16 جەلتوقسان – اتا بابامىزدىڭ اسقاق ارمانى ورىندالىپ, جاسامپازدىعىمىز جاڭا بەلەسكە كوتەرىلگەن تاۋەلسىزدىك كۇنى. مەرەكەگە وراي الماتى اۋداندارى مەرەكەلىك شارالار ۇيىمداستىرىپ, ءار اۋداننىڭ قۇرمەتتىلەرى ماراپاتتاۋلارعا يە بولدى.
بۇل شارالار «رۋحاني جاڭعىرۋ» مەملەكەتتىك باعدارلاماسى شەڭبەرىندە ۇيىمداستىرىلدى.
مەيرام قارساڭىندا جەتىسۋ اۋدانىندا جەرگىلىكتى اكىمدىك قالانىڭ دامۋىنا ۇلەسىن قوسۋشىلارعا العىس حاتتار مەن ارنايى مەدالدار تابىستادى. ال ع. مۇسىرەپوۆ اتىنداعى قازاق مەملەكەتتىك بالالار مەن جاسوسپىرىمدەر تەاترىندا وتكەن شارادا ارنايى قويىلىم قويىلدى.
«بارشاڭىزدى شىن جۇرەكتەن قۇتتىقتايمىن! زور دەنساۋلىق, مول بايلىق, قاجىماس قايرات تىلەيمىن. بۇگىن ءبىز جەتىسۋ اۋدانىنىڭ عابيت مۇسىرەپوۆ اتىنداعى ءجاسوسپىرىم تەاترىندا ۇلكەن سالتاناتتى ءىس-شارا وتكىزىپ, قۇتتىقتادىق», - دەدى الماتى قالاسى جەتىسۋ اۋدانى اكىمىنىڭ ورىنباسارى ۆياچەسلاۆ ۆاۆيلين.
سونداي-اق تاۋەلسىزدىك مەرەكەسىن ناۋرىزباي اۋدانىنىڭ تۇرعىندارى دا اتاپ ءوتتى. مەرەكەلىك كونتسەرتتە ەسترادا جۇلدىزدارى ءان سالىپ, اسەرلى كۇيلەر شەرتىلدى جانە تاۋەلسىزدىك تاريحىنان سىر شەرتكەن بەينەروليكتەر كورسەتىلدى. مۇندا قالا دامۋىنا قوسقان مول ۇلەسى ءۇشىن اۋداننىڭ مەملەكەتتىك قىزمەتكەرلەرى, ءبىلىم جانە مەديتسينا سالاسىنىڭ وكىلدەرى مەن بەلسەندىلەرى, كاسىپكەرلەرى اۋدان اكىمىنىڭ قۇرمەت گراموتاسىمەن جانە العىس حاتتارىمەن ماراپاتتالدى.
مەرەكەلىك شارا قالامىزدىڭ اۋەزوۆ اۋدانى اكىمدىگىنىڭ ۇيىمداستىرۋىمەن دە ناتاليا ساتس اتىنداعى مەملەكەتتىك اكادەميالىق بالالار مەن جاسوسپىرىمدەر تەاترىندا جالعاسىن تاپتى. مەملەكەتتىك انۇرانمەن باستاۋ العان سالتاناتتى شارادا اۋدان اكىمدىگىنىڭ باسشىلارى تۇرعىنداردى مەرەكەمەن قۇتتىقتاپ, قوعام قايراتكەرلەرىن, مەملەكەتتىك قىزمەتكەرلەردى, ارداگەرلەردى جانە جەلتوقسان وقيعاسىنا قاتىسۋشىلاردى قۇتتىقتادى.
«كوك تۋىمىز ەشقاشان تومەندەمەسىن, قازاق ءتىلى دامي بەرسىن. تاۋەلسىزدىك العان ەلدەر ىشىندەگى مىقتى, بەدەلدى مەملەكەتى بولسىن», - دەدى «جەلتوقسان» وقيعاسىنىڭ قايراتكەرى جاندوس ىرىسباەۆ.
الماتى