ەكىباستۇز قالاسىندا «جاز-2013» قالالىق باعدارلاماسى اياسىندا ماۋسىم ايىندا «شىركىن, life - 2013» ەتنوجوباسى باستاۋ العان ەدى. جوباعا 1 500 بالالار مەن جاسوسپىرىمدەر, سونداي-اق مەكتەپ مۇعالىمدەرى, «دوستىق ءۇيىنىڭ» ەتنومادەني بىرلەستىكتەرى, قالالىق ءماسليحات دەپۋتاتتارى, مەتسەناتتار, اتا-انالار قاتىستى.
جوبانى ىسكە اسىرۋ باعدارلاماسى بويىنشا قىزىقتى, تارتىمدى ءىس-شارالار جوسپارلانىپ وتكىزىلسە, نەگىزگى ءىس-شارا «قاينار» ببك الاڭىندا ورنالاسقان جەتى ەتنومادەني بىرلەستىكتەن قۇرالعان «نۇرلى اۋىل» ەتنواۋىلىنىڭ جۇمىسى بولدى. وعان كورەي, ۋكراين, ورىس, قازاق, تاتار, چەشەن جانە نەمىس ەتنوستارىنىڭ وكىلدەرى قاتىستى.
ەتنواۋىلدىڭ اشىلۋىنا 600-دەن استام بالالار مەن جاسوسپىرىمدەر كەلدى. ولار ەتنوستاردىڭ تۇرمىسىمەن جانە سالت-داستۇرىمەن تانىسىپ, ۇلتتىق ەتنومادەني بىرلەستىكتەردىڭ وكىلدەرىمەن «ەڭ ۇزدىك فوتوسيۋجەت» سايىسىنا قاتىستى. كۇننىڭ سوڭىندا بالالار تىلەكتەر قاعازدارىنا وزدەرىنىڭ العان اسەرلەرىن جازدى.
كەلەسى كەزدەسۋ «ساياحات» ويىنى فورماسى تۇرىندە وتكىزىلدى. بارلىق قاتىسۋشىلار ءتۇرلى ەتنوستاردىڭ ۇلتتىق ويىندارىمەن تانىستى. ءۇشىنشى كۇن «ءدامدى كۇن» تاقىرىبىندا ءوتتى. بارلىق ەتنومادەني بىرلەستىكتەردىڭ وكىلدەرى ۇلتتىق تاعامدارىن ازىرلەپ, بالالارعا ءدام تاتقىزدى. ءتورتىنشى كۇن «ەرتەگىلەر الەمىندە» دەپ اتالدى. ناۆيگاتور باعدارى بويىنشا بالالار الدىن الا دايىندالعان ءتۇرلى تاپسىرمالاردى ورىندادى. وسى ۋاقىتتا الاڭدا كونتسەرت ءجۇردى. جوباعا ەكىباستۇز ءوڭىرىنىڭ اۋىل بالالارى قاتىستى.
جوبا اياسىندا بايەت اۋىلىندا رەاليتي-شوۋ بولدى. قالا بالالارى اۋىل بالالارىمەن بىرلەسىپ, كيىز ءۇي قۇردى, ماي شايقاپ, باۋىرساق ءپىسىردى, ساماۋىر قىزدىرىپ, تراكتورمەن ءجۇرۋدى ۇيرەندى.
اپتا بويى «ەكىباستۇز» بالالار قورى بالالارعا ءتاتتى سىيلىقتار بەرسە, جوبانىڭ سوڭعى كۇنىندە بەلسەندى توپتار مەن قاتىسۋشىلارعا سىيلىقتار ۇلەستىردى.
بالالاردىڭ جوبادان العان اسەرلەرىن سوزبەن جەتكىزۋ مۇمكىن ەمەس. جوبانىڭ قاتىسۋشىلارى مەن قوناقتارى وزدەرىنىڭ لەبىزدەرىن قوناق كىتابىندا بىلدىرە الدى.
«شىركىن, life-2013» جوباسىنىڭ ەرەكشەلىگى وعان ەكىباستۇز قالاسى تۇرعىندارىمەن قاتار, شەتەلدەن كەلگەن قوناقتاردىڭ قاتىسۋى بولدى. ەكىباستۇزدىڭ مەكتەپ وقۋشىلارى ءۇشىن بۇل جوبا ەڭ جارقىن جازعى دەمالىستىڭ ۇلگىسىنە اينالدى.
«ەگەمەن-اقپارات».