بەنزينگە بايلانىستى كۇنى بۇگىنگە دەيىن ايتىلىپ كەلگەن پىكىرلەرگە نۇكتە قويىلدى. اكتسيز قۇنىن 10 پايىزعا قىمباتتاتۋ تۋرالى شەشىم كەشە قابىلداندى.
ۇلتتىق ەكونوميكا مينيسترلىگى باسشىسىنىڭ پىكىرىنشە, اكتسيزدى كوتەرۋ قازاقستانداعى ينفلياتسياعا ايتارلىقتاي اسەر ەتپەيدى
بەنزيننىڭ ءبىر ءليترىنىڭ اكتسيزى 2020 جىلدىڭ 1 قاڭتارىنان باستاپ 10 تەڭگەگە كوتەرىلەدى. بۇل تۋرالى ۇلتتىق ەكونوميكا مينيسترلىگى حابارلادى.
«اكتسيزدەردىڭ وسۋىنە قاتىستى ايتار بولساق, بۇگىنگى كۇنى قاۋلى جوباسى ازىرلەنىپ جاتىر, ءبىر ءليتردىڭ اكتسيز قۇنىنا قوسىمشا 10 تەڭگە قوسىلادى دەپ جوسپارلانۋدا», - دەدى مينيستر رۋسلان دالەنوۆ دۇيسەنبىدە Cەنات وتىرىسىندا. ول باعانىڭ ازداپ وسەتىنىن ايتتى. «ەسەپتەۋلەر جاعدايدىڭ ينفلياتسياعا نەمەسە شاعىن جانە ورتا بيزنەس ءوندىرىسىنىڭ وزىندىك قۇنىنا ايتارلىقتاي اسەر ەتپەيتىندىگىن كورسەتۋدە», دەپ اتاپ ءوتتى دالەنوۆ.
«بۇگىنگى كۇنى اكتسيزدىڭ ەڭ كوپ ۇلەسى مۇناي وڭدەيتىن جانە ساتاتىن كومپانيالاردىڭ شىعىندارى مەن پايداسىنان تۇرادى», - دەپ تولىقتىردى ول.
ۇلتتىق ەكونوميكا مينيسترلىگىنىڭ ءباسپاسوز قىزمەتى جاڭاشىلدىقتى 2020 جىلدىڭ 1 قاڭتارىنان باستاپ ەنگىزۋ جوسپارلانىپ وتىرعانىن مالىمدەدى.
وسى ۋاقىتقا دەيىن ەنەرگەتيكا ءمينيسترى قانات بوزىمباەۆ كورشى ەلدەرمەن سالىستىرعاندا وتاندىق جانار-جاعارمايدىڭ قۇنى ارزان بولعاندىقتان, شەكارا اسىپ جاتقانىن ايتقان ەدى. سوندىقتاندا بەنزين باعاسى كەزەڭ-كەزەڭىمەن شەكارالاس مەملەكەتتەرمەن تەڭەسەتىنىن جەتكىزدى.
ەستەرىڭىزگە سالساق, قازاقستاندا 2 قاراشادان باستاپ, بەنزين مەن ديزەلدىك وتىندى اۆتوموبيل كولىگىمەن ەلدەن شىعارۋعا التى ايعا شەكتەۋ ەنگىزىلگەن.
الماتى
.