اۋليەكول اۋدانىندا «رۋحاني جاڭعىرۋ» باعدارلاماسىنىڭ «رۋحاني قازىنا» كىشى باعدارلاماسى اياسىندا «بابادان قالعان قازىنام» قازاق حالىق اسپاپتارى ايماقتىق فەستيۆالى وتكىزىلدى. ءىس-شاراعا قوستاناي وبلىسىنىڭ التىنسارين, ناۋرىزىم, قاراسۋ, قامىستى, قوستاناي اۋداندارى مەن جەرگىلىكتى اۋليەكولدىك ونەرپازدار قاتىستى.
«بابادان قالعان قازىنام» اتتى قازاق حالىق اسپاپتارىنىڭ ايماقتىق فەستيۆالىنىڭ ماقساتى مادەني مۇرامىزدى دامىتۋ, ايماقتار اراسىندا مادەني بايلانىستى نىعايتۋ مەن حالىق اسپاپتارىندا ويناۋ ءداستۇرىن دارىپتەۋ بولدى. فەستيۆالدىڭ ءبىرىنشى كەزەڭىندە انسامبلدەر ونەر كورسەتتى. قازاق حالىق اسپاپتارى اساتاياق, شاڭقوبىز, شىلدىرماق كونە اسپاپتارمەن تولىقتىرىلىپ, كلاسسيكالىق اۋەندەر مەن حالىق سازدارىن ناقىشىنا كەلتىرە ورىندادى. اسىرەسە, قاراسۋ اۋدانى ونەر مەكتەبىنەن كەلگەن «دالا اۋەنى», التىنسارين اۋدانىنان «اتا مۇرا», قوستاناي اۋدانىنىڭ «كوك ءبورى» ەتنوانسامبلى, اۋليەكول اۋدانى ونەر مەكتەبىنىڭ «قازىنا» ەتنوانسامبلى شىعارمالاردى ناشىنە كەلتىرە ورىندادى.
ەكىنشى كەزەڭدە وسى ايماقتاردان كەلگەن ولكەنىڭ ونەر ساڭلاقتارى توپقا ءتۇسىپ, وزدەرىنىڭ ونەرىن كورسەتتى. وندا قاراسۋ اۋدانىنان «يلەگاي» كۆارتەتىنىڭ, التىنسارين اۋدانىنان ساحابەدەن ايبەكتىڭ, قوستاناي اۋدانىنان مۇرات تىلەۋعابىلوتىڭ, ىبىراي ەسجانوۆتىڭ, ناۋرىزىم اۋدانىنان كەلگەن بالمەكەن شاكىباەۆانىڭ, قامىستى اۋدانىنان كەلگەن مادي بايزاقوۆتىڭ, اۋليەكول اۋداندىق مادەنيەت ءۇيىنىڭ مۋزىكالىق جەتەكشىسى الماز حاميتبەكوۆتىڭ ونەرىنە كورەرمەندەر ءتانتى بولدى.
اۋليەكول مادەنيەت جانە تىلدەردى دامىتۋ ءبولىمىنىڭ باسشىسى جىبەك كاكىمجانقىزى ءىس-شاراعا قاتىسقان بارلىق ونەرپازدارعا العىسىن ايتىپ, قازاق حالقىنىڭ عاسىرلار بويى جيناقتالعان ۇلتتىق قۇندىلىعى, رۋحاني مادەنيەتىمىزدى جاڭعىرتۋدا بۇل ءىس-شارانىڭ ماڭىزدىلىعىن اتاپ ءوتتى.
قوستاناي وبلىسى,
اۋليەكول اۋدانى