تاياۋدا «كۇن ەنەرگياسى مەكتەپتەرگە» جوباسى اياسىندا نۇر-سۇلتان قالاسى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىندە نزم وقۋشىلارى مەن مۇعالىمدەرى «شەلل قازاقستان» كومپانياسىنىڭ وكىلدەرىمەن كەزدەستى.
نزم ءباسپاسوز قىزمەتىنىڭ حابارلاۋىنشا, «كۇن ەنەرگياسى مەكتەپتەرگە» جوباسى ەنەرگەتيكا مينيسترلىگى, «شەلل» كومپانياسى مەن «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمى قول قويعان ىنتىماقتاستىق تۋرالى مەموراندۋم نەگىزىندە جۇزەگە اسۋدا. جوبا زياتكەرلىك مەكتەپ وقۋشىلارىنىڭ STEM ءبىلىم-بىلىكتەرىن دامىتۋعا, ەكولوگيالىق مادەنيەتىن قالىپتاستىرۋعا, تابيعاتتى, قورشاعان ورتانى قورعاۋعا باعىتتالعان. زياتكەرلىك مەكتەپتەرمەن تىعىز قارىم-قاتىناس ورناتقان «شەلل قازاقستان» كومپانياسىنىڭ وكىلدەرىمەن كەزدەسۋ باعدارلاماسى ءتۇرلى ءىس-شارالارعا تولى بولدى.
كەزدەسۋ نۇر-سۇلتان قالاسىنداعى IB زياتكەرلىك مەكتەبىنىڭ, حالىقارالىق مەكتەپتىڭ, فيزيكا-ماتەماتيكا باعىتىنداعى زياتكەرلىك مەكتەبىنىڭ فيزيكا ءپانى مۇعالىمدەرىنە ارنالعان دارىسپەن باستالدى. حالىقارالىق ينجەنەرلىك-كونسالتينگتىك ILF كومپانياسىنىڭ جەتەكشى ينجەنەرى جانە جوبالىق مەنەدجەرى شتەفان راۋەر (Steffen Rauer) جانە كۇن جۇيەلەرىن ورناتۋمەن اينالىساتىن «مەك-استانا» مەردىگەر كومپانياسىنىڭ باس ينجەنەرى ازامات بايتاسوۆ مۇعالىمدەرگە قالپىنا كەلەتىن ەنەرگيا كوزدەرىن دامىتۋدىڭ باسىم باعىتتارى تۋرالى بايانداپ, نۇر-سۇلتان, اقتاۋ, ورال قالالارىنداعى زياتكەرلىك مەكتەپتەرگە ورناتىلعان كۇن پانەلدەرىنىڭ «قۇپياسىن» اشتى.
كۇن پانەلدەرىن قولدانۋ تيىمدىلىگى, فوتوەلەكترلىك پانەلدەرمەن جابدىقتالعان ارنايى تۇراق ەرەكشەلىكتەرى تۋرالى مۇعالىمدەردىڭ قويعان سۇراقتارىنا دارىسشىلەرمەن قاتار «شەلل كازاحستان» كومپانياسىنىڭ كوممەرتسيالىق كەڭەسشىسى اناتولي لەونتەۆ تە دايەكتى جاۋاپ بەردى.كەزدەسۋ بارىسىندا قوناقتار مەكتەپتى ارالاپ, وقۋ كابينەتتەرىن كوردى, «تەحنوترونيكا» ورتالىعىندا بولىپ, قايتا قالپىنا كەلەتىن ەنەرگيا كوزدەرى تەحنولوگيالارىنا ارنالعان وقۋشىلاردىڭ عىلىمي جوبالارىمەن تانىستى.12-سىنىپ وقۋشىلارى قاسىمحان ىنتىقباەۆ, نۇرالى دۇيسەنوۆ قوناقتارعا ەنەرگيانى جەلىسىز تاراتۋ ادىستەرى مەن ولاردى قولدانۋ جولدارى جايلى ايتىپ بەردى. 11-سىنىپ وقۋشىسى ءامىر احمەتوۆ كۇن ساۋلەسىن اينا فوكۋسىندا شوعىرلاندىرۋ ارقىلى ەنەرگيا كوزىن ارتتىراتىن قوندىرعى ماكەتىن كورسەتتى. سونداي-اق قوناقتار شەلل كومپانياسى ورناتقان مەكتەپ اۋلاسىنداعى كۇن پانەلدەرى بەرەتىن ەنەرگيانى پايدالانۋ تيىمدىلىگى تۋرالى 11-سىنىپ وقۋشىلارى ءايبيبى ءابۋوۆا مەن اقبيبى ەگىنباي ۇسىنعان تالداۋدى قىزىعا تىڭدادى.
كەزدەسۋدىڭ ەكىنشى بولىمىندە «شەلل قازاقستان» كومپانياسىنىڭ, ستراتەگيالىق جوبالار بيزنەسىن دامىتۋ مەنەدجەرى Fridtjof Wisur زياتكەرلىك مەكتەپ وقۋشىلارىن «جاسىل» ەنەرگەتيكاعا اۋىسۋ ماسەلەلەرى مەن «جاسىل» تەحنولوگيالاردى ەنگىزۋ تۋرالى دارىسكە شاقىردى.
حالىقارالىق كومپانيانىڭ جەتەكشى ينجەنەرى شتەفان راۋەر (Steffen Rauer) مەكتەپ وقۋشىلارىنا ءوز تۇتىنۋشىلارىنا تەحنيكالىق جاعىنان كۇردەلى, وندىرىستىك جانە ينفراقۇرىلىمدىق سەرپىندى جوبالاردى جۇزەگە اسىرۋعا كومەكتەسەتىن تاۋەلسىز ILF ينجەنەرلىك كومپانياسىنىڭ جۇمىسىمەن قىسقاشا تانىستىرىپ ءوتتى. راۋەر مىرزا ءوز ءسوزىنىڭ باسىم بولىگىن كۇن ەنەرگياسى مەن فوتوەلەكترلىك جۇيە جۇمىسىنا ارنادى.
ءماندى كەزدەسۋ «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ قىزمەتكەرلەرى, مەكتەپ ديرەكتورلارى مەن ولاردىڭ ورىنباسارلارى, اقپاراتتاندىرۋ تەحنولوگيالارى ورتالىعىنىڭ, NIS Service ماماندارىنىڭ قاتىسۋىمەن وتكەن دوڭگەلەك ۇستەل بارىسىندا قورىتىندىلاندى. دوڭگەلەك ۇستەلگە قاتىسۋشىلار كۇن پانەلدەرىن وقىتۋ ۇدەرىسىندە پايدالانۋ جولدارىن تالقىلادى. كۇن پانەلدەرى ورناتىلعان بارلىق زياتكەرلىك مەكتەپتەردە وقۋشىلار مەن وقىتۋشىلارعا اۋا رايىن, قانشا ەنەرگيا وندىرىلگەنىن, قانشاسى جۇمسالعانىن كورسەتەتىن ارنايى ديسپلەيلەر ورناتىلعانىن ايتا كەتكەن ءجون. مۇنداي اقپاراتتىق كەشەندى وقىتۋ ۇدەرىسىندە پايدالانا ءبىلۋ وقۋشىلاردىڭ ەنەرگيا تۋرالى, ەنەرگيا كوزدەرىنىڭ قورشاعان ورتاعا اسەرى تۋرالى تۇسىنىك الۋىنا مۇمكىندىك بەرىپ, ەنەرگيا قورىن ۇنەمدى پايدالانۋ داعدىلارىن قالىپتاستىرۋعا جاعداي جاسايتىنى ءسوزسىز. قازىرگى تاڭدا بۇل اقپاراتتىق بلوكتاردى وقۋ ۇردىسىندە پايدالانۋ جوسپارلانىپ وتىر.
- شەلل كومپانياسىمەن ىنتىماقتاستىق ورناتۋ وقۋشىلارعا ەنەرگيا, ەنەرگيانى ءوندىرۋ مەن پايدالانۋدىڭ قورشاعان ورتاعا اسەرى تۋرالى جاڭا بىلىمدەردى يگەرۋگە, ەكولوگيالىق مادەنيەت پەن ەنەرگورەسۋرستارعا ۇقىپتى قارىم-قاتىناستى قالىپتاستىرۋعا كومەكتەسەدى, - دەيدى «نازارباەۆ زياتكەرلىك مەكتەپتەرى» دببۇ باسقارما توراعاسىنىڭ ورىنباسارى ولگا موجاەۆا.