كلارا دميتريەۆنا زورينا – حالىق جازۋشىسى, اقىن, مەملەكەتتىك سىيلىقتىڭ لاۋرەاتى, قوعام قايراتكەرى فاريزا وڭعارسىنوۆانىڭ ۇستازى. سىرلاس دوسىنا اينالعان تۇلعانىڭ 80 جىلدىعىنا وراي اقتاۋ قالاسىنداعى IT ليتسەيىنىڭ وقۋشىلارىمەن كەزدەسكەن كلارا اپاي ءوزىنىڭ تالانتتى شاكىرتىن – ەلىمىزدىڭ ايتۋلى اقىن قىزىن ساعىنىشپەن ەسكە الىپ, ول تۋرالى ويلارىن ورتاعا سالدى.
ونىڭ فاريزامەن تانىس-بىلىستىگى 1954 جىلدان باستالىپتى. ءوز وقۋشىلارىنان نەبارى 5-6 جاس ۇلكەن ۇستاز اۋىل مەكتەبىنە ورىس ءتىلى مەن ادەبيەتى پانىنەن ساباق بەرۋگە بارادى.
– مەن گۋرەۆ (قازىرگى اتىراۋ) وبلىسىنىڭ نوۆوبوگات اۋدانىنا قاراستى ماناشى اۋىلىنا ۇستاز بولىپ باردىم. بولاشاق تانىمال اقىن فاريزا مەن ساباق بەرەتىن سىنىپتا وقىدى – ول باستاماشىل, مۇقيات, العىر, تالانتتى جانە تۋعان ەلىن, جەرىن سۇيەتىن قىز بولدى. سوزىندە تۇراتىن, ءبىر نارسەگە ۋادە بەرسە ورىنداماي تىنبايتىن جاۋاپكەرشىلىگى جوعارى وقۋشى ەدى, سونداي-اق دومبىرانى جاقسى تارتۋشى ەدى. قازاقتىڭ بەلگىلى كۇيشىلەرىنىڭ شىعارمالارىن ۇيرەتكان اناسىنا ريزا بولاتىن. ول ءبىر وقۋلىق جەتىسپەيتىن قيىن كەز ەدى, التى ساباقتان سوڭ بالالار قالىپ مەنىڭ ايتۋىممەن ديكتانت جازاتىن. ءبىر-بىرىمىزگە وكپە-رەنىش, ارىز-شاعىم جوق, ءبىرىمىزدى-ءبىرىمىز ءتۇسىنىپ, قولداپ, بىرىگە كەتەتىنبىز. مەن ولارعا ورىس ءتىلىن ۇيرەتتىم, ال ولار ماعان قازاقشا ۇيرەتتى, – دەپ الىس كۇندەردى جىلى شىرايمەن ەسكە الدى كلارا زورينا.
بۇگىندە 86 جاسقا تولعان كلارا زورينا فاريزا, ونىڭ ءومىرى, ول ءسۇيىپ جىرلاعان ماڭعىستاۋ تاقىرىبىنا كوبىرەك ورالىپ, ليتسەي وقۋشىلارىنا كوپ ماعلۇمات بەردى. سونداي-اق, «دوروگوي, ليۋبيموي كلارە دميتريەۆنە – س بەسكونەچنىم چۋۆستۆوم پوكلونەنيا پەرەد نەي. فاريزا, ۆاشا سكرومنايا ۋچەنيتسا. 1984, 7 يۋليا, الما-اتا» دەگەن قولتاڭباسى قالعان كىتاپتى قاستەرلەي ۇستاپ, حالقىنىڭ ىقىلاسىنا بولەنگەن اقىن شاكىرتىن ءاردايىم ەسىنە الىپ وتىراتىنىن جەتكىزدى.
اقتاۋداعى كارىس ەتنومادەني بىرلەستىگى شاكىرتتەرىن وقۋشى فاريزانىڭ ومىرىمەن جانە ونىڭ كوزى ءتىرى ۇستازى كلارا دميتريەۆنامەن جۇزدەستىرۋ بارىسىندا بالالار فاريزا وڭعارسىنوۆانىڭ ولەڭدەرىن جاتقا مانەرلەپ وقىدى.
شاكىرتى ءۇشىن مەرەيلەنگەن ۇستاز-انا ليتسەي وقۋشىلارىنا العىسىن جەتكىزىپ, ونەگەلى بۋىن بولىپ ءوسىپ-جەتىلۋىنە تىلەك ءبىلدىردى. قارت ۇستاز بالالىعى سوعىس, ودان كەيىنگى قيىن جىلدارعا تاپ كەلگەن فاريزا زامانداستارىمەن قازىرگى بالالاردىڭ جاعدايىن, زامانىن سالىستىرۋعا كەلمەيتىندىگىن, سوندىقتان بار مۇمكىندىكتى پايدالانىپ وقىپ-ءبىلىم الۋعا تىرىسۋ قاجەتتىگىن ايتتى.
ماڭعىستاۋ وبلىسى