الماتى وبلىسى تۇرعىندارىنىڭ ءومىر ءسۇرۋ ۇزاقتىعى 73 جاستان استى. ال «دەنساۋلىق» باعدارلاماسىنىڭ جۇزەگە اسۋى ويداعىداي ءجۇرىپ جاتىر. باعدارلاما تالابى بويىنشا ورىندالاتىن 32 كورسەتكىشتىڭ جيىرما توعىزى جۇزەگە اسۋدا. جالپى ءوڭىر بويىنشا دەنساۋلىق ساقتاۋ سالاسىنىڭ بيۋدجەتى 95,2 ملرد تەڭگەنى قۇرادى.
بۇل وڭىردەگى مەديتسينا سالاسىنىڭ قالىپتى جۇمىسىنىڭ ناتيجەسى دەپ باعالانىپ وتىر. مەملەكەتتىك قولداۋدىڭ ارقاسىندا ايماقتا جىل سايىن جاڭادان ىسكە قوسىلاتىن مەديتسينالىق قىزمەت كورسەتۋ نىساندارىنىڭ سانى ون بەسكە دەيىن جەتتى. ياعني, وبلىستاعى ءاربىر ەلدى مەكەننىڭ دارىگەرلىك-امبۋلوتوريالىق عيماراتىن جاڭارتۋ ماقساتى جولعا قويىلعان. ال ءوڭىر مەديتسيناسىنىڭ قۇرال-سايمانمەن جابدىقتالۋ دەڭگەيى 83 پروتسەنتكە جەتكەن.
قازىر وبلىستا 2020 جىلدان باستاپ ىسكە قوسىلاتىن مىندەتتى الەۋمەتتىك مەديتسينالىق ساقتاندىرۋ جۇيەسىنە قوسىلۋعا قاتىستى جۇمىستار اياقتالۋعا جاقىن. دەرەك بويىنشا, ەمحانالارعا بەكىتىلمەگەن تۇرعىنداردىڭ سانى 100 مىڭ ادامنان 36 مىڭ ادامعا دەيىن قىسقارعان.
-وبلىس بويىنشا «مىندەتتى الەۋمەتتىك مەديتسينالىق ساقتاندىرۋ» قورىنا جارنا اۋدارۋدى ءتۇسىندىرۋ جۇمىستارى اياقتالۋعا جاقىن. ەڭ باستىسى, تۇرعىندار بۇل جۇيەنىڭ وزدەرىنە قاجە تەكەنىن ءتۇسىندى. جالپى, ءمامس نە ءۇشىن قاجەت؟ بۇگىندە تاۋلىك بويى ەم الۋدىڭ قۇنى 1,5 ەسەگە, ال كۇندىزگى ستانتسيونار بويىنشا 2,5 ەسەگە قىمباتتادى. ويتكەنى, مەديتسينا دامىدى, قىزمەت كورسەتۋ, ءدارى-دارمەك, قۇرالدار مەن قۇرىلعىلار قىزمەتى جوعارى. قازىر قولدانىسقا وزىق مەديتسينالىق تەحنولوگيانىڭ جەمىسى سانالاتىن 450 ءتۇرلى ءادىس پەن قۇرىلعى ەنىپ ۇلگەردى. مەملەكەت قارجىسى مەديتسينالىق قىزمەتتى رەفورمالاۋعا مىندەتتى بولعانىمەن, ناۋقاستىڭ ەم-دوم الۋىنا قاجەتتى شىعىندى وتەي المايدى. ادامدار سول سەبەپتەن دە اقىلى قىزمەتكە جۇگىنۋگە ءماجبۇر. دەمەك, مەديتسينا سالاسىنا مىندەتتى ساقتاندىرۋ جۇيەسىن ەنگىزۋدىڭ قاجەتتىلىگى دە, تيىمدىلىگى دە بار دەيدى وبلىستىق دەنساۋلىق ساقتاۋ باسقارماسىنىڭ باسشىسى باۋىرجان ىسقاق.
ايتپاقشى, سوڭعى 5 جىلى ىشىندە ەل تۇرىعدارىنىڭ ءتۇرلى مەنشىك تۇرىندەگى ەمحانالار مەن اۋرۋحانالارعا جۇمساعان قارجىسى 680 ملرد تەڭگەنى قۇراپتى. بۇل – جەكە ادام جۇمساۋعا ءتيىستى شىعىننىڭ 42 پروتسەنتىنە جەتىپ وتىر. دۇنيەجۇزىلىك دەنساۋلىق ساقتاۋ ۇيىمى تالابى بويىنشا مۇنداي شىعىن 20 پروتسەنتتەن اسپاۋى ءتيىس ەكەن.
سوندا جاڭا جىلدان باستاپ قولدانىسقا ەنەتىن جۇيە وتاندىق دەنساۋلىق ساقتاۋ سالاسىن قازىرگى ايتىلىپ جۇرگەن ءتۇرلى سىننان اقتاپ, تۇتاس جۇيەنى ساۋىقتىرا الا ما؟ ونى, ارينە, ۋاقىت كورسەتەدى. ال ازىرگە ازاماتتار ءوز تابىسىنان ءتيىستى مولشەردەگى سومانى «مىندەتتى الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكتسيونەرلىك قوعامىنىڭ ەسەبىنە اۋدارۋ ارقىلى كەپىلدى دارىگەرلىك كومەكتى الۋعا قۇقىلى. جالپى, يناقتاۋ جۇيەسىنە تولەيتىن جارنا مولشەرى جىل سايىن ساتىلاپ وسەتىنىن دە ەستەن شىعارماۋىمىز كەرەك. 2017 جىلدىڭ 1 شىلدەسىنەن باستاپ مىندەتتى جارنا تابىستىڭ 1 پروتسەنتىن قۇراپ كەلسە, 2018-2019 جىل ارالىعىندا بۇل كورسەتكىش 1,5 پروتسەنتكە وزگەرگەن. ال الداعى جىلدان باستاپ جارنا 2 پروتسەنتكە كوبەيىپ, 2022 جىلدان 3 پروتسەنتكە كوبەيەدى.