ءبارى دە ادامنىڭ يگىلىگى ءۇشىن

قازاقستاننىڭ ازاماتتىق اليانسى مەملەكەتتىك قىزمەتتەر كورسەتۋ ساپاسىنا مونيتورينگ بويىنشا تۇسىنىك جۇمىستارىن جۇرگىزدى

قازاقستاننىڭ ازاماتتىق اليانسى مادەنيەت جانە اقپارات مينيسترلىگىنىڭ قولداۋىمەن «بولاشاق بۇگىننەن باستالادى!» رەسپۋبليكالىق ءىس-شارا شەڭبەرىندە «مەملەكەتتىك قىزمەتتەر كورسەتۋ تۋرالى» زاڭنىڭ نەگىزگى ەرەجەلەرىن ءتۇسىندىرۋ بويىنشا سەمينارلار جەلىسىن وتكىزدى.

اتالعان سەمينارلاردىڭ باستى ماقساتى – قاتىسۋشى­لار­دى قابىلدانعان زاڭنىڭ نەگىزگى ەرە­جەلەرىمەن تانىس­تىرۋ, سونداي-اق, مەملەكەتتىك قىزمەتتەر كورسە­تۋدىڭ ساپاسىنا باعالاۋ جۇرگىزۋدە ۇكىمەتتىك ەمەس ۇيىمدار (ۇەۇ) قىز­­­­مەتىنىڭ پىشىندەرى مەن مازمۇن­دارىن ءتۇسىندىرۋ بولىپ تابىلدى.

قازاقستاننىڭ ازاماتتىق اليانسى­نىڭ وڭىرلىك قۇرىلىمى اتال­عان سەمينارلاردى وتكىزۋ كە­زىن­دە ەلىمىزدەگى ۇكىمەتتىك ەمەس ۇيىمداردىڭ بارىنشا كەڭ اۋقىمىن قامتۋعا مۇمكىندىك بەردى. ماسەلەن, سەمينارلارعا 14 وبلىستان, استانا مەن الماتى قا­لالارىنان 400-دەن استام ۇەۇ وكىلدەرى قاتىستى.

مىسال ءۇشىن ايتساق, ورال قالاسىندا مەملەكەتتىك قىزمەتتەر كورسەتۋ ساپاسىن جوعارىلاتۋ بو­يىنشا ۇەۇ قىزمەتتەرىنىڭ بازالىق تۇسىنىكتەرىمەن تانى­سۋعا كوم­مەرتسيالىق ەمەس ۇيىم­داردىڭ 26 تىڭداۋ­شى­سى قاتىستى. سەميناردىڭ ترەنەرى رە­تىن­دە «ادىلەت» كونسالتينگتىك كوم­پانيا­سىنىڭ باس ساراپشىسى ا.بيسەنوۆا تارتىلدى.

سەميناردا اقپاراتتى بەرۋ مەن قا­بىلداۋدىڭ ءتۇرلى پىشىندەرى: تۇساۋكەسەر, ماسەلەلەردى تالقى­لاۋ, توپتارداعى جۇمىس, ءمىن­دەتتەردى شەشۋ بويىنشا ترەنينگتەر پايدالانىلدى. شارا قورىتىندىلارى بويىنشا بارلىق تىڭداۋشىلار «قوعامدىق مونيتورينگ» جوباسىنا بەلسەندى قاتىسۋعا تىلەك ءبىلدىردى. بقو ازاماتتىق اليانسىنىڭ وكىلدەرى مەملەكەتتىك قىزمەتتەر كورسەتۋ ساپاسىن باعالاۋ بويىنشا­ بىرلەسكەن جوبالار جاساۋ ۇسى­نىسىمەن شىقتى.

كوكشەتاۋ قالاسىنداعى №4 ورتا مەكتەپ بازاسىندا دا «مەملەكەتتىك قىزمەتتەر كور­سەتۋ ساپاسىنا مونيتورينگ ءجۇر­گىزۋدە ۇەۇ-لاردىڭ ءرولى» دەگەن تاقىرىپتا سەمينار ءوتتى. وعان ءوڭىر­دەگى جەتەكشى ۇەۇ-لاردىڭ جەتەكشىلەرى مەن قىزمەتكەرلەرى – بارلىعى 30 ادام قاتىستى.

اقپاراتتىق جانە وقىتۋ باعىت­تارىنان باسقا, سەمينار پراكتيكالىق سيپاتقا دا يە بولدى. ل.سەڭگىرباەۆا («توميريس» ايەل­دەر­دىڭ جاستار ورتالىعى), ا.ءامىروۆا («بو­لاشاق» قوعام­دىق قورى) سەكىلدى بەلسەندى قا­تى­سۋشىلار اتالعان باعىتتاعى جۇ­مىس ءتا­جىريبەلەرىمەن ءبولىستى. ولار بۇگىندە ۇەۇ-لاردىڭ قىز­مەتتەر كورسەتۋدىڭ ساپاسىن باقى­لاۋدا قانداي تەتىكتەرگە جۇگىنۋگە بولاتىنى تۋرالى اڭگىمەلەدى.

سەمينار اياقتالعان سوڭ بارلىق قاتى­سۋشىلار مەملەكەتتىك قىز­مەتتەر كورسەتۋلەر ساپاسىنا با­قىلاۋدى ۇيىمداستىرۋ بويىنشا مەملەكەتتىك ورگاندارمەن ءوزارا ءىس-قيمىل تەتىگىن جاساۋ قاجەت دەگەن ورتاق پىكىرگە كەلدى.

قاراعاندىدا وتكەن سەمينار باعدارلا­ماسى بويىنشا «مەم­لەكەتتىك قىزمەتتەردىڭ رەەسترى», «الۋشىلارعا جاپپاي سۇراۋ سالۋ», «فوكۋس-توپتار» تاقىرىپتارىندا پراكتيكالىق وقۋلار ۇيىم­داس­تىرىلىپ, «قىزمەتتەر كورسەتۋدى قالاي باعالاۋعا بولادى», «ۇەۇ قىزمەتتەر ساپالارىن باعا­لاۋدىڭ مۇمكىندىكتەرى مەن شەكتەۋلەرى» دەگەن تاقىرىپتار بويىنشا تەوريالىق ءىس-قيمىل ماسەلەلەرى قاراستىرىلدى. سون­داي-اق, قاراعاندىداعى شارا ايا­سىندا جاڭا زاڭ جوباسىن قول­داۋعا ارنالعان فلەش-موب ۇيىم­داستىرىلدى.

قوستاناي قالاسىندا وتكەن سەميناردا مەملەكەتتىك قىزمەتتەر قالاي باعالاناتىن بولادى دەگەن ساۋالعا قاتىستى ماسەلەلەر تۋىندادى. كەيىن بەلگىلى بولعانىنداي, ءار وڭىردە مەملەكەتتىك قىزمەت كورسەتۋدىڭ ءوز ۇلگى-قالپى بار بولسا, باسقالارى سول بەلگىلى ءبىر وڭىردىكىنە سايكەس كەلۋى ءتيىس ەكەن. ۇەۇ-لار وسى ۇيلەسپەۋشىلىكتى شەشۋدىڭ جولدارىن جان-جاقتى قاراستىردى.

ۇەۇ وكىلدەرىنە ماڭعىستاۋ وبلىسىندا وتكەن سەمينار نە بەردى؟ بۇل سۇراققا «ماڭعىستاۋ وبلىسى ازاماتتىق اليانسىنىڭ» پرەزيدەنتى ج.ماحانبەتوۆا جاۋاپ بەرۋگە ۇمتىلدى. «ۇەۇ وكىلدەرى ءۇشىن مۇنداي ترەنينگ­تەر قازاقستاننىڭ بارلىق ءوڭىر­لەرىندە وتكىزىلۋدە. قاتى­سۋشىلارعا مەملەكەتتىك قىز­مەتتەر كورسەتۋدىڭ «ستاتۋسى» مەن «رەەسترى» ۇعىمدارى ءتۇسىندىرىلدى.

ءوز كەزەگىندە «شىعىس قا­زاق­­ستان وبلىسى ازاماتتىق اليانسىنىڭ» پرەزيدەنتى و.چەر­نى­­شوۆ بۇگىندە كوپتەگەن ۇەۇ وكىل­دەرى مەملەكەتتىك قىزمەت دەگەن نە نارسە جانە وسى قىزمەتتەردى باعالاۋدا ۇەۇ-لار­دىڭ ءرولى قان­داي دەگەن ماسەلەلەردى تۇپكى­لىكتى تۇسىنبەيتىندىكتەن, وسىنداي سەمينار­لار وتكىزۋ اسا قاجەت دەپ ەسەپتەيدى. «اتال­عان ۇدەرىسكە, سونداي-اق, اۋىلدىق ۇەۇ-لار وكىلدەرىن دە بەلسەندى تارتۋ كەرەك دەپ ەسەپتەيمىن», دەپ اتاپ ءوتتى ولەگ ۆلاديميروۆيچ.

اقتوبەلىك ۇەۇ وكىلدەرى دە مەملەكەتتىك قىزمەتتەر كورسەتۋگە قوعامدىق مونيتورينگ جۇرگىزۋدىڭ قىر-سىرىن مەڭگەرۋگە ۇمتىلدى. «ءبىز, مىسال ءۇشىن, ۇكىمەتتىڭ ەلەك­تروندىق سايتىنا كىرىپ, 500 قىزمەتتىڭ كەز كەلگەنىن تاڭ­داپ الۋعا جانە ونىڭ ساپاسىن باعالاۋعا تىرىستىق. ونى جۇمىسسىزداردىڭ ا نىق­تاما الۋلارىنان باستادىق. سايتتا ونى الۋدىڭ ءتارتىبى – مەرزىمى, ۇلگىسى, شارتى كورسەتىلگەن ەكەن. مۇنىمەن قوسا, ادام انىقتاما الۋعا كەلگەن حقو-نىڭ كۇتۋ زالىن­دا ورىندىق بار ما, كۇتۋشىلەر وزدە­رىن قالاي سەزىنەدى, قۇجات الۋ ءۇشىن ولار بەلگىلەنگەن 10 مينۋت پا الدە ودان كوپ ۋاقىت جۇمساي ما دەگەن ماسەلەلەرگە نازار اۋدارۋ قاجەت بولدى. وسىنىڭ ءبارىن باعام­داي كەلە, كەز كەلگەن قاتىسۋشى ءوز ۇسىنى­سىن ەنگىزە الادى», دەيدى اقتوبە وبلىسى ۇەۇ قاۋىمداستىعىنىڭ ديرەكتورى ا.دۇيسەنوۆا.

وقۋدان وتكەن بارلىق قاتىسۋشىلار قابىلدانعان «مەملەكەتتىك قىزمەتتەر كورسەتۋ تۋرالى» زاڭ تۇرعىندارعا قىزمەتتەر كورسەتۋ بويىنشا مەملەكەتتىك ورگاندار جۇمىسىنىڭ ساپاسىن ارتتىرۋ باعىتىندا ماڭىزدى قادام بولىپ تابىلدى دەگەن ورتاق پىكىرگە كەلدى.

ەسكە سالا كەتسەك, «مەملەكەتتىك قىز­مەت­تەر كورسەتۋ تۋرالى» زاڭعا مەملەكەت باسشىسى ۇستىمىزدەگى جىلدىڭ 15 ساۋىرىندە قول قويعان بولاتىن. زاڭ مەملەكەتتىك قىز­مەت­تەر كورسەتۋدىڭ ءتارتىبىن ايقىنداۋدى, «مەملەكەتتىك قىز­مەت» دەگەنگە جاڭا ءتۇ­سىنىكتى, مەم­لەكەتتىك قىزمەتتى تۇتىنۋ­شى­لار­دىڭ قۇقىعىن زاڭنامالىق رەگلا­مەنت­تەۋدى, سونداي-اق, قىزمەتتەر كورسەتۋدىڭ سا­پاسىنا قوعامدىق مونيتورينگ جۇرگىزۋدى قاراستىرادى.

بۇگىندە مەملەكەتتىك قىزمەتتەر رەەسترىندە 574 اتاۋ بار. رەەستر قۇرىلعان 2010 جىلدان بەرى مەملەكەتتىك قىزمەتتەر كورسەتۋ سانى ءۇش ەسەگە جۋىق ءوستى. مىنە, ناق سوندىقتان كوممەرتسيالىق ەمەس ۇيىمداردىڭ ءرولى ارتىپ, مەملەكەتتىك قىزمەتتەر كورسەتۋ ساپاسىنا قوعامدىق مونيتورينگ جۇرگىزۋ مۇمكىندىگىن زاڭنامالىق قامتاماسىز ەتۋ قاجەتتىگى تۋىنداپ وتىر.

زاڭنىڭ جاڭالىعى ۇسىنىلعان قىزمەتتەر ساپاسىنا, ولاردىڭ مەرزىمى مەن ۇلگى-قالىپتارىنىڭ ساقتالۋىنا قوعامدىق باقى­لاۋ جۇرگىزۋ مۇمكىندىگى بو­لىپ تابىلادى. ويتكەنى, ورتا ستا­تيس­تيكالىق قازاقستاندىق ءۇشىن مەملەكەتتىك قىزمەتتەر كورسەتۋدىڭ ساپاسى مەملەكەت جۇمىسىنىڭ باستى كورسەتكىشى سانالادى. ءما­سە­لەن, ەگەر ادام قانداي دا ءبىر انىق­تاما نەمەسە قۇجات الۋ ءۇشىن ءوزىنىڭ ەشقانداي اقىلعا قونبايتىن ۋاقىتىن سارپ ەتسە, مەملەكەتتىك ماشينا جۇمىسىن باعالاۋ, تۇتاستاي العاندا, جاعىم­سىز بولىپ شىعاتىنى ايتپاسا دا تۇسىنىكتى. بۇدان بولەك, قىز­مەتتەر كورسەتۋدىڭ ناقپا-ناق ۇلگى-قالىپتارى جوق بولسا, جەم­قورلىق قۇقىق بۇزۋشىلىق كورى­نىس­تەرىنىڭ ىقتيمالدىلىعى ارتاتىنى تاعى انىق. ال بۇل ءوز كەزە­گىندە كورسەتىلەتىن قىزمەتتىڭ ساپا­سىن تومەندەتىپ قانا قويماي, تۇتاس­تاي العاندا, ازاماتتاردىڭ مەم­لەكەتتىك اپپاراتقا سەنىمىن جوعالتادى.

مەملەكەتتىك قىزمەتتەر ساپاسىنا باقىلاۋدى تەك كوم­مەرتسيالىق ۇيىمدار عانا ەمەس, سونداي-اق, مەملەكەتتىك قىز­مەت ىستەرى جونىندەگى اگەنتتىك پەن كولىك جانە كوممۋني­كا­تسيالار مينيسترلىگى دە جۇزەگە اسىراتىنىن اتاپ ءوتۋ قاجەت.

زاڭناماعا سايكەس, كوممەرتسيالىق ەمەس ۇيىمدار مەملەكەتتىك قىزمەتتەر كورسەتۋدىڭ قوعامدىق مونيتورينگىن ءوز ەسەبىنەن جانە ءوز باستاماشىلىعى بويىنشا دا جۇرگىزە الادى. سونداي-اق, مەملەكەتتىك قىزمەتتەر كورسەتۋدى باعالاۋ مەن باقىلاۋعا وكىلەتتى ورگان مەملەكەتتىك الەۋمەتتىك تاپسىرىس اياسىندا مونيتورينگكە كوممەرتسيالىق ەمەس ۇيىمداردى تارتۋعا دا قۇزىرلى. مەملەكەتتىك قىزمەت ىستەرى جونىندەگى اگەنتتىكتىڭ 2014 جىلعى بيۋدجەتىنە قازىردىڭ وزىندە مەملەكەتتىك الەۋمەتتىك تاپسىرىس اياسىندا مەملەكەتتىك قىزمەتتەر كورسەتۋدىڭ ساپاسىنا مونيتورينگ جۇرگىزۋگە كوممەرتسيالىق ەمەس ۇيىمداردى تارتۋ ءۇشىن قارجى رەسۋرستارى سالىناتىنى جوسپارلانىپ وتىر.

تۇتاستاي العاندا, «مەملەكەت­­تىك قىزمەتتەر كورسەتۋ تۋرالى» زاڭنىڭ قا­بىلدانۋى مەملەكەتتىك قىزمەتتەر كورسە­تۋدىڭ ورتاق تالاپتارى مەن تارتىپتەرىن زاڭنامالىق تۇرعىدان بەكىتۋگە, قىزمەتتەر كورسەتۋ سالاسىندا مەملەكەتتىك ورگان­دار­دىڭ مىندەتتەرىن ناقتى بەلگىلەۋگە, قا­زاقستان ازاماتتارىنا مەملەكەتتىك قىزمەت كورسەتىلەتىن كەز كەلگەن ورىندا ءوز مونيتورينگىنە باستاماشىلىق جاساۋعا مۇمكىندىك بەرەدى. سەبەبى, مەملەكەتتىك قىز­مەتتەر كورسەتۋدە ازاماتتاردىڭ مۇددەلەرىن ءتيىس­­تى دەڭگەيدە قاپەرگە الۋ باس­تى شارت – مەملەكەتتىك ورگاندار جۇمىسىنىڭ مولدىرلىگى مەن ازاماتتاردىڭ تولىققاندى اق­پاراتتاندىرىلۋى جاعدايىندا مۇمكىن بولماق.

ساۋلەبەك ءبىرجان.

استانا.