«جان شۋاق» سىيلىعىنىڭ جەڭىمپازدارى ماراپاتتالدى

جەڭىمپازداردىڭ ءبىرىن ماراپات­تا­عان Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك ەلباسى تاپسىرماسىنا سايكەس قولعا الىنعان «كەدەرگىسىز كەلەشەك» جوباسى اياسىندا سوڭعى ءۇش جىلدا 20 مىڭنان استام الەۋمەتتىك ماڭىزى بار نىساننىڭ مۇمكىندىگى شەكتەۋلى جان­داردىڭ قاجەتتىلىكتەرىنە قاراي جاب­دىقتالعانى, زاڭدارعا 78 تۇزەتۋ ەنگىزىلىپ, قۇرىلىس تالاپتارى مەن ەرەجەلەرى قايتا قارالعانى تۋرالى ايتتى.

– بۇگىن وسى زالعا كۇش-جىگەرى مۇقال­ما­عان, ومىرگە قۇشتار جاندار جينالىپ وتىر. Nur Otan ەرەكشە قاجەتتىلىگى بار ازاماتتارعا قاشان دا قولداۋ ءبىلدىرىپ كەلەدى. وسى جىلدىڭ وزىندە پارتيامىزدىڭ قوعامدىق قابىلداۋ بولمەلەرىنە 2 مىڭنان استام ايرىقشا قاجەتتىلىگى بار ازامات وتىنىشپەن كەلدى. ءار ءتورتىنشى ماسەلە سول جەردە بىردەن شەشىمىن تاپتى. قازاقستان مۇگەدەكتەر كونفەدەراتسياسىنىڭ پرەزيدەنتى جانات وماربەكوۆا ءبىزدىڭ ماجىلىستەگى فراكتسيامىزدىڭ وكىلى. بۇگىندە وسىنداي ادامداردىڭ دەپۋتاتتىق قىزمەت اتقارۋى, وسى ساناتتاعى ازاماتتاردىڭ قۇقىقتارىن قورعايتىن ءتيىستى زاڭدار­دىڭ قابىلداناتىندىعىن جانە ولار­دىڭ ماسەلەلەرىنىڭ شەشىمىن تاباتىنىن كورسەتەدى. Nur Otan پارتياسى مۇنى جان-جاقتى قولدايدى. ونىڭ ۇس­تىنە, پارتيانىڭ 13 مىڭ مۇشەسى ەرەك­شە قاجەتتىلىگى بار ادام ەكەنىن ءبىز ۇنەمى قاپەرىمىزدە ۇستايمىز, – دەپ اتاپ ءوتتى باۋىرجان بايبەك.

قازاقستان مۇگەدەكتەر كونفەدەرا­تسيا­سىنىڭ پرەزيدەنتى جانات وماربە­كو­ۆانىڭ ايتۋىنشا, «جان شۋاق» سىيلىعى تاعايىندالعاننان بەرى, ەلى­مىزدىڭ تۇكپىر-تۇكپىرىنەن كەلگەن 60-تان استام قازاقستاندىق جەڭىمپاز اتاندى.

– تابىستى ادام – ول مول اقشا تاپ­قان ەمەس, كوپ يگى ىستەر جاساعان ادام. بۇل ءراسىمدى حالىقارالىق مۇگەدەكتەر كۇنى مەن وسى ماراپاتتىڭ باستاماشىسى يران وماربەكوۆتىڭ تۋ­عان كۇنى قارساڭىندا وتكىزۋ جاق­سى داستۇرگە اينالدى. Nur Otan پار­تيا­سىنىڭ اتىنان سايلانعان دەپۋ­تات رەتىندەگى زاڭشىعارۋشىلىق قىز­مەتىمىزدە ەلىمىزدىڭ مۇمكىندىگى شەك­تەۋلى جاندار ءۇشىن ەشقانداي كەدەرگىلەرى جوق, ينكليۋزيۆتى جانە دامىعان مەملەكەت بولۋى جولىندا جۇمىس ىستەيمىز. وسىلايشا, قوعام ەرەكشە قاجەتتىلىگى بار ادامداردى تەڭ دارەجەدە قابىلدايتىن بولادى, – دەدى ول.

سالتاناتتى شارا بارىسىندا «ەر­ەك­شە قاجەتتىلىگى بار ازاماتتارعا دەگەن قوعامدىق سانانىڭ وڭ وزگەرىسىنە قوسقان ۇلەسى ءۇشىن» جۇلدەسىنە جادى­را­سىن سادۋاقاسوۆ, «ەرىكتىلەر قوزعالىسىن دامى­تۋ­­دا­عى جەتىستىكتەرى ءۇشىن» اتالىمى بويىن­شا سىيلىققا قوستاناي قا­لا­سىنان كەلگەن يۋليا زاۆودچيكوۆا لايىق دەپ تانىلدى. «سپورت سالاسىنداعى جەتىستىگى ءۇشىن» اتالىمى بويىنشا جاسوس­پى­رىم­دەر اراسىندا توكيودا وتكەن ازيا پاراليمپيادا ويىندارىندا 4 مەدال جەڭىپ العان نۇر-سۇلتان قالاسىنىڭ تۇرعىنى سيازبەك داليەۆ ماراپاتتالدى. «مۇمكىندىگى شەكتەۋلى جانداردىڭ ماسە­لەلەرى مەن ءومىرىن جاريالاۋعا قوسقان ۇلەسى ءۇشىن» سىيلىعىنا ششۋ­چينسك قالاسىنان كەلگەن قانات باي­بۇروۆ يە بولدى.

«كاسىپكەرلىك قىزمەتتى دامىتۋعا قوسقان ۇلەسى ءۇشىن» دينا ەردىلدينوۆا ماراپاتتالدى. ونىڭ مۇگەدەكتەر ارباسىن جوندەيتىن ورتالىعى مەدي­تسي­نا­لىق جانە الەۋمەتتىك مەكەمەلەردە تەحنيكالىق قىزمەت كورسەتەدى.

«مۇمكىندىگى شەكتەۋلى جانداردى جۇمىسقا ورنالاستىرۋ ءۇشىن جاسالعان ۇزدىك جۇمىس ورنى ءۇشىن» سىيلىعىن ەربول نۇرقاتوۆ جەڭىپ الدى. «ونەر جانە مادەنيەت سالاسىنداعى جەتىس­تىكتەرى ءۇشىن» وسكەمەندىك ەكاتە­ري­نا فەدورەنكو ماراپاتتالدى.