قورعانىس ىستەرى جونىندەگى دەپارتامەنتتەر ءۇندىستان ۇلتتىق قورعانىس ۋنيۆەرسيتەتىنە قابىلدانۋعا كانديداتتاردى ىرىكتەۋ جۇرگىزۋدە. پۋنا قالاسىندا ورنالاسقان جالپى اسكەري اكادەميادا ءبىلىم الۋعا تىلەك بىلدىرۋشىلەر 15 شىلدە مەن 26 تامىز ارالىعىندا جەرگىلىكتى جەردەگى اسكەري كوميسسيارياتتارعا بارۋى ءتيىس.
ءبىلىم الۋعا ارنالعان كۆوتالار سانى شەكتەۋلى, اكادەميا كۋرسانتى اتانۋعا بارلىق ۇمىتكەرلەردىڭ ىشىنەن تەك بەس قازاقستاندىق مۇمكىندىك الادى.
بارلىق كەزەڭدەردەن تابىستى وتكەن كانديداتتار قازاقستان رەسپۋبليكاسى قورعانىس مينيسترلىگىنە اڭگىمەلەسۋگە شاقىرىلادى. قورعانىس مينيسترلىگىنىڭ باسشىلىعى بەكىتكەن كانديداتتار ءۇندىستان ۇلتتىق قورعانىس ۋنيۆەرسيتەتىنە وقۋعا كەتەرگە دەيىن تىلدىك دايارلىقتان ءوتۋ ءۇشىن قۇرلىق اسكەرلەرى اسكەري ينستيتۋتىنا جىبەرىلەدى.
وسى ارالىقتا قازاقستان قارۋلى كۇشتەرىندە رەزەرۆيستەردى دايارلاۋ جالعاسۋدا. سەمەي قالاسىنداعى وقۋ-جاتتىعۋ ورتالىعىنىڭ بازاسىندا لاگەرلىك جيىنداردىڭ كەزەكتى كەزەڭى اياقتالىپ, وندا زاپاستاعى اسكەري مىندەتتىلەردى دايارلاۋ, زاپاستاعى سەرجانتتار مەن سولداتتاردى قايتا دايارلاۋ جانە ولاردىڭ اسكەري بىلىمدەرىن جەتىلدىرۋ جۇرگىزىلدى.
«شىعىس» وڭىرلىك قولباسشىلىعى اسكەري بولىمدەرىندە اسكەري قىزمەتشىلەرمەن جيىن وتكىزۋ قازاقستان ۇكىمەتىنىڭ قاۋلىسىنا سايكەس جازعى وقۋ كەزەڭىندەگى رەسپۋبليكالىق جۇمىلدىرۋ دايارلىعى ءىس-شارالارى شەڭبەرىندە جۇزەگە اسىرىلادى.
اسكەري مىندەتتىلەر دايارلىق بارىسىندا اسكەري بىلىمدەرىن ارتتىرىپ, قارۋ-جاراق پەن اسكەري تەحنيكانى جانە ولاردى ۇرىستا قولدانۋ تاسىلدەرىن زەردەلەدى, سونداي-اق ولاردى پايدالانۋداعى پراكتيكالىق داعدىلارىن جەتىلدىردى.
– اسكەري مىندەتتىلەردى دايارلاۋدا نەگىزىنەن اسكەري لاۋازىمدار بويىنشا مىندەتتەردى تابىستى ورىنداۋ ءۇشىن قاجەتتى قارۋ-جاراق پەن اسكەري تەحنيكانى پايدالانۋ كەزىندەگى دالالىق ماشىقتانۋ مەن پراكتيكالىق داعدىلارىن بويعا سىڭىرۋگە نازار اۋدارىلادى, – دەپ اتاپ ءوتتى لاگەرلىك جيىننىڭ باسشىسى, پودپولكوۆنيك فايزوللا دوسانوۆ.
جيىن بارىسىندا اسكەري ءبولىمنىڭ وفيتسەرلەرى مەن سەرجانتتارى زاپاستاعى اسكەري مىندەتتىلەرمەن ساپتىق دايارلىق, دەنە دايارلىعى, جالپى اسكەري جارعىلار بويىنشا باقتار وتكىزدى. سودان سوڭ اسكەري مىندەتتىلەردى دايارلاۋدىڭ نەگىزگى كەزەڭى – اسكەري ماماندىقتار بويىنشا دايارلاۋ باستالدى.
دايارلىق بارىسىندا رادياتسيالىق, حيميالىق جانە بيولوگيالىق قورعاۋ, ينجەنەرلىك, اسكەري-مەديتسينالىق دايارلىق, اسكەري توپوگرافيا سياقتى پاندەردى دە زەردەلەۋگە كوڭىل بولىنەدى.
«ەگەمەن-اقپارات».