ەگەمەن ەلدىڭ ەڭسەسىندەي بويىن تىكتەگەن ەلوردانىڭ ادەمىلىگىن ۇشاقپەن ساپارلاپ كەلە جاتقان ءاربىر قوناق يلليۋميناتوردىڭ اينەگىنەن بايقايدى, تابانى الدىمەن اۋەجايعا تيەدى. اسپان مەن استانانىڭ اراسىن جالعاعان بۇل «نۇرسۇلتان نازارباەۆ حالىقارالىق اۋەجايى» – ەلوردانىڭ عانا ەمەس, ەلىمىزدىڭ باس اۋە قاقپاسى.
قوناق كەلگەنىن قۇتقا بالايتىن قازاقتاي ەلدىڭ مەيماندوستىق مەكەنى ەكەنى اۋەلدەن اۋەجايداعى جايلىلىقتان سەزىلەدى. اسقاقتاعان استانامىز باس قاقپادان باس سۇققان جۇرتتى باۋىرىنا بىردەن تارتىپ تۇرادى. ەلوردامەن تانىسۋ وسى اۋەجايدان باستالادى.
استانانىڭ ىرگەسىنەن ورىن تەپكەن اۋەجاي 2017 جىلدىڭ 21 ماۋسىمىنان باستاپ «نۇرسۇلتان نازارباەۆ حالىقارالىق اۋەجايى» بولىپ اتالا باستادى. مۇنداي ۇلگىلى ءۇردىس الەمنىڭ كوپتەگەن مەملەكەتىندە بار. ايتالىق, الپاۋىت ەل اقش-تا تۇڭعىش پرەزيدەنتى ۆاشينگتوننىڭ اتىندا ءبىر اۋەجاي جانە نيۋ-يورك قالاسىندا دجون كەننەديدىڭ اتىندا تاعى ءبىر اۋەجايى بار. سونىمەن قاتار باۋىرلاس ەلدەر ازەربايجان استاناسىنداعى حالىقارالىق اۋەجاي گەيدار اليەۆتىڭ, تۇركيانىڭ ىستانبۇل قالاسىنداعى اۋەجاي اتاتۇرىكتىڭ اتىمەن اتالادى.
ەسىلدىڭ بويىنا ەلوردانى قوندىرىپ, ەن دالانى جاڭا قالامەن جانداندىرعان ەلباسى 2005 جىلدىڭ 2 اقپانىندا استانا اۋەجايىنىڭ جاڭادان سالىنعان جولاۋشىلار تەرمينالىن سالتاناتتى جاعدايدا اشتى. سول تۇستا وسىناۋ تاريحي ءساتتى باس باسىلىم «Egemen Qazaqstan» گازەتى سۇيىنشىلەپ جازىپ, نۇرسۇلتان نازارباەۆقا العاشقى وتىرعىزۋ تالونى تاپسىرىلعان ەستەلىك سۋرەتتى جاريالاعان ەدى.
جالپى, تاريحىن تەرەڭنەن تارتاتىن استاناداعى اۋەجايدىڭ قۇرىلعانىنا بيىل 88 جىل تولدى. ءبىر قىزىعى, اۋەجايدىڭ ەڭ العاش رەسمي تۇردە ىسكە قوسىلعان ۋاقىتى تۇڭعىش پرەزيدەنت كۇنىمەن سايكەس كەلىپ تۇر. ياعني, 1931 جىلدىڭ 1 جەلتوقسانىنان باستاپ اقمولا مەن سەمەيدىڭ اراسىندا اۋە قاتىناسى ورناعان.
سودان بەرى تالاي ۋاقىت ءوتىپ, ارقا توسىندەگى اۋەجاي قۇلاشىن كەڭگە سەرپىپ, قانات جايدى, الەۋەتى ارتتى. وسىدان ەكى جىل بۇرىن بۇكىل الەم كوز تىككەن ايتۋلى ەكسپو كورمەسى قارساڭىندا «نۇرسۇلتان نازارباەۆ حالىقارالىق اۋەجايىنىڭ» جاڭا تەرمينالى ىسكە قوسىلدى. 2017 جىلدىڭ 31 مامىرىندا ەلباسىنىڭ ءوزى سالتاناتتى تۇردە اشقان جاڭا عيماراتتا تەك قانا حالىقارالىق رەيستەرگە قىزمەت كورسەتىلەدى. ال بۇرىنعى تەرمينال ىشكى رەيستەرگە ارنالدى.
جاڭا تەرمينال VIP جانە قاراپايىم جولاۋشىلارعا ارنالعان ەكى ايماقتان, ءورت كىرەبەرىسىنەن تۇرادى. جولاۋشىلاردى تىركەيتىن 26 بىردەي ورىن جانە تولقۇجات تەكسەرەتىن 42 كابينا ورناتىلعان. ال جاڭا جۇيەنىڭ ارقاسىندا قول جۇكتەرىنىڭ 1200 داناسىن ءبىر ساعاتتىڭ ىشىندە وتكىزۋگە بولادى. تەرمينالدىڭ جالپى اۋدانى – 47 مىڭ شارشى مەتر.
جولاۋشى وتكىزۋ مۇمكىندىگى جىلىنا 5 ملن ادامدى قۇرايتىن جاڭا تەرمينالدىڭ اشىلۋىمەن اۋەجاي جىلىنا جالپى 8,2 ملن جولاۋشىعا قىزمەت كورسەتۋدە. بۇگىنگى تاڭدا «نۇرسۇلتان نازارباەۆ حالىقارالىق اۋەجايى» تاۋلىك سايىن 200-گە جۋىق رەيس قابىلداپ, شىعارىپ سالادى جانە 14 000-نان اسا جولاۋشىعا قىزمەت كورسەتەدى.
2018 جىلى اۋە ايلاعى 30 مىڭ رەيسكە قىزمەت كورسەتىپ, جولاۋشىلار اعىنى 4,5 ملن جولاۋشىنى قۇرادى. بيىل 5 ملن جولاۋشىعا قىزمەت كورسەتۋ جوسپارلانۋدا. بىلتىر جولاۋشىلار اعىنى 6%-عا, ال رەيستەر سانى 5%-عا ارتتى. بۇل وڭ كورسەتكىشكە SCAT, «ەير استانا» جانە «اەروفلوت» سياقتى حالىقارالىق رەيستەردىڭ ارتۋى ىقپال ەتتى.
ال ىشكى باعىتتاردىڭ كوبەيۋىنە جاڭادان ىسكە قوسىلعان Fly Arystan اۋەكومپانياسىنىڭ پايدا بولۋى سەپتىگىن تيگىزدى. بۇل كومپانيا ەلوردا مەن شىمكەنت, تاراز, سەمەي, پاۆلودار, قوستاناي قالالارىنىڭ اراسىن جالعاپ جانە جەلتوقساندا نۇر-سۇلتان-ماسكەۋ رەيسىن اشۋدى كوزدەپ وتىر.
2019 جىلدىڭ 10 ايىنىڭ قورىتىندىسى بويىنشا جولاۋشىلار اعىنى 4,2 ملن جولاۋشىنى قۇرادى. بۇل 2018 جىلدىڭ سايكەس كەزەڭىمەن سالىستىرعاندا 7%-عا ارتىق. ال رەيستەر سانى 26 مىڭنان اسىپ, 3%-عا كوبەيدى.
قازىرگى كەزدە اۋەجاي 15 شەتەلدىك جولاۋشىلار اۆياكومپانياسىمەن جۇمىس ىستەيدى. ولاردىڭ قاتارىندا Lufthansa, Turkish Airlines, Air China, FlyDubai جانە Aeroflot سياقتى الەمنىڭ ءىرى اۆياتاسىمالداۋشىلارى بار.
2019 جىلى پراگا, ۇلان-باتىر, توكيو سياقتى قالالارعا جاڭا رەيستەر اشىلدى. سونىڭ ناتيجەسىندە حالىقارالىق باعىتتار بويىنشا قىزمەت كورسەتىلگەن جولاۋشىلار سانى ارتىپ, 1,5 ملن-نان اسا جولاۋشىنى قۇرادى.
تۇڭعىش پرەزيدەنت كۇنى قارساڭىندا تاعى ءبىر تاريحي ساتكە كۋا بولدىق. دالىرەك ايتساق, جولاۋشىلاردىڭ جايلىلىعى ءۇشىن ەسكى جانە جاڭا تەرمينالدىڭ اراسىن جالعايتىن جاڭا گالەرەيا اشىلدى.