مەگاپوليستىڭ سپورتتىق ومىرىندە الماتى مارافونىنىڭ مانىمەن قوسا, الەۋمەتتىك تۇرعىدا اتقارىپ كەلە جاتقان ىلكىمدى باستامالارى بار. داستۇرگە ساي الماتى مارافونىنا قاتىسۋشىلاردىڭ سورەلىك جارناسىنان جينالعان قاراجاتتىڭ ءبىر بولىگى قايىرىمدىلىق ىستەرگە جۇمسالادى. وسى ماقساتقا وراي, ء«بىرىنشى بولۋ – باتىلدىق» كورپوراتيۆتىك قورىمەن الداعى 2020 جىلعا ارنالعان قايىرىمدىلىق شارالارىنىڭ تىزبەگى انىقتالدى.
كەلەسى جىلى الماتى مارافونى ەرەكشە كۇتىمدى قاجەت ەتەتىن بالالارعا ارنالعان 5 مەكەمەگە قايىرىمدىلىق كومەك كورسەتەدى. ياعني, «كەڭەس» مۇگەدەكتەر قوعامدىق بىرلەستىگىنە الەۋمەتتىك بەيىمدەۋ جانە ەڭبەكپەن وڭالتۋ ورتالىعى مەن بالالارعا ارناپ جابدىقتالعان ويىن الاڭىن قۇرادى. ەسىك قالاسىنداعى اقىل-ەسى كەمىس بالالارعا ارنالعان وبلىستىق مەكتەپ-ينتەرناتقا فۋتبول الاڭىن, «SOS الماتى بالالار اۋىلى» مەملەكەتتىك ەمەس ءبىلىم بەرۋ مەكەمەسىنە جاتتىعۋ الاڭىن سالادى.
دامۋىندا ەرەكشەلىكتەرى بار بالالارمەن جۇمىس ىستەۋگە ارنالعان «اماليا» رەابيليتاتسيالىق ورتالىعىنا سەنسورلىق ينتەگراتسياعا ارنالعان جابدىق ساتىپ الادى. سونداي-اق تالعار قالاسىنداعى «نۇر» وتباسىلىق بالالار ۇيىنە سپورت الاڭىن سىيلايدى.
– قورىمىزدىڭ باستى ماقساتى – سپورتتى بارلىعىنا قولجەتىمدى ەتۋ. سوندىقتان جىل سايىن الماتى مارافونىنان كەيىن ءبىز ەرەكشە كۇتىمدى قاجەت ەتەتىن بالالارعا ارناپ سپورت ينفراقۇرىلىمىن سالامىز. الماتى مارافونى قۇرىلعالى بەرى 8 جىل ىشىندە جارىسقا قاتىساتىن جۇگىرۋشىلەردىڭ ارقاسىندا 17 قايىرىمدىلىق جوباسى جۇزەگە استى. 2019 جىلى ءۇش قايىرىمدىلىق ماقساتتى ورىنداۋ ءۇشىن 26 ميلليون تەڭگە ءبولىندى. 2020 جىلى بالالارعا ارنالعان مەكەمەگە 35 ميلليون تەڭگە كولەمىندە قايىرىمدىلىق كومەگىن كورسەتۋ جوسپارلانعان, – دەيدى ء«بىرىنشى بولۋ – باتىلدىق» كورپوراتيۆتىك قورىنىڭ اتقارۋشى ديرەكتورى سالتانات قازىباەۆا.
ەستەرىڭىزگە سالا كەتەيىك, «الماتى مارافونى-2020» 19 ساۋىردە وتەدى. وعان الەمنىڭ تۇكپىر-تۇكپىرىنەن 18 مىڭداي اۋەسقوي سپورتشى كەلەدى دەپ كۇتىلۋدە.