جانكەلدين اۋدانىنداعى ءتورت ت ۇلىك مال ورگىزگەن ارالباي اۋىلىندا «بولاشاققا باعدار: رۋحاني جاڭعىرۋ» باعدارلاماسى شەڭبەرىندەگى «تۋعان جەرگە تاعزىم» اكتسياسى اياسىندا ۇلى جەڭىستىڭ 75 جىلدىق مەرەيتويى قارساڭىندا ۇلى وتان سوعىسىنىڭ ارداگەرلەرىنە, وسى سۇراپىل سوعىستان ورالماعان بوزداقتارعا, قۋعىن-سۇرگىن قۇرباندارىنا, 1928 – 1932 جىلدارى اشارشىلىقتا قازا تاپقان جەرلەستەر رۋحىنا ارناپ, «ماڭگىلىك الاۋ» ەسكەرتكىش-بەلگىسى ورناتىلدى.
– تورعايلىقتار ەل مەن جەردىڭ تاريحىنا وتە سەرگەك قارايدى. سەبەبى اتالارىمىز وسى جەردە اشتىقتان قىرىلدى, قۋعىندى دا كوردى, ال تالاي بوزداق سوعىستان قايتپاي, شاڭىراعى ورتاسىنا ءتۇستى. بۇل ەسكەرتكىش-بەلگى اۋىلداستاردىڭ ەلجاندىلىعىمەن, پەرزەنتتىك پارىزدى جوعارى سەزىنۋىمەن پايدا بولدى. بىرلىكتىڭ ارقاسى, – دەيدى اۋىل اكىمى قويشىبەك مولدابەكوۆ. قازىر قاي جەردە قانداي دا ءىرىلى-ۋاقتى ءىس قارجىسىز جۇزەگە اسپايدى. ەسكەرتكىشتىڭ اشىلۋ سالتاناتىندا اۋدان اكىمى شوتا وسپانوۆ وسى ىسكە دەمەۋشىلىك كورسەتكەن تورەتاي المامبەتوۆ, ءالىبي بەكقالي, ەلجان حامزين, قۇلاحمەت شايحىستانوۆ, مۇحيت تۇرعىنبەك ۇلى سەكىلدى كاسىبىن دوڭگەلەتكەن اۋىلداستاردىڭ قولىن قىسىپ, راحمەتىن ايتتى.
شالعايدا جاتقان ارالباي سەكىلدى اۋىلداردا ادامداردىڭ ىسكەرلىگىمەن قاتار اينالاسىن ۇيىتاتىن بەلسەندىلىگى, بىرلىگى عانا تۋعان جەردى توزۋدان ساقتايدى, كوركەيتەدى. ارالبايلىق بالعاباي قابجانوۆ, بايعارا توقسانبەكوۆ, سەرىك مۇستافين, ساپار قوزىكين, حاميت اڭساعاەۆ سەكىلدى ازاماتتاردىڭ باستامالارى, يگىلىكتى ىستەرى اۋىلدى رۋحاني تەربەتىپ وتىرادى. جەيتىن اسى مەن كيەر كيىمىنە تارىقپاۋمەن قاتار, كوڭىلگە شۋاق توگەر قىزىقتى ورتاسى بار اۋىلدان ەشكىم دە كوشكىسى جوق. شاعىن فۋتبول الاڭىن دا ءبىرىنشى سالعان وسى اۋىل. قازىباي اۋليە مازارىنا قۇرىلىس جۇمىستارىن جۇرگىزىپ, زيارات ەتۋگە كەلگەندەر ءۇشىن باسىنا ءۇي سالدى. «كوستىچەۆ» جشس-ءنىڭ ديرەكتورى بالعاباي قابجانوۆتىڭ دەمەۋشىلىگىمەن جانگەلدين ورتا مەكتەبىندە ءىت سىنىبى اشىلدى.
ارالبايداعى اشتىق پەن سوعىس قۇرباندارىنا ارناپ تۇرعىزىلعان ەسكەرتكىش بەلگىنىڭ ءوزى اۋىلدان جۇرەككە جىلى تيەر لەپ ەسكەندەي اسەر بەردى.
قوستاناي وبلىسى,
جانكەلدين اۋدانى,
ارالباي اۋىلى