرىپ جاتقان رەفورمالار مەن اۋقىمدى قۇقىقتىق ءتۇسىندىرۋ جۇمىستارىنىڭ ارقاسىندا داۋ-شارلاردى سوتقا جەتكىزبەي تاتۋلاستىرۋ راسىمدەرىنىڭ كومەگىمەن شەشۋ سوت تالقىلاۋىنان گورى اناعۇرلىم ءتيىمدى ءارى جىلدام ەكەندىگىن ءتۇسىندى» دەدى شوتا وسپانوۆ.
اۋداندىق سوت توراعاسى جولدىباي مەتاەۆ ايتقانداي, اۋداندىق سوتتا ءبىراز جىلدار بويى سوتتا قارالاتىن ىستەر بويىنشا تاتۋلاستىرۋ راسىمدەرى جۇرگىزىلگەن مەدياتسيا كابينەتى جۇمىس جاساپ كەلگەنىن اتاپ ءوتتى. وسى جىلدىڭ باسىندا «تاتۋلاسۋ: سوتقا دەيىن, سوتتا» پيلوتتىق جوباسىن ىسكە اسىرۋ اياسىنداعى مەدياتسيا كابينەتى نەگىزىندە تاتۋلاستىرۋ ورتالىعىن اشۋ تۋرالى شەشىم قابىلداندى. تاتۋلاستىرۋ ورتالىعىندا تۇراقتى نەگىزدە حالىققا تەگىن زاڭ جانە پسيحولوگيالىق كومەك كورسەتەتىن, سونىمەن قاتار حالىقتى قۇقىقتىق ساۋاتتىلىققا ۇيرەتەتىن بيلەر كەڭەسىنىڭ مۇشەلەرى, مەدياتورلار, الەۋمەتتىك زاڭگەرلەر جۇمىس جاسايدى. بۇل جونىندە مۇددەلى مەملەكەتتىك ورگاندار مەن «اليانس» زاڭ كەڭەسشىلەرى پالاتاسىنىڭ وكىلىمەن تيىسىنشە كەلىسىم جاسالعان.
قوستاناي وبلىسى,
جانگەلدين اۋدانى