جەتىسۋ جەرىندە داستۇرگە اينالعان يگىلىكتىڭ ءبىرى – اۋدانداردىڭ مادەنيەت كۇندەرىن وتكىزۋ. بۇل شارا سوڭعى جىلدارى جۇيەلەنىپ, ءۇش-ءتورت اۋداننىڭ مادەنيەتكە قاتىسى بار وكىلدەرىنىڭ باسىن سول اۋدان تۇرعىندارىنا ىڭعايلى وڭىرلەردە قوسىپ وتكىزىلۋدە.
بۇل كۇنى مادەنيەت كۇندەرىن وتكىزگەن قاراساي, جامبىل, تالعار اۋداندارىنىڭ اقىن-جازۋشىلارىمەن وتكەن جارقىن جۇزدەسۋدى ساكەن سەيفۋللين اتىنداعى الماتى وبلىستىق كىتاپحاناسىنىڭ باس ديرەكتورى ماقپال نۇرعاليەۆا قورىتىندىلاپ, ءار اۋداننىڭ كىتاپحانا باسشىلارى اقىن-جازۋشىلارىنا وزىندىك سىي-سياپاتىن تارتۋ ەتتى.
ءۇش الاڭعا ءبولىنىپ قازداي تىزىلگەن سانسىز شاتىرلاردا ءۇش اۋداننىڭ مادەنيەتى مەن ونەرىنەن سىر بەرەر, وزىندىك ەرەكشەلىكتەرىن تانىتار, حالقىنىڭ بەرەكە-بىرلىگىن پاش ەتەر كورمەلەردى ارالاعان كوپشىلىك سول كورمەلەردىڭ ءبىر-ءبىر قاناتىن الا ورنالاسقان ۇلتتىق-مادەني ورتالىقتاردىڭ ءان-ءبيىن تاماشالادى. كورشىلەس, تامىرلاس, تاعدىرلاس اۋداندار تۇرعىندارىنىڭ بىرىمەن-ءبىرىنىڭ تانىسىپ-ءبىلىسۋى, اعايىنداي ارالاسۋى, ۇلگى الارلىق ۇردىسپەن ءۇن قاتىسۋى دەگەن وسىنداي-اق بولار. جاقسى ىستەرىن جاريا ەتىسىپ, ءبىر-ءبىرىنىڭ قول جەتكىزگەن جەتىستىكتەرىنە كۋا بولىسقان جۇرتتىڭ ىشىندە ارىپتەستىك بايلانىس ورناتۋعا نيەتتەنگەندەر دە, ۇلتتىق قولونەر شەبەرلەرىنىڭ قايتالانباس بىرەگەي بۇيىمدارىن سىيكادە رەتىندە ساتىپ الىپ جاتقاندارى دا كوپ بولدى. تۇرىك, ۇيعىر, سلاۆيان, كورەي, چەشەن, وزبەك, دۇنگەن, كۇرد سياقتى ۇلتتاردىڭ ءداستۇر-سالتىمەن مەرەكەگە ايشىقتى اتسالىسۋى مادەنيەت كۇنىنىڭ ءمان-ماڭىزىن اشا ءتۇستى. قاراساي, جامبىل, تالعار اۋداندارىنىڭ ەكونوميكالىق الەۋەتىن بايقاتاتىن كاسىپكەرلىك سالاسىنا دا كورمەدەن ورىن بەرىلگەن. وسى شارانىڭ اياسىندا بەلگىلى اقىن, جۋرناليست-جازۋشى, «ەگەمەن قازاقستان» گازەتى الماتى بولىمشەسىنىڭ جەتەكشىسى قورعانبەك امانجولدىڭ «الاپا» اتتى جىر جيناعىنىڭ تۇساۋكەسەر ءراسىمى وتكىزىلدى. كونە تۇركىلىك ۇعىمدا ىرىس, باق, داۋلەت دەگەن ماعىناعا يە «الاپا» اتتى جيناقپەن جۇرتشىلىقتى تانىمال اقىن, جۋرناليست مۇسا ءجانادىلوۆ تانىستىردى. سودان سوڭ بيىل 60 جىلدىق مەرەيىن اتاپ وتپەكشى قورعانبەك اقىننىڭ قاناتتاس ىنىلەرى اۆتورعا زور تەبىرەنىستى تىلەكتەرىن جەتكىزىپ, ارناۋ ولەڭدەرىن وقىدى. كەزدەسۋگە قاتىسۋشىلار الدىندا كىتابىنىڭ تۇساۋكەسەرىن وتكىزگەن مەرەي يەسى, اقىن قورعانبەك امانجول ءسوز سويلەپ, كوپشىلىككە زور ءىلتيپاتىن ءبىلدىرىپ, العىسىن ايتتى.
ءداستۇرلى شارا اۋداندار كوركەمونەرپازدارىنىڭ مادەنيەت كۇنىنە ارنايى ازىرلەگەن كونتسەرتتىك باعدارلامالارىمەن تۇيىندەلدى.
نۇربول الدىباەۆ,
«ەگەمەن قازاقستان».
الماتى وبلىسى.