ەلوردانىڭ «استانا» فۋتبول كلۋبى ەۋروپا ليگاسىنىڭ توپتىق كەزەڭىندەگى سوڭعى ويىنىن بەلگرادتا جەرگىلىكتى «پارتيزان» كومانداسىنا قارسى وتكىزىپ, 4:1 ەسەبىمەن جەڭىلىپ قالدى. بۇل «استانا» ءۇشىن وسى ماۋسىمداعى سوڭعى ويىن بولاتىن.
كەزدەسۋدىڭ ءبىرىنشى تايمىندا «پارتيزان» كومانداسىنان سۋما سەيدۋبا, ۋمار ساديك, تاكۋما اسانو مەرگەندىگىمەن كوزگە تۇسسە. ەكىنشى تايمدا ۋمار ساديك دۋبل اۆتورى اتانىپ, ويىننىڭ نۇكتەسىن قويدى. ال «استانا» ساپىنان دورين روتاريۋ الاڭ يەلەرىنىڭ 4 گولىنا 1 گولمەن جاۋاپ قاتتى. وسىلايشا, ەلوردا كومانداسى بيىلعى ەۋروماۋسىمدى جەڭىسپەن باستاپ, جەڭىلىسپەن اياقتادى. ەستەرىڭىزدە بولسا, «استانا» شىلدە ايىندا رۋمىنيانىڭ چفر كلۋج كومانداسىن 1:0 ەسەبىمەن جەڭىپ, ەۋرودودانى ءساتتى باستاعان بولاتىن.
توپتىق كەزەڭدە التى ويىن وتكىزگەن «استانا» بەس ويىندا قارسىلاستارىنا ەسە جىبەرىپ, نەبارى ءبىر-اق ويىندا جەڭىسكە جەتتى. ءۇش ۇپاي جيناعان جەرلەستەرىمىز توپتا ەڭ سوڭعى ورىندى يەلەندى. ال «مانچەستەر يۋنايتەد» پەن از كومانداسى ءبىرىنشى جانە ەكىنشى ورىنمەن ەۋروپا ليگاسىنىڭ 1/16 كەزەڭىنە شىقسا, ءۇشىنشى ورىن العان «پارتيزان» مەن «استانا» ەۋروپاداعى جورىعىن اياقتادى.