«مۇمكىندىگى شەكتەۋلى 175 ءبۇلدىرشىن قاتىسقان جيىنعا قالا مەتسەناتتارى مەن الەۋمەتتىك ءال-اۋقات باسقارماسى مۇرىندىق بولدى» دەپ حابارلايدى الماتى قالاسى اكىمدىگى ءباسپاسوز قىزمەتى.
كەلگەن قوناقتارعا بەلسەندىلەر داستارقان جايىپ, سىي-سياپات كورسەتتى. ال سۋرەتشىلەر توبى اكۆا-گريمم جاعۋ بويىنشا شەبەرلىك ساباقتارىن وتكىزدى. بالعىنداردىڭ ءوزى مەرەكەلىك شوۋعا قاتىسىپ, حورەوگرافيالىق جانە ساحنالىق كورىنىستەر قويدى.
«بۇل قايىرىمدىلىق شاراسى بەكەر ۇيىمداستىرىلىپ جاتقان جوق. ادامداردىڭ جۇرەگىندە مەيىرىم ويانسىن دەگەن نيەتپەن جاسالىپ وتىر. بۇلدىرشىندەردى «اردي», «مەيىرىم» وڭالتۋ ورتالىقتارىنان جانە جەتىسۋ اۋدانىنان شاقىردىق» دەدى مەتسەنات ساۋلە ناۋرىزباەۆا.
قايىرىمدىلىق اكتسياسىن قولداۋعا قازاقستاندىق ەسترادا جۇلدىزدارى دا كەلدى. ارتىستەر مۇمكىندىگى شەكتەۋلى بۇلدىرشىندەرمەن ءبىر ساحنادا بي بيلەپ, ولارعا تاماشا كوڭىل-كۇي سىيلادى.
«مەن وسىنداي قايىرىمدىلىق شارالارعا ءجيى قاتىسامىن. ونىڭ وزىندىك سەبەبى دە بار. مۇنداي جيىنعا قاتىسۋ ءاربىر ءارتىستىڭ مىندەتى دەپ سانايمىن. تەك بالعىندار ءۇشىن عانا ەمەس, ەرەسەك جاندار ءۇشىن دە جاسالىپ جاتقان دۇنيە بۇل» دەدى ءانشى ايجان نۇرماعامبەتوۆا.
الماتى
.