قاراعاندىدا «ارسەلورميتتال تەمىرتاۋ» اق كومىر دەپارتامەنتىنە قاراستى ي.كوستەنكو اتىنداعى شاحتا جەر استىندا 6 200 قۋما مەتردى ۇڭعىلاپ, جىلدىق جوسپاردى مەرزىمىنەن ءبىر اي بۇرىن ورىنداپ شىقتى.
تولايىم تابىسقا ارنالعان سالتاناتتا شاحتا ۇجىمىن كومىر دەپارتامەنتىنىڭ ديرەكتورى اندرەي چەرنوماز قۇتتىقتاپ, كەنشىلەرگە جانكەشتى ەڭبەكتەرى ءۇشىن العىس ايتتى.
– سوڭعى ءۇش جىل ىشىندە ءتۇرلى سەبەپتەرگە بايلانىستى ۇڭعىلاۋ بويىنشا جوسپاردىڭ ورىندالۋىن ءبىز ءبىرىنشى رەت اتاپ ءوتىپ وتىرمىز. ءبىز ونى جاي عانا ورىنداپ قويماي, جەلتوقسان ايىنىڭ باسىندا مەرزىمىنەن بۇرىن ىسكە اسىردىق. ۇڭگۋشىلەردىڭ جۇمىسى اركەزدە قيىن بولعان, وعان كوپتەگەن فاكتورلار اسەر ەتەدى. بىراق قازىر بىزدەگى جاڭا تەحنيكا مەن جابدىقتاردىڭ ارقاسىندا ولاردىڭ ەڭبەگى اجەپتاۋىر جەڭىلدەدى. سونىڭ ناتيجەسىن ءبىز قازىر كورىپ وتىرمىز, – دەيدى اتالعان شاحتانىڭ باس ينجەنەرى نيكولاي گروزنوۆ.
ي.كوستەنكو اتىنداعى شاحتادا 205 ۇڭگۋشى جۇمىس ىستەيدى. بيىل ولەگ پروسكۋرين باسقاراتىن بريگادا ەكى بىردەي لاۆا دايىندادى. الداعى ۋاقىتتا جوسپارعا سايكەس ك1-ك3 قاباتى بويىنشا تاعى ەكى لاۆا ىسكە قوسىلماقشى.
قاراعاندى وبلىسى