وتكەن جەكسەنبىدە 9 ايعا سوزىلعان فۋتبولدان قازاقستان پرەمەر-ليگاسىنىڭ كەزەكتى ماۋسىمى اياقتالدى. 28-ءشى مارتە ۇيىمداستىرىلعان ەل بىرىنشىلىگىندە 12 كوماندا الا دوپتىڭ ارباۋىنا تۇسكەن جانكۇيەرلەرگە تارتىستى ويىن سىيلاپ, «قازاقستان چەمپيونى» دەگەن اتاققا تالاستى.
ادەتتەگىدەي, جىل باسىندا چەمپيوندىققا «استانا» مەن «قايراتتىڭ» تالاسارىنا ەشكىم كۇمان كەلتىرگەن جوق. سونداي-اق بىلتىرعى ماۋسىمنان كەيىن قۇرامىن بىرقاتار مىقتى فۋتبولشىلارمەن تولىقتىرعان «ورداباسى» مەن «توبىل» سياقتى كلۋبتار دا التىن جۇلدەدەن ءۇمىتتى ەكەنىن بايقاتتى. بىراق ماۋسىم سوڭىندا ءبىز اتاعان تورتتىك جۇرىستەرىنەن جاڭىلماي, تۋرنير كەستەسىندەگى العاشقى ءتورت ورىندى يەلەندى.
ءتىپتى قوستانايدىڭ «توبىل» كلۋبى ەكىنشى اينالىمدا ءبىراز ۋاقىت كوش باستاپ تۇردى. بىراق ەۋروكۋبوك ويىندارىنداعى ساتسىزدىكتەن كەيىن باس باپكەر ۆلاديمير گاززاەۆ وتستاۆكاعا كەتىپ, باسشىلىق كلۋب بيۋدجەتىن قىسقارتتى. سونداي-اق كوماندانىڭ بىرقاتار ويىنشىلارى جاراقات الىپ, جىل سوڭىنا دەيىن كلۋب السىرەي باستادى. التىن جۇلدەدەن ۇمىتتەنگەن «توبىل» ناتيجەسىندە ءتورتىنشى ورىن يەلەنىپ, ەۋروپا ليگاسىنىڭ جولداماسىنان تىس قالدى. قوستانايلىقتار كەم دەگەندە ءۇشىنشى ورىنعا لايىق بولاتىن. بىراق سوڭعى التى تۋردا ءبىر رەت جەڭىسكە جەتىپ, ەكى رەت تەڭ وينادى. قالعان ءۇش ويىندا جەڭىلىسكە ۇشىراپ, ءۇشىنشى ورىندى «ورداباسى» كومانداسىنا بەرىپ قويدى.
ال «ورداباسى» جىل باسىندا جانە سوڭىندا ءتاۋىر ويىن كورسەتىپ, قولا جۇلدەگە قول جەتكىزدى. شىمكەنتتىكتەر ماۋسىمنىڭ باسىنداعى بەس جانە سوڭعى بەس تۋردىڭ تورتەۋىندە جەڭىسكە جەتىپ, ءبىر ويىندا عانا تەڭ ءتۇستى. كەرەك كەزىندە قاجەتتى ۇپايعا قول جەتكىزگەن «ورداباسى» كەلەسى جىلى دا ەۋروكۋبوك ويىندارىندا باق سىنايتىن بولدى. اشىعىن ايتۋ كەرەك, بيىلعى ماۋسىمدا شىمكەنتتىكتەردى جواو پاۋلو ورگە سۇيرەدى. برازيليالىق فۋتبولشى كومانداعا كەلە سالىپ, كلۋبتىڭ كوشباسشىسى جانە سۇرمەرگەنى اتاندى. پرەمەر-ليگادا 31 ماتچ وتكىزىپ, 15 گول سوقتى. سونداي-اق 4 رەت كوماندالاستارىنا ناتيجەلى پاس شىعارعان.
ماۋسىم باسىندا «قايرات» بيىل چەمپيون اتانادى دەگەندەردىڭ قاتارى كوپ بولدى. ەل بىرىنشىلىگىنىڭ العاشقى اينالىمىندا الماتىلىقتار الا-قۇلا ونەر كورسەتكەنىمەن, ەكىنشى جانە ءۇشىنشى كەزەڭدە ەڭ ۇزدىك ويىن كورسەتتى. چەمپيونات اياقتالۋىنا 5 تۋر قالعانعا دەيىن تۋرنير كەستەسىندە كوش باستاپ تۇرعان بولاتىن. بىراق 30-تۋردا «استانادان» (1:3), 32-تۋردا «ەرتىس» كومانداسىنان 0:5 ەسەبىمەن جەڭىلىپ, بيىلعى چەمپيوندىقتى ءوز قولدارىمەن «استاناعا» ۇستاتتى. ەندى «قايرات» فۋتبولشىلارى مەن جانكۇيەرلەرى ادەتتەگىدەي وزدەرىن كەلەسى جىلى چەمپيون بولامىز دەپ سەندىرۋگە تىرىسادى. بالكىم, الماتىلىقتار كەلەسى جىلى «استانانى» توقتاتۋى دا مۇمكىن. ويتكەنى چەمپيوناتتىڭ سوڭعى تۋرىندا باس باپكەر الەكسەي شپيلەۆسكي ءباسپاسوز ءماسليحاتىندا كەلەسى جىلى جانكۇيەرلەردىڭ ءۇمىتىن اقتايتىنىن ايتتى. «ويىندارعا ساراپتاما جاساپ, ماۋسىمارالىق ءۇزىلىس كەزىندە تىڭعىلىقتى دايىندالىپ, كەلەسى ماۋسىمدى جاقسى وتكەرەمىز دەپ سەنەمىن. ارينە, كوماندانى كۇشەيتۋ كەرەك. ءبىزدىڭ ىڭعايىمىزعا ساي كەلەتىن ويىنشىلاردى ىزدەيمىز. ولار قازىرگى ويىنشىلارعا قاراعاندا الدەقايدا كۇشتى بولۋى ءتيىس. سوندا عانا باسەكەلەستىك ورنايدى», دەيدى ول.
«استانا» التىنشى جىل قاتارىنان چەمپيون اتانعان بولسا دا, بيىلعى ماۋسىمدا ولار ءوز دەڭگەيىندە ويىندى كورسەتە المادى. مىسالى, وسى جىلعى بىرىنشىلىكتە ەلوردالىقتار 33 تۋردىڭ 8 ويىنىندا قارسىلاستارىنا ەسە جىبەردى. ال بىلتىرعى ماۋسىمدا نەبارى 4 ويىندا جەڭىلگەن. دەگەنمەن, «استانالىقتار» التىننىڭ اۋىلى الىستاي باستاعاننان كەيىن ىسكە كىرىسىپ, قاجەتتى ۇپايىن جيناي باستادى. جالپى, يۋري لوگۆينەنكو كەيىنگى ەكى تۋردا كومانداسىنىڭ ماڭىزدى ەكى گولىن سوعىپ, التىنشى چەمپيوندىقتى اپەردى.
تۋرنير كەستەسىنە كوز تاستاساڭىز, ءۇشىنشى اينالىمدا 12 كوماندا ءتورت توپقا بولىنگەنىن بايقايسىز. مىسالى, «استانا», «قايرات», «ورداباسى» جانە «توبىل» جۇلدەلى ورىندارعا تالاسسا, «جەتىسۋ» كەستەدەگى 5-ورنىن ساقتاپ قالۋ ءۇشىن وينادى. «قايسار», «وقجەتپەس», «ەرتىس» جانە «شاحتەر» كوماندالارى قاۋىپتى ايماققا ءتۇسىپ قالماۋى ءۇشىن جانە مەيلىنشە جوعارى ورىندارعا تالپىندى. ال «تاراز», «اتىراۋ», «اقتوبە» كوماندالارى بارىنشا پرەمەر-ليگادا جان ساقتاپ قالۋ ءۇشىن بارىن سالدى. بىراق «اتىراۋ» مەن «اقتوبە» ءبارىبىر جوعارى ليگامەن قوش ايتىستى. ولاردىڭ ورنىن ءبىرىنشى ليگادا جەڭىمپاز اتانعان پەتروپاۆلدىڭ «قىزىلجارى» مەن اقتاۋدىڭ «كاسپي» كلۋبتارى باستى.
سونداي-اق ەل بىرىنشىلىگىندە 10-ورىنعا تۇراقتاعان «تاراز» ءبىرىنشى ليگادا ءۇشىنشى ورىن العان ورالدىڭ «اقجايىق» كلۋبىمەن كەلەسى جىلى پرەمەر-ليگادا ويناۋ ءۇشىن ءوزارا ماتچ وتكىزىپ, ەكى ويىننىڭ قورىتىندىسى بويىنشا «تاراز» كومانداسى جەڭىسكە جەتتى. وسىلايشا «تاراز» پرەمەر-ليگادا ءوز ورنىن ساقتاپ قالدى.
بيىلعى بىرىنشىلىكتىڭ بىرقاتار ستاتيستيكالىق مالىمەتتەرىن نازارلارىڭىزعا ۇسىنساق:
چەمپيوناتتاعى ەڭ كوپ گول بيىل سوعىلدى. كەيىنگى 5 جىلداعى چەمپيوناتپەن سالىستىرار بولساق, بيىل فۋتبولشىلار 513 گول سوققان ەكەن. 513 گولدى ءار تۋرعا بولەر بولساق, تۋر سايىن 15 گولدان سوعىلعان. سونداي-اق 10 اۆتوگول, ياعني فۋتبولشىلار ءوز قاقپاسىنا بايقاۋسىزدا گول سوعىپ العان.
بيىلعى بىرىنشىلىكتە 40 فۋتبولشى دۋبل ء(بىر ويىندا ەكى گول سوققان) اۆتورى اتانعان. سونداي-اق 4 فۋتبولشى ءبىر ويىندا ءۇش گول سوقسا (حەت-تريك), ءبىر فۋتبولشى ءبىر ويىندا ءتورت گول سالىپ, پوكەر جاسادى.
«تاراز» بەن «اتىراۋ» كوماندالارى چەمپيوناتتىڭ ەڭ ءتارتىپسىز كومانداسى اتاندى. جامبىل ءوڭىرىنىڭ فۋتبولشىلارى 33 تۋردا 8 قىزىل قاعاز السا, اتىراۋلىقتاردىڭ 7 ويىنشىسى ماتچتان قۋىلعان. جالپى, وسى جىلى بارلىق كوماندانىڭ ويىنشىسى قىزىل قاعازبەن جازالاندى.
«استانا» كومانداسى قارسىلاس قاقپاسىنا 67 گول سوعىپ, ەڭ ۇزدىك ناتيجەنى تىركەدى. ال «ورداباسى» كومانداسى ءوز قاقپاسىنا ەڭ از گول وتكىزگەن (24) كوماندا اتاندى.
بيىلعى ماۋسىمدا ادەرينسولا ەسەولا («قايرات») پەن مارين توماسوۆ («استانا») 19 گول سوعىپ, ۇزدىك سۇرمەرگەن اتاندى. سونداي-اق قازاقستاندىق فۋتبولشىلار اراسىنان ابات ايىمبەتوۆ («اقتوبە») 16 گولمەن ۇزدىك اتاندى.
جۋىردا قازاقستاننىڭ كاسىپقوي فۋتبول ليگاسىنىڭ رەسمي سايتىندا 2019 جىلعى ماۋسىمنىڭ قورىتىندىسى بويىنشا ەل بىرىنشىلىگىنىڭ شارتتى قۇراماسى جاريالاندى. بيىلعى دوپ دوداسىندا ءوز قاقپاسىنا 24 گول عانا وتكىزگەن دميتري نەپوگودوۆ («ورداباسى») ۇزدىك قاقپاشى اتاندى.
قورعاۋشىلار – گافۋرجان سۇيىمباەۆ («قايرات»), پابلو فونتانەللو («ورداباسى»), سەرگەي مالىي («ورداباسى») جانە ءىلياس امىرسەيىتوۆ («قايسار»). جارتىلاي قورعاۋشىلار – يۆان پەشيچ («شاحتەر»), باۋىرجان يسلامحان («قايرات»), تيگران بارسەگيان («قايسار») جانە مارين توماسوۆ («استانا»). شابۋىلشىلار – جواو پاۋلو («ورداباسى») مەن ادەرينسولا ەسەولا («قايرات»).
وسىمەن قازاقستاننىڭ كەزەكتى چەمپيوناتى اياقتالدى. بىراق ەلىمىزدە فۋتبول مەرەكەسى ءالى ءوز مارەسىنە جەتكەن جوق. ەۋروپا ليگاسىندا «استانا» توپتىق كەزەڭدەگى ەكى ويىنىن وتكىزەدى. 28 قاراشادا «استانا ارەنادا» اعىلشىننىڭ ايگىلى «مانچەستەر يۋنايتەد» كومانداسىن قابىلداسا, 12 جەلتوقساندا سىرت الاڭدا سەربيانىڭ «پارتيزان» كلۋبىمەن وينايدى.