بۇرناعى كۇنى سقو ءۋاليحانوۆ اۋدانىندا, تۇنگى ساعات ءتورت شاماسىندا كوكشەتاۋدان ومبىعا قاراي بەت العان جولاۋشىلار اۆتوبۋسى 12 جولاۋشىمەن اۋدان ورتالىعىنان 40 شاقىرىم جەردەگى اقتۇيەساي اۋىلىنىڭ ماڭىندا ىستەن شىعىپ, تۇرىپ قالادى. كۇن ءبىرشاما اياز.
جولاۋشىلاردىڭ كيىمدەرى جۇقا, وزدەرىنە كومەك كەلمەسە ولار قيىن جاعدايدا ۇشىراپ قالۋى كادىك ەدى. الايدا تاڭەرتەڭ ەرتەمەن مال قاراۋعا شىققان جەرگىلىكتى تۇرعىنداردىڭ ءبىرى اۋداندىق پوليتسيا ءبولىنىسىنىڭ كەزەكشى بولىمىنە حابار بەرەدى. كومەككە ءبولىم باستىعى, پوليتسيا پودپولكوۆنيگى مارات ءالجانوۆ, ۋچاسكەلىك پوليتسيا ينسپەكتورلارى مەن پاترۋلدىك پوليتسيا باتالونىنىڭ قىزمەتكەرلەرى «كاماز» اۆتوكولىگىن تاۋىپ بارىپ, اۆتوبۋستى تىركەمەمەن شەكارالىق باقىلاۋ پۋنكتىنە جەتكىزدى. وسى جەردەن ءارى جولاۋشىلار ومبى قالاسىنان كەلگەن كولىككە ءمىنىپ, ۇيلەرىنە امان-ەسەن جەتتى. كولىكتىڭ ىستەن شىققان سۋ ناسوسىن اۋىستىرۋ ءۇشىن پوليتسەيلەر جىلى بوكسقا سۇيرەپ اپارىپ, جوندەلۋىن قاداعالاعان.
وسى تاقىلەتتەس تاعى ءبىر وقيعا تايىنشا اۋدانىندا بولدى. وسى اۋداننىڭ ۆينوگرادوۆكا اۋىلىنىڭ ماڭىندا «ماN» ماركالى اۆتوماشينانىڭ جانار-جاعار ماي جۇيەسىنىڭ ىستەن شىعۋىنا بايلانىستى تۇركيا ازاماتتارى جولدا تۇرىپ قالادى. ميرونوۆسكوە اۋىلدىق وكرۋگىنىڭ ۋچاسكەلىك پوليتسيا ينسپەكتورى, پوليتسيا كاپيتانى تالعات بەيسەنباەۆ جولدا قالىپ, قاتتى توڭعان جۇرگىزۋشىلەردى ءوزىنىڭ ۇيىنە الىپ بارادى. اكىمشىلىك پوليتسيا ءبولىمىنىڭ ينسپەكتورى ازامات ورالوۆ بولسا اۆتوبۋستى سۇيرەيتىن تەحنيكا تاۋىپ, ونى اۋدان ورتالىعىنا جەتكىزگەن. مۇندا اۋدانداعى دميتري بەلەتسسكي باستاعان شەبەرلەر اۆتوبۋستىڭ اقاۋىن جوندەپ بەردى. ءسويتىپ, تۇرىك جۇرگىزۋشىلەرى قيىن جاعدايدان قۇتقارىلدى.
سولتۇستىك قازاقستان وبلىسى