قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي سولتۇستىك قازاقستان وبلىسىنىڭ پوليتسيا دەپارتامەنتىندە سالتاناتتى جينالىس ءوتتى.
پوليتسيا ۆەدومستۆوسىنىڭ باسشىسى پوليتسيا پولكوۆنيگى مارات تولەباەۆ قوناقتار مەن جەكە قۇرامدى مەيراممەن قۇتتىقتاپ, مەملەكەتتىك مەرەكەنىڭ تاريحي ماڭىزدىلىعىنا توقتالدى. «ەلباسى ءبىز ءۇشىن ءوز ەلىنە, وتانىنا قىزمەت ەتۋدىڭ جارقىن ۇلگىسى بولاتىن الەمدىك دەڭگەيدەگى كەمەڭگەر ساياساتكەر. تاتۋلىعىمىز, بەرەكە-بىرلىگىمىزدىڭ, تۇراقتىلىعىمىزدىڭ كەپىلى بولعان تۇڭعىش پرەزيدەنتىمىزدىڭ ەڭبەك جولى - قازاقستاندىقتارعا ۇلگى جانە تاعىلىم مەكتەبى. ءبىزدىڭ باستى مىندەتىمىز - بەيبىت ءومىر مەن ازاماتتاردىڭ تىنىشتىعىن ساقتاۋ», - دەدى پوليتسيا دەپارتامەنتىنىڭ باستىعى.
قىزمەتتىك مىندەتتەرىن اتقارۋدا جوعارى كاسىبيلىگىمەن ەرەكشەلەنگەن قىزمەتكەرلەردى ماراپاتتاۋ ءراسىمى جينالىسقا قاتىسقانداردىڭ مەرەكەلىك كوڭىل-كۇيىن ودان ءارى ارتتىرا ءتۇستى. جىلدام قيمىلدايتىن ارنايى جاساقتىڭ كومانديرى ەرىك قۇلجانوۆقا «پوليتسيا پودپولكوۆنيگى» اتاعى مەرزىمىنەن بۇرىن بەرىلدى. ول 50-دەن استام وفيتسەر قىزمەت اتقاراتىن ەرەكشە بولىنىسكە باسشىلىق ەتەدى. 17 جىلدىق قىزمەت بارىسىندا سامبودان سپورت شەبەرى, قازاق كۇرەسىنەن سپورت شەبەرلىگىنە كانديدات دارەجەسىنە جەتكەن ەرىك قۇلجانوۆ ءوزىن بىلىكتى, الدىنا قويعان مىندەتتەردى بۇلجىتپاي ورىندايتىن قىزمەتكەر رەتىندە كورسەتتى. «بۇگىنگى مەرەكەنىڭ ەل تاريحىندا ەرەكشە ورنى بار. بۇل تاۋەلسىز ەل يدەولوگياسىنىڭ باسىمدىقتارىن, كورەگەن تۇلعانىڭ قاسيەتىن ايتاتىن كۇن. تۇڭعىش پرەزيدەنتىمىزدىڭ قول جەتكىزگەن جەتىستىكتەرى الدىنداعى جاۋاپكەرشىلىكتى سەزىنە وتىرىپ, ءوزىمىز ءۇشىن جانە بارلىق جەكە قۇرام ءۇشىن مىندەتىمىزدى ايقىندايمىز. اتاقتى «مەرزىمىنەن بۇرىن» الۋىمدى – بارلىق جەكە قۇرامنىڭ قول جەتكىزگەن تابىسى دەپ بىلەمىن», - دەدى ماراپاتتالۋشى.
تۇڭعىش پرەزيدەنت كۇنىن مەرەكەلەۋگە وراي بارلىعى 80-نەن استام سولتۇستىكقازاقستاندىق پوليتسەي ماراپاتتالدى. ەكى قىزمەتكەرگە وبلىس اكىمى قۇمار اقساقالوۆتىڭ العىس حاتى تابىس ەتىلىپ, 12 قىزمەتكەرى ىشكى ىستەر ءمينيسترى ەرلان تۇرعىمباەۆتىڭ بۇيرىعىمەن ماراپاتتالدى.
مەرەكە ۆەدومستۆونىڭ شىعارماشىلىق ۇجىمى دايىنداعان كونتسەرتكە ۇلاستى.