وتكەن اپتادا فۋتزالدان ۋەفا چەمپيوندار ليگاسىنىڭ ەليتالىق كەزەڭىنىڭ توپتىق ويىندارى اياقتالدى. «س» توبىنداعى باسەكەلەر الماتىداعى بالۋان شولاق اتىنداعى سپورت سارايىندا, ال «ۆ» توبىنداعى باسەكەلەر رەسەيدىڭ تۇمەن قالاسىندا ءوتتى.
«ۆ» توبىندا سىنعا تۇسكەن الماتىنىڭ «قايرات» كلۋبى العاشقى تۋردا يسپانيانىڭ «مۋرسيا ەل-پوسو» كومانداسىنا 1:4 ەسەبىمەن جول بەردى. ەكىنشى تۋردا يتاليانىڭ «پەسارو» كلۋبىمەن كەزدەسىپ, 5:3 ەسەبىمەن باسىم ءتۇستى. شەشۋشى تۋردا «قايرات» پورتۋگاليانىڭ «بەنفيكاسىن» 3:2 ەسەبىمەن جەڭىپ تۇرىپ, سوڭعى مينۋتتاردا قاقپاسىنا ءۇش گول وتكىزىپ الدى. قورىتىندى ەسەپ – 3:5. وسىلايشا, «قايرات» ءتورتىنشى ورىندى قاناعات تۇتىپ, «تورتتىك فينالدان» تىس قالدى.
سونداي-اق «ۆ» توبىندا باق سىناعان رۋدنىيدىڭ «ايات» كلۋبى رەسەيدىڭ تيۋمەن قالاسىندا وتكەن ءۇش ويىندا دا جەڭىلىسكە ۇشىراپ, تۋرنير كەستەسىنىڭ سوڭعى ورنىندا قالىپ قويدى. ءبىرىنشى ويىندا جەرگىلىكتى «تيۋمەن» كلۋبىنان 0:3, پورتۋگاليانىڭ «سپورتينگىنەن» 2:5 جانە حورۆاتيانىڭ «نوۆو ۆريەمە» كلۋبىنان 2:3 ەسەبىمەن جەڭىلىپ قالدى.