تاۋەلسىزدىك كۇنى قارساڭىندا پەتروپاۆل قالاسىنىڭ پوليتسيا باسقارماسىندا «ۇزدىك قىزمەتكەر» كونكۋرسى وتكىزىلدى.
كونكۋرستىڭ ماقساتى - پوليتسيا قىزمەتكەرلەرى اراسىندا مەملەكەتتىك ءتىلدىڭ مارتەبەسى مەن ماڭىزىن ارتتىرۋ جانە مەملەكەتتىك ءتىلدى كەڭىنەن ناسيحاتتاۋ, پوليتسيا قىزمەتكەرلەرىنىڭ ءيميدجىن كوتەرۋ, ءتارتىپ ساقشىلارىنىڭ بويىندا وتانىنا, ەلىنە, جەرىنە, تىلىنە دەگەن سۇيىسپەنشىلىك, ماقتانىش سەزىمىن ارتتىرۋ, تىلدىك ورتانى قالىپتاستىرۋ جانە ءتىل مادەنيەتىنە تاربيەلەۋ.
ءار بولىنىستەن قاتىسقان قىزمەتكەرلەر كونكۋرستىڭ شارتى بويىنشا وزدەرىنىڭ تاپقىرلىقتارىن, مەملەكەتتىك تىلدە ءوز ويلارىن اسەرلى جانە انىق جەتكىزە بىلەتىندىكتەرىن, سويلەۋ مادەنيەتىن, سونداي-اق, ونەرگە بەيىمدىلىگىن كورسەتتى. قاتىسۋشىلار الدىمەن سالەمدەسىپ, ولەڭ, بەينەفيلم ارقىلى وزدەرىن تانىستىردى. ەكىنشى جارىس «ينتەللەكتۋالدىق سۇراقتار» دەپ اتالىپ, بۇل كەزەڭدە قاتىسۋشىلار نورماتيۆتىك قۇقىقتىق اكتىلەر, قازاقتىڭ سالت-داستۇرلەرى, ماقال-ماتەلدەرىنەن بەرىلگەن سۇراقتارعا جاۋاپ بەردى. «شابىت جۇلدىزى» اتانعان ءۇشىنشى جارىستا پوليتسەيلەر قازاقتىڭ حالىق اندەرىن, بۇگىنگى تاڭداعى زاماناۋي اندەردى ورىنداپ, بي بيلەپ, كۇي تارتىپ, قازاق تىلىندەگى قوركەم شىعارمالارعا تەاترلاندىرىلعان ينتەرپرەتاتسيالار جاسادى.
ءۇش كەزەڭنەن تۇرعان وسى سايىستا ءبىرىنشى ورىندى كريمينالدىق پوليتسيا ءبولىمىنىڭ جەدەل ۋاكىلى, پوليتسيا لەيتەنانتى جەڭىسگۇل بەيسەمبينا الدى ال ەكىنشى جانە ءۇشىنشى ورىنداردى يۋۆەنالدىق پوليتسيا بولىمشەسىنىڭ ۋچاسكەلىك پوليتسيا ينسپەكتورى, پوليتسيا كاپيتانى ايگەرىم اۋباكىروۆا مەن ارنايى قابىلداعىشتىڭ پوليتسەيى, اعا سەرجانت ءادىل زيكرين الدى. «ونەرلى قىزمەتكەر» نوميناتسياسىن جەرگىلىكتى پوليتسيا قىزمەتى ءبولىمىنىڭ ۋچاسكەلىك پوليتسيا ينسپەكتورى, پوليتسيا لەيتەنانتى زارينا ەلۋباەۆا, ال «سوزگە ۇستا-ويعا شەبەر» نوميناتسياسىن شتاب ءبولىمىنىڭ اعا ينسپەكتورى, پوليتسيا كاپيتانى اياگوز يسماعامبەتوۆا جەڭىپ الدى. جەڭىمپازدار العىس حاتتار جانە باعالى سىيلىقتارمەن ماراپاتتالدى.
قالالىق پب باستىعى, پوليتسيا پولكوۆنيگى جاندوس مۇقاتوۆ بارلىق قاتىسۋشىلاردى تاۋەلسىزدىك كۇنى مەرەكەسىمەن قۇتتىقتاپ, قىزمەتكەرلەردىڭ تىلگە, اتا داستۇرگە, ۇلتتىق قۇندىلىقتارعا دەگەن قۇرمەتى ەرەكشە قۋانتادى دەپ اتاپ ءوتتى. «بۇگىنگى كونكۋرسقا قاتىسقان قىزمەتكەرلەر بىلىمدەرى مەن ونەرلەرىن ورتاعا سالىپ, وزدەرىن جاڭا قىرلارىنان تانىتتى. پوليتسەيلەر سپورتپەن شۇعىلدانۋمەن قاتار, وزدەرىنىڭ بىلىمدەرى مەن قابىلەتتەرىن وسىلاي, جان-جاقتى جەتىلدىرۋى ءتيىس», - دەدى باسقارما باسشىسى.
قىزىلجار