«ەلىمىز ءۇشىن باستى مەرەكە تاۋەلسىزدىك كۇنى قارساڭىندا «الماتى - 2050» دامۋ ستراتەگياسى رەسمي تۇردە قابىلداندى. ماڭىزدى تاريحي قۇجاتتى قالالىق ءماسليحات دەپۋتاتتارى ماقۇلدادى دەپ حابارلايدى الماتى قالاسى اكىمدىگى ءباسپاسوز قىزمەتى.
الداعى 30 جىلدا الماتى جاڭا ەكونوميكا, كەڭىستىك جانە كوممۋنيكاتسيالار اتتى ءۇش نەگىزگى پرينتسيپ نەگىزىندە داميتىن بولادى. سونداي-اق كەزەكتى وتىرىستا حالىق قالاۋلىلارى 2020 جىلعى قالا بيۋدجەتىن ماقۇلدادى.
الماتى – قۋاتتى بيزنەستىڭ, بەلسەندى ازاماتتىق قوعام مەن تەڭ مۇمكىندىكتەردىڭ قالاسى. ال باستى بايلىعى – حالقى. قالانىڭ الداعى 30 جىل ىشىندەگى دامۋ جوسپارى تاپتىشتەپ جازىلعان قۇجات قاراشا ايىندا حالىققا تانىستىرىلدى. سودان بەرى 1000-نان استام ادام ءوز پىكىرىن ايتقان.
كۇنى كەشە عانا وتكەن ۋربان فورۋمدا الىپ شاھار باسشىسى باقىتجان ساعىنتاەۆ كوپشىلىك الدىندا «الماتى - 2050» ستراتەگياسىنىڭ سوڭعى نۇسقاسىن تانىستىرعان ەدى.
«قالا تۇرعىندارىنىڭ الماتىعا بەيجاي قارامايتىنى قۋانتادى. ستراتەگيانى ازىرلەۋگە مەملەكەتتىك قۇرىلىمدار, تۇرعىندار جانە ماماندار بەلسەندى اتسالىستى. ءبىز قۇجاتتى جاريالاعان ءبىر اي ىشىندە حالىقتان مىڭنان اسا ۇسىنىس ءتۇستى. ولاردى باعىتتار بويىنشا ءبولىپ, 100-دەن استامىن ستراتەگياعا قوستىق. ەندى حالىقتى الاڭداتقان ماسەلەلەر قۇجاتتا كورىنىس تابادى. كومەك كورسەتكەندەرىڭىز ءۇشىن العىسىمدى بىلدىرەمىن», - دەدى الماتى قالاسىنىڭ اكىمى باقىتجان ساعىنتاەۆ.
بيىل الماتى بارلىق الەۋمەتتىك ەكونوميكالىق كورسەتكىشتەر بويىنشا وڭ ديناميكانى كورسەتتى. وسىنىڭ ءوزى ءومىر مەن جۇمىس ءۇشىن تارتىمدى جاھاندىق قالا ەكەنىن ايقىندايدى. الماتىنى دامىتۋعا 2020 جىلى 738 ميلليارد تەڭگە جۇمساۋ جوسپارلانىپ وتىر. بۇل وتكەن جىلمەن سالىستىرعاندا 37 پايىزعا كوپ. اسىرەسە, كەلەسى جىلى ءبىلىم, دەنساۋلىق ساقتاۋ سالالارى جانە قوعامدىق ينفراقۇرىلىمدى جاقسارتۋعا قارجى كوبىرەك بولىنەدى. ماسەلەن, ءبىلىم سالاسىنا 280 ميلليارد تەڭگە, دەنساۋلىق ساقتاۋعا 7,7 ميلليارد, ال الەۋمەتتىك سالاعا 26 ميلليارد تەڭگە جۇمسالادى دەپ كوزدەلگەن.
قالالىق بيۋدجەت دامىتۋدىڭ بولجامدى پارامەترلەرىنە جانە الماتى دامۋ باعدارلاماسىنا سۇيەنە وتىرىپ جاسالدى. رەسمي دەرەكتەر بويىنشا, ءبىرىنشى جارتى جىلدىقتا جالپى وڭىرلىك ءونىمنىڭ ءوسىمى 4,1 پايىزدى قۇرادى. 11 ايدا قىسقا مەرزىمدى ەكونوميكالىق ينديكاتور 5,1 پايىزعا ءوستى. ينۆەستيتسيالار كولەمى 4,9. ونىڭ ىشىندە سىرتقى ينۆەستيتسيا 29 پايىزعا كوبەيدى. بولشەك ساۋدا 12 پايىزعا ءوستى. ونەركاسىپ 4,6 پايىزعا, كوتەرمە ساۋدا 1,5 ەسەگە ءوستى. ينفلياتسيا دەڭگەيى الماتى قالاسىندا 4,4 پايىزدى قۇرايدى. مەملەكەتتىك بيۋدجەتكە سالىق ءتۇسىمى 13,9 پايىزعا ءوستى, - دەيدى الماتى قالاسى ستراتەگيا جانە بيۋدجەت باسقارماسىنىڭ باسشىسى نۇرتاس قايىروۆ.
وسىلايشا, بيۋدجەتتى بەكىتۋگە جينالعان قالا ءماسليحاتىنىڭ دەپۋتاتتارى ءبىراۋىزدان «الماتى - 2050» ستراتەگياسىن ماقۇلدادى. سەبەبى, ماڭىزدى قۇجات قالانى ءار قىرىنان دامىتۋعا مۇمكىندىك بەرەدى. حالىقتىڭ پىكىرى ەسكەرىلىپ جاسالعان سوڭعى نۇسقادا 7 باعىتقا باسىمدىق بەرىلگەن. ونىڭ ارقايسىسىن جىلىكتەپ حالىق قالاۋلىلارىنا قالا اكىمىنىڭ ورىنباسارى ءتۇسىندىردى.
«بىرىنشىدەن, الماتى – شەتسىز قالا, وندا بارلىق اۋدان بىردەي جاقسى دامىعان جانە ءومىر ءسۇرۋ دەڭگەيى جوعارى. ەكىنشىدەن, ۇزدىك الەمدىك سمارت تاجىريبەلەردى قولداناتىن اقىلدى قالا. ۇشىنشىدەن, تەڭ مۇمكىندىكتەر قالاسى. بارلىعى ءۇشىن ينكليۋزيۆتى قالا. تورتىنشىدەن, قاۋىپسىز قالا. قاۋىپ دەڭگەيى تومەن مەگاپوليس. بەسىنشىدەن, جاسىل قالا. ءومىر ساپاسىنىڭ جاھاندىق 100 رەيتينگىسىنە كىرەتىن باۋ-باقشالى قالا. التىنشىدان, جاڭا جىبەك جولى ورتالىعىنداعى جاھاندىق ىسكەرلىك ورتالىق. جانە جەتىنشى مادەني كرەاتيۆتى قالا, ءبىلىم, يننوۆاتسيالار مەن جاڭا يندۋستريالار ورتالىعى. وسى باعدارلاردىڭ بارلىعى بولاشاقتا قالانىڭ كورىنىسىن قالىپتاستىرادى», - دەدى الماتى قالاسى اكىمىنىڭ ورىنباسارى ءىلياس وسەروۆ.
ايتا كەتەيىك, دامۋ جوسپارىن ىسكە اسىرۋ جانە ونىڭ ورىندالۋىنا مونيتورينگ جۇرگىزۋ ءۇشىن قالا اكىمدىگى جانىنان ستراتەگيالىق كەڭەس قۇرىلاتىن بولدى. ۇيىم ۇزاق مەرزىمدى جوسپاردى ىسكە اسىرۋدى قاداعالاپ, جىل سايىن اشىق ەسەپ بەرىپ تۇرادى.
الماتى
.