ەلىمىزدەگى ديپلوماتيالىق كورپۋس وكىلدەرىمەن كەزدەسۋ جاقسى داستۇرگە اينالدى. بۇل, ەڭ الدىمەن, ەكىجاقتى جانە كوپجاقتى ىنتىماقتاستىقتى ودان ءارى نىعايتاتىن ماڭىزدى شارا. سوندىقتان وسى باسقوسۋدا قازاقستاننىڭ دامۋ باعدارىنا, ىشكى-سىرتقى ساياسي باسىمدىقتارىنا باسا ءمان بەرگىمىز كەلەدى دەدى قاسىم-جومارت توقاەۆ قازاقستاندا اككرەديتتەلگەن شەت ەلدەردىڭ ديپلوماتيالىق ميسسيالارىنىڭ باسشىلارىمەن كەزدەسۋىندە.
مەملەكەت باسشىسى قازىرگى تاڭدا نۇر-سۇلتان قالاسىندا 70 ەلشىلىك جانە 30 حالىقارالىق ۇيىم وكىلدىگى بار ەكەنىن ايتتى.
«ەلىمىزدەگى ديپلوماتيالىق وكىلدىكتەر الداعى ۋاقىتتا دا كوبەيە تۇسەدى دەپ ۇمىتتەنەمىز. وسى ورايدا بەلارۋس جانە وڭتۇستىك كورەيا ەلشىلىكتەرى جاڭا عيماراتقا كوشكەنىن اتاپ وتكىم كەلەدى. ەلوردا تورىندەگى جاڭا قونىستارىڭىز قۇتتى بولسىن! ديپلوماتيا سالاسىندا كوپ جىل ەڭبەك ەتكەندىكتەن, بۇل جۇمىستىڭ قانشالىقتى ماڭىزدى ءارى جاۋاپتى ەكەنىن وتە جاقسى بىلەمىن. مەملەكەتتەرىمىز اراسىنداعى دوستىق قاتىناستاردى نىعايتۋعا قوسقان ۇلەستەرىڭىزدى جوعارى باعالايمىن» دەدى پرەزيدەنت.