الماتى قالاسى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 11-سىنىپ ليۋبوۆ دۋدچەنكو «Baiterek hackathon – 2019» يننوۆاتسيالىق جوبالار رەسپۋبليكالىق بايقاۋىندا «ۇزدىك IT-جوبا» نوميناتسياسى بويىنشا ءبىرىنشى ورىندى جەڭىپ الدى. ءوز جوباسىن جۇزەگە اسىرۋ ءۇشىن ليۋبوۆقا ۇيىمداستىرۋشىلار تاراپىنان 1 000 000 تەڭگەگە سەرتيفيكات بەرىلدى.
حاكاتونعا قاتىسۋعا 550-دەن استام ءوتىنىم كەلىپ تۇسسە, ونىڭ 200-دەن استامى عانا ىرىكتەۋدەن وتكەن. رەسپۋبليكالىق بايقاۋدىڭ فينالى 29 قاراشا مەن 1 جەلتوقسان ارالىعىندا «قازاقستاننىڭ تۇرعىن ءۇي قۇرىلىس جيناق بانكىنىڭ» ۇيىمداستىرۋىمەن, «بايتەرەك» ۇلتتىق باسقارۋشى حولدينگى مەن «QazTech Ventures» كومپانياسىنىڭ قولداۋىمەن الماتى قالاسىندا ءوتتى.
«بايقاۋدىڭ باستى ماقساتى – جوبا ازىرلەۋشىلەر مەن بيزنەس-ينۆەستورلار اراسىنداعى الشاقتىقتى جويۋ» دەيدى ۇيىمداستىرۋشىلار. ولار حاكاتون قاتىسۋشىلارىنا بانك تۇتىنۋشىلارىنىڭ ۇيدەن شىقپاي-اق قىزمەتتى ونلاين الۋىنىڭ باعدارلامالىق جاساقتاماسىن ويلاپ تابۋدى ۇسىندى. قاتىسۋشىلاردىڭ ۇسىنعان شەشىمدەرى ءتيىمدى, قاراپايىم جولمەن جۇزەگە اساتىن جانە تۇتىنۋشىلار ءۇشىن تۇسىنىكتى بولۋى ءتيىس دەگەن تالاپ قويىلعان.
ليۋبوۆ دۋدچەنكو جوبا بويىنشا سەرىكتەستەرى يلياس احمەتوۆ جانە ەسەنتاي قۇرمانباەۆپەن بىرگە «تۇرعىن ءۇي قۇرىلىس جيناق بانكى» كومپانياسى ءۇشىن سالىمشى بونۋستارىن جيناپ, ءوزىنىڭ ۆيرتۋالدى ءۇيىن قۇراستىرا الاتىن ءموبيلدى قولدانبا ازىرلەپ شىقتى.
«بۇل بانك كليەنتتەرىنىڭ سالىمدارىنىڭ قارقىندىلىعىن ارتتىرۋعا كومەكتەسەدى. سونىمەن قاتار, بۇل قولدانبادا جەكە كۋالىكتى سكانەرلەۋدىڭ ارنايى فۋنكتسياسى بار. ونىڭ كومەگىمەن بانكتەگى كەزەكتەردى قىسقارتۋعا بولادى, سەبەبى ساۋالنامالاردى تولتىرۋ جانە كليەنتتەردىڭ مالىمەتتەرىن دەرەكتەر بازاسىنا جىبەرۋ اۆتوماتتى تۇردە جۇرگىزىلەدى», - دەيدى ليۋبوۆ.