قۇرلىقتىق حوككەي ليگاسىندا (قحل) سىنعا ءتۇسىپ جاتقان ەلوردانىڭ «بارىس» كلۋبى «بارىس ارەنادا» حاباروۆسكىنىڭ «امۋر» كومانداسىمەن كەزدەسىپ, قوسىمشا ۋاقىتتا ەسە جىبەردى.
بەس مىڭ جانكۇيەر تاماشالاعان ويىندى جەرلەستەرىمىز تاماشا باستادى. ءبىرىنشى كەزەڭنىڭ 14-مينۋتىندا اركادي شەستاكوۆ ويىنشىلار سانىنىڭ باسىمدىعىن پايدالانىپ, كومانداسىن ەسەپتە العا شىعاردى. ەكىنشى كەزەڭدى دە جوعارى دەڭگەيدە باستاعان «بارىس» ويىنشىلارى 35-مينۋتتا تابلوداعى ەسەپتى ەسەلەي ءتۇستى. شايبا اۆتورى – پاۆەل اكولزين.
ەكى شايبا ارتىقشىلىعىمەن الدا تۇرعان «بارىس» حوككەيشىلەرى تىم ەركىنسىپ كەتتى مە, ايتەۋىر ەكىنشى كەزەڭ سوڭىندا قاقپاسىنا گول وتكىزىپ الدى. توماش زوگورنانىڭ شايباسىنان كەيىن ەسەپ 2:1-گە قىسقاردى. ال ءۇشىنشى كەزەڭ باستالعان بەتتە «امۋر» ويىنشىسى وندرجەي ۆيتاسەك مەرگەندىگىمەن كوزگە ءتۇسىپ, ەسەپتى تەڭەستىرىپ كەتتى.
دەگەنمەن وۆەرتايمدا حاباروۆسكىدەن كەلگەن حوككەيشىلەردىڭ باعى جاندى. 64-مينۋتتا يگور رۋدەنكوۆ گول سوعىپ, كومانداسىنا جەڭىس سىيلادى. قورىتىندى ەسەپ – 2:3. «بارىس» كەلەسى ويىنىن بۇگىن ماگنيتوگورسكىدە جەرگىلىكتى «مەتاللۋرگ» كومانداسىنا قارسى وتكىزەدى.