قاسىم قايسەنوۆ اتىنداعى 27943 اسكەري ءبولىمىنىڭ جاس ساربازدارى (جالپى سانى - 330) سالتاناتتى تۇردە اسكەري انت قابىلدادى.
تۇڭعىش پرەزيدەنت كۇنى مەرەكەسىندە وسكەمەندەگى «شىعىس» وڭىرلىك قولباسشىلىعىنا قاراستى قاسىم قايسەنوۆ اتىنداعى 27943 اسكەري ءبولىمىنىڭ جاس ساربازدارى (جالپى سانى - 330) سالتاناتتى تۇردە اسكەري انت قابىلدادى.
جاس ساربازداردىڭ اسكەري انت قابىلداۋ ءراسىمى ءبولىمنىڭ ساپتىق الاڭىندا سالتاناتتى ساپقا تۇرعىزىلىپ, قۇرمەتتى قوناقتار مەن ءار وڭىردەن جينالعان اتا-انالاردىڭ قاتىسۋىمەن ءوتتى.
«سالتاناتتى شارا بارىسىندا «شىعىس» وڭىرلىك قولباسشىلىعى اسكەرلەر قولباسشىسىنىڭ تەحنيكالىق قامتاماسىز ەتۋ جونىندەگى ورىنباسارى, پولكوۆنيك باقىتبەك سادىقوۆ, اسكەري-پاتريوتتىق كوميسسيانىڭ ءتورايىمى, س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ پروفەسسورى لەنستا اۋباكىروۆا, وتستاۆكاداعى پولكوۆنيك امانگەلدى قۇرىمباەۆ اقساقال مەن جاس ساربازدار اتا-انالارىنىڭ اتىنان ناۋرەت نۇرداۋلەتتىڭ اناسى جەڭىسگۇل تىلەۋباي جانە تاشيم باقداۋلەتتىڭ اكەسى جاڭابەك تاشيموۆ قۇتتىقتاۋ ءسوز سويلەدى. جاس ساربازدار اتىنان ءسوز سويلەگەن قاتارداعى نۇرلىبەك جەتىباەۆ پەن ۆلاديسلاۆ برەكوتنين: «اسكەري انت قابىلداي وتىرىپ, بىزدەردى قىسقا مەرزىمدە وسى اسكەري ومىرگە بەيىمدەۋدە قىزمەت ەتكەن وفيتسەرلەر مەن سەرجانتتارعا العىس بىلدىرەمىز. سونىمەن قاتار ء«بىز جاس ساربازدار ەلىمىزدى قورعاۋعا, جەرىمىزدى ساقتاۋعا جانە ۇلگىلى ازامات بولۋعا سالتاناتتى تۇردە انت ەتەمىز!» دەدى. 27943 اسكەري ءبولىم كومانديرى, پودپولكوۆنيك ەرجان مەيرمانوۆ: «بۇگىنگى كۇن - سىزدەردىڭ ومىرلەرىڭىزدەگى تاريحي كۇن. اسكەري انت قابىلداي وتىرىپ, سىزدەر ءبىزدىڭ تاۋەلسىز قازاقستانىمىزدىڭ وتان قورعاۋشىلارى بولدىڭىزدار! بۇگىنگى تاڭدا بىزدەر باتىرلارىمىز ساعادات نۇرماعامبەتوۆ, تالعات بيگەلدينوۆ, باۋىرجان مومىش ۇلى, ءاليا مولداعۇلوۆا, مانشۇك مامەتوۆا جانە قاسىم قايسەنوۆ, تولەگەن توقتاروۆ ەسىمدەرىن ماقتانىشپەن ايتامىز. ولار دا وسىلاي وتانعا ادال بولۋعا انت قابىلداپ, ءوز اسكەري جاۋىنگەرلىك مىندەتتەرىن تاباندىلىقپەن ورىنداپ, ەرلىكپەن ەلگە قىزمەت اتقاردى. وسى اتا-بابالارىمىزدىڭ وتانعا دەگەن شەكسىز سۇيىسپەنشىلىكتەرى سىزدەر مەن بىزدەر ءۇشىن ناعىز ۇلگى, قۇرمەتتى جاۋىنگەرلەر!» دەپ ءوز لەبىزىن جەتكىزدى. شارا سوڭىندا جاس ساربازدار جيىنى جەكە قۇرامى قىسقا مەرزىمدە وزدەرى مەڭگەرگەن قويان-قولتىق ۇرىس جاتتىعۋلارىنان قارۋمەن جانە ءبولىمنىڭ شتاب باتالونى بارلاۋ روتاسى جەكە قۇرامى جاۋىنگەرلىك ۇرىس, وقۋ-تاكتيكالىق جاتتىعۋلارىنان كورسەتىلىمدەردى قوناقتار نازارىنا پاش ەتتى» دەيدى 27943 اسكەري ءبولىمىنىڭ يدەولوگيالىق جۇمىستار, ارنايى ناسيحات جانە مەملەكەتتىك-قۇقىقتىق دايىندىق جونىندەگى اعا وفيتسەرى ن.مالعاجداروۆ.
وسكەمەن