ەكى ەل اراسىنداعى ساۋدا اينالىمى بۇگىندە 350 ملن. اقش دوللارىن قۇراپ وتىر. مۇنى كەشە استانادا وتكەن قازاقستان-لاتۆيا بيزنەس فورۋمىندا پرەمەر-مينيستر سەرىك احمەتوۆ ايتتى.
فورۋمعا لاتۆيانىڭ پرەزيدەنتى اندريس بەرزينش باستاعان دەلەگاتسيا قاتىستى. دەلەگاتسيا قۇرامىندا 70-تەن استام ادام بار. ولاردىڭ اراسىندا مينيسترلەر مەن كاسىپكەرلەر, ەكسپورتتىق كومپانيالارىنىڭ جەتەكشىلەرى كەزدەسەدى. فورۋمنىڭ ا.بەرزينشتىڭ ەلىمىزگە رەسمي ساپارمەن كەلۋىنە وراي وتكىزىلگەنى ءمالىم. ءىس-شارانى لاتۆيانىڭ ينۆەستيتسيا جانە دامۋ اگەنتتىگىمەن ىنتىماقتاستىقتا جۇرگەن قازاقستاننىڭ ساۋدا-ونەركاسىپتىك پالاتاسى, سونداي-اق ەلىمىزدىڭ يندۋستريا جانە جاڭا تەحنولوگيالار مينيسترلىگى ۇيىمداستىرىپ وتىر. ءسوز كەزەگى بەرىلگەن لاتۆيا پرەزيدەنتى قازاقستاننىڭ تاۋەلسىزدىك جىلدارى قول جەتكىزگەن تابىستارىنا توقتالىپ, ەكى ەل اراسىنداعى ەكونوميكالىق ءارى مادەني بايلانىستاردى دامىتۋعا ارۋاقىت مۇددەلى ەكەندىكتەرىن ءبىلدىردى. ودان كەيىن ءسوز العان س.احمەتوۆ ەكى ەل اراسىنداعى قازىرگى ساۋدا اينالىمىنىڭ كولەمىن قازاقستان مىسە تۇتپايتىنىن جەتكىزدى. ەكى ەل اراسىنداعى ساۋدا-ەكونوميكالىق قارىم-قاتىناستاردى تاعى ەكى ەسەگە ۇلعايتۋعا مۇمكىنشىلىك بار ەكەن. بالتىق بويىنداعى باسقا ەلدەرمەن سالىستىرعاندا ءبىزدىڭ لاتۆيامەن اراداعى ساۋدا-ەكونوميكالىق اينالىمىمىز وتە جوعارى. شىنايى ساندى الار بولساق ول شامامەن 350 ملن. دوللاردى قۇرايدى. ارينە, بۇل ءبىزدى قاناعاتتاندىرمايدى, ەگەر بار مۇمكىندىكتەر مەن الەۋەتتى ءتيىمدى پايدالانا بىلسەك, بۇل كورسەتكىشتى ەكى ەسەگە ۇلعايتۋعا بولادى. ويتكەنى, قازىرگى تاڭدا ەلىمىزدە 130-عا جۋىق بىرلەسكەن كاسىپورىن جۇمىس ىستەۋدە. سونداي-اق, قازاقستاندا ەكى ەلدىڭ كاسىپكەرلەرى ءبىرلەسىپ جۇمىس ىستەي الاتىن سالالار جەتكىلىكتى, دەدى قازاقستان پرەمەرى. پرەمەر-مينيستر لاتۆيادا اۋىل شارۋاشىلىعى سالاسىنىڭ دا وركەندەپ دامىعانى تۋرالى ءاڭگىمەلەدى. لاتۆيا ەۋروپانىڭ ءدال ورتاسىندا ورنالاسقان. سوندىقتان جاڭا تەحنولوگيالار ترانسفەرتىن قولدانۋ مۇمكىندىگىنە توقتالىپ, شيكىزاتقا تەحنولوگيا ايىرباسى ۇستانىمىن ءار كەزدە دە پايدالانۋ كەرەكتىگىن قاداپ ايتتى. فورۋمدا لاتۆيانىڭ ەكونوميكا ءمينيسترى د.پاليۋتسا, «قازاقستان تەمىر جولى» ۇك» اق-تىڭ پرەزيدەنتى ا.مامين, ت.ب. بىرنەشە مەكەمە جەتەكشىلەرى ءسوز سويلەدى. ەكى تاراپتىڭ مەملەكەتتىك مەكەمە وكىلدەرى مەن كاسىپكەرلەرى جىلجىمايتىن م ۇلىك, قارجى, زاڭدىق قىزمەتىن ۇسىنۋ, تۋريزم, كولىك جانە لوگيستيكا, اۋىل شارۋاشىلىعى, قۇرىلىس, تەلەبايلانىس, ءبىلىم مەن عىلىم, ت.ب. سالالار بويىنشا ىنتىماقتاسۋداعى ءمۇمكىندىكتەردى تالقىلادى. تاجىريبە الماستى. ءسويتىپ, شارا اياسىندا ەكى ەلدىڭ مينيسترلىكتەرى مەن ۆەدومستۆولارى بىرقاتار كەلىسىمدەرگە قول قويدى.
نۇرباي ەلمۇراتوۆ,
«ەگەمەن قازاقستان».