كەنشىلەر استاناسىندا قاراعاندى وبلىسى اكىمىنىڭ كۋبوگى ءۇشىن «جايدارمان» فەستيۆالى ءوتتى. اتالعان شارانى وبلىستىق جاستار ساياساتى ماسەلەلەرى جونىندەگى باسقارما مەن «قاراعاندى وبلىسىنىڭ جاستار مەن بالالار ۇيىمدارىنىڭ وداعى» جاستار قوعامدىق بىرلەستىگى تىزە قوسىپ ۇيىمداستىردى.
جاستاردىڭ دۋماندى كەشىنە قاراعاندى وبلىسى اكىمىنىڭ ورىنباسارى ابزال نۇكەنوۆ پەن قازاقستان كتك وداعىنىڭ پرەزيدەنتى ەسەن ەلەۋكەن قۇرمەتتى قوناق رەتىندە قاتىستى.
«جايدارمان» فەستيۆالىندە 11 كوماندا باق سىنادى. قازىلار القاسىنىڭ شەشىمىمەن ءبىرىنشى جۇلدەگە ادەمى ازىلىمەن, تاۋىپ ايتقان قالجىڭىمەن, ارتىستىك شەبەرلىكتەرىمەن ەرەكشەلەنگەن «كۇلكى سيندرومى» كومانداسى لايىقتى دەپ تانىلدى. ەكىنشى جانە ءۇشىنشى جۇلدەگە, سايكەسىنشە, «اگرو» ۇجىمى مەن ساتباەۆ قالاسىنىڭ قۇراما كومانداسى يە بولدى.
جەڭىمپاز جانە جۇلدەگەر كوماندالارعا كۋبوك, ديپلوم جانە اقشالاي سەرتيفيكاتتار تابىس ەتىلدى.