جاڭا جىلدىڭ قارساڭىندا پوليتسياعا قوسىمشا پروبلەما جۇكتەيتىن نارسە – پيروتەحنيكالار. ونى ورىنسىز قولدانۋدىڭ كەسىرىنەن تالاي بالا جارالانىپ جاتادى. سوندىقتان سقو پوليتسەيلەرى رەسپۋبليكالىق «پيروتەحنيكا» جەدەل-پروفيلاكتيكالىق ءىس-شاراسىنا بەلسەنە قاتىسىپ, ساۋدا ورىندارىن تەكسەرۋدى قولعا الدى. ونىڭ ماقساتى – ادامداردى ساپاسىز وت شاشۋلار مەن پەتاردالاردى پايدالانۋدان بولاتىن قاۋىپتەردەن ساقتاۋ.
«ليتسەنزيالانعان پيروتەحنيكا ونىمدەردىڭ سىرتىندا مىندەتتى تۇردە قازاق جانە ورىس تىلدەرىندە جازىلعان نۇسقاۋلىق بولۋى جانە ول قاتاڭ ساقتالۋى قاجەت, دەيدى سقو پد اكىمشىلىك پوليتسيا باسقارماسىنىڭ باستىعى پوليتسيا پودپولكوۆنيگى جاسۇلان حاميتوۆ.
«بالالاردىڭ پيروتەحنيكانى پايدالانۋىنا تىيىم سالىنادى. ليتسەنزيالانباعان وت شاشۋلار ەكى ەسە قاۋىپتى ەكەنىن ەستە ساقتاعان ءجون. ساپا كەپىلدىگى بولماسا, ءونىمنىڭ ۋاقىتىنان بۇرىن تۇتانىپ, قولدا جارىلۋى ابدەن مۇمكىن. ولار كوبىنە كۇتىم نورمالارىن ساقتامايتىن ورىنداردا ساۋدالانادى. ونىمدە وندىرىستىك اقاۋ بولماسا دا, كۇن ساۋلەسىنىڭ, جاۋىن-شاشىننىڭ اسەرىنەن ادام ومىرىنە جانە دەنساۋلىعىنا قاۋىپ توندىرەدى», دەيدى ول.
سونىمەن قاتار پوليتسەيلەر اكىمشىلىك قۇقىق بۇزۋشىلىق تۋرالى كودەكستىڭ 436-بابىنا سايكەس «ەلدi مەكەندەردە اتىس قارۋىنان, گازدى, پنەۆماتيكالىق, لاقتىرىلاتىن جانە ەلەكترلى قارۋدان وق اتۋ, پيروتەحنيكالىق بۇيىمداردى قولدانۋ» بويىنشا بالالارىنا پيروتەحنيكامەن ويناۋعا رۇقسات بەرگەن اتا-انالارعا 20 اەك (ايلىق ەسەپتىك كورسەتكىش) كولەمىندە ايىپپۇل سالىناتىنىن ەسكەرتۋدە.
پيروتەحنيكانى ءتيىستى قۇجاتسىز ساتاتىن ساۋداگەرلەر دە وسى كودەكستىڭ 196-بابى - «تاۋارلارمەن نەمەسە وزگە دە زاتتارمەن زاڭسىز ساۋدا جاساۋ» بويىنشا جاۋاپقا تارتىلىپ, 25 اەك كولەمىندە ايىپپۇل تارتۋى كوزدەلگەن. ال پيروتەحنيكالىق زاتتاردى ليتسەنزيا بويىنشا ساتاتىندارعا ساقتاۋ, ەسەپكە الۋ, پايدالانۋ, تاسىمالداۋ جانە ت.ب. ءتارتىبىن بۇزسا, 5-تەن 45-كە دەيىنگى اەك كولەمىندە ايىپپۇل سالۋ قاراستىرىلعان.