ەلوردادا «دەنيستىڭ دوستارى» مۇز شوۋى ءوتتى. زال كورەرمەندەرگە لىق تولى بولدى. قىسقا دا جارقىن عۇمىرى ەرتە سونگەن دەنيس تەننىڭ دوستارى باس قوستى.
بۇل جولى شوۋ قوناقتارى رەتىندە ەكى دۇركىن وليمپيادا چەمپيونى بولعان تاتيانا ۆولوسوجار مەن ماكسيم ترانكوۆ, الەم چەمپيوناتىنىڭ ءۇش دۇركىن جۇلدەگەرلەرى كەيتلين ۋيۆەر مەن ەندريۋ پوجە سىندى تانىمال سپورتشىلار قاتىستى دەلىنگەن تاراتىلعان اقپاراتتا.
وليمپيادا ويىندارىنىڭ قولا جۇلدەگەرى, ايگىلى مانەرلەپ سىرعاناۋشى كوزى تىرىسىندە ءجيى ۇيىمداستىراتىن «دەنيستىڭ دوستارى» اتتى مۇز شوۋى ءوز جالعاسىن تاۋىپ, كورەرمەندەرىن قۋانىشقا بولەدى.
تالانتتى سپورتشى دەنيس تەن جانكۇيەرلەرى الدىندا ارنايى ونەر كورسەتۋدى يگى داستۇرگە اينالدىرعان بولاتىن. ارىپتەس دوستارىن دا شاقىرىپ, ەلىمىزدە مانەرلەپ سىرعاناۋ سپورتىنىڭ دامۋىنا ۇلەس قوستى.
كەشەگى كەشتە اقش, رەسەي, كانادانىڭ بەلگىلى مانەرلەپ سىرعاناۋشىلارى كوپشىلىكتى اسەرلى قويىلىمدارىمەن ءتانتى ەتتى.
ايتا كەتەيىك, دەنيس تەن 2018 جىلى 19 شىلدەدە اۆتوكولىك ۇرىلارىنىڭ قۇربانى بولىپ, وقىستان قازا تاپقان ەدى.