قازاق كۇرەسىنىڭ حالىقارالىق دەڭگەيدەگى مارتەبەسىن كوتەرۋ ىسىندە سوڭعى جىلدارى قازاق كۇرەسىنىڭ حالىقارالىق فەدەراتسياسى تولايىم تابىستارعا قول جەتكىزىپ كەلەدى. سونىڭ ناتيجەسىندە سپورتتىڭ وسى ءتۇرى بويىنشا حالىقارالىق تۋرنيرلەر, الەم جانە ەۋروپا چەمپيوناتتارى جۇيەلى تۇردە وتكىزىلىپ ءجۇر. ال بيىل قكحف مۇرىندىق بولعان قازاق كۇرەسىنەن وتكىزىلگەن الەم چەمپيوناتى تاۋەلسىزدى كۇنىمەن تۇسپا-تۇس كەلىپ وتىر. كەشە قازاق كۇرەسى بويىنشا اقتوبە قالاسىندا جالاۋى كوتەرىلگەن الەم چەمپيوناتىنا 40-تان استام ەلدىڭ پالۋاندارى كەلىپ, بەلدەسۋدى باستاپ كەتتى.
ءدۇبىرلى دودادا 8 سالماق دارەجەسى بويىنشا كۇش سىناسۋ بەلگىلەنگەن. مۇنداعى تورەشىلەر القاسىنىڭ قۇرامى 20 ادامنان تۇرادى. ونىڭ سەگىزى تاياۋ جانە الىس شەت ەلدەردەن كەلگەن قازاق كۇرەسىن باعالاي الاتىن بىلگىرلەر بولسا, ون ەكىسى ءوز ەلىمىزدە جاساقتالعان تورەشىلەر. تاعى ءبىر اتاپ وتەرلىك جايت, اقتوبەدە الەم چەمپيوناتىندا قازىلار القاسىنىڭ قۇرامىنا قازاق كۇرەسىنىڭ تاريحىندا تۇڭعىش رەت ايەل ادامنىڭ تارتىلعانى.
جارىستىڭ باس تورەشىسى, حالىقارالىق دەڭگەيدەگى سپورت شەبەرى ەربول مىرزابوسىنوۆتىڭ ايتۋىنشا, اقتوبەدە باستالعان الەم چەمپيوناتىندا ونىڭ جۇلدەگەرلەرى مەن جەڭىمپازدارىنا التىن, كۇمىس جانە قولا مەدالدار تاپسىرىلۋىمەن بىرگە, قكحف-نىڭ شەشىمىنە سايكەس شىنايى شەبەرلىك پەن تەحنيكالىق تۇرعىدان ءوزىن-ءوزى جاقسى كورسەتە بىلگەن ادەمى ءادىس-تاسىلدەرى ارقىلى جانكۇيەرلەردىڭ قوشەمەتىنە بولەنگەن, ءارى جەڭىسكە ۇمتىلىس تانىتقان پالۋاندارعا ارنايى اتالىمدار تاعايىندالعان. سونىمەن بىرگە اتالعان الەم چەمپيوناتىنا شەڭبەرىندە حالىقارالىق دەڭگەيدەگى سەمينار كەڭەس وتكىزىلىپ, مۇندا ءادىل قازىلار القاسى مۇشەلەرى مەن قازاق كۇرەسىنىڭ جاناشىرلارى سپورتتىڭ وسى ءتۇرىنىڭ كوكجيەگىن كەڭەيتۋ, بولاشاعىن بارلاۋ جانە ونىڭ حالىقارالىق مارتەبەسىن ودان ءارى كوتەرۋ, سونداي-اق ونى كەلەشەكتە وليمپيادا ويىندارىنىڭ تىزىمىنە ەنگىزۋ جونىندە ءوز وي-پىكىرلەرىن ورتاعا سالدى.
اقتوبەدەگى الەم چەمپيوناتىنىڭ سيمۆوليكاسى – قىزعالداقپەن ارلەنگەن. قر تۇڭعىش پرەزيدەنتى – ەلباسى نۇرسۇلتان نازارباەۆتىڭ « ۇلى دالانىڭ جەتى قىرى» ماقالاسىندا كورسەتىلگەندەي, قىزعالداق قازاق دالاسىنىڭ باعا جەتپەس تابيعي قۇندىلىعى مەن كوركى ەكەنى ءمالىم. ال چەمپيونات لوگوتيپىنىڭ دوڭگەلەك پىشىندەس بولىپ بەدەرلەنۋى, جارىستىڭ بيىك دەڭگەيى مەن جاھاندىق سيپاتىن بىلدىرمەك. ءسوز سوڭىندا حالىقارالىق مارتەبەنى يەلەنگەن قازاق كۇرەسى ۇيىمى تەك سوڭعى ەكى جىلدىڭ ىشىندە ەكى الەم چەمپيوناتى مەن ەۋروپا چەمپيوناتىن ۇيىمداستىرۋعا باستاماشى بولعانىن ايتقىمىز كەلەدى.
الەم چەمپيوناتىنىڭ اشىلۋ ءراسمى كەزىندە وعان الەمنىڭ تۇپكىر-تۇپكىرىنەن كەلگەن پالۋاندار مەن تورەشىلەر جانە قازاق كۇرەسىنىڭ جاناشىرلارىن اقتوبە وبلىسىنىڭ اكىمى وڭداسىن ورازالين مەن قازاق كۇرەسى فەدەراتسياسىنىڭ پرەزيدەنتى قانات بوزىمباەۆ قۇتىقتاپ, وعان قاتىسۋشىلاردىڭ بارىنە ءسات-ساپار تىلەپ, اقتوبەدە الەم چەمپيوناتىن وتكىزۋ ءۇشىن بارلىق قاجەتتى جاعدايلار تۋعىزىلعانىن اتاپ كورسەتتى.
سوندان سوڭ پالۋاندار بەلدەسۋى باستالىپ كەتتى. كەشە 55, 60, 90 جانە 100 كگ سالماقتاعى پالۋاندار كۇش سىناسىپ, وسى تارتىس ۇستىندە جاۋىرىنى جەرگە تيمەي, تەحنيكالىق شەبەرلىك ۇلگىسىن تانىتقاندار فينالعا جولداما الدى. بۇدان ءارى كەشە بەس سالماق دارەجەسى بويىنشا الەم چەمپيوندارى انىقتالىپ, جەڭىمپازدار جەڭىس تۇعىرىنا كوتەرىلدى.
ەرتەڭ اقتوبە قالاسىندا ءوتىپ جاتقان ادەم چەمپيوناتى ودان ءارى جالعاسادى.
اقتوبە