بۇگىن الماتى قالاسى اكىمدىگىنىڭ ءباسپاسوز ورتالىعىندا قالا كوشەلەرى مەن اۋلالارىن جارىقتاندىرۋ, مودەرنيزاتسيالاۋ مەن رەكونسترۋكتسيالاۋ, اۋلا ايماقتارىن كۇردەلى جوندەۋ, ارىق جۇيەلەرىنىڭ جاعدايى, پروبلەمالىق ۋچاسكەلەر مەن ولاردى رەتكە كەلتىرۋ تۋرالى بريفينگ ءوتتى.
الماتى قالاسىنىڭ جوسپارلاۋ مەن ۋربانيستيكا باسقارماسىنىڭ باسشىسى الماسحان احمەدجانوۆ قالانى دامىتۋ جونىندەگى پەرسپەكتيۆالى جوسپارلار تەك قالانىڭ ورتالىق كوشەلەرىن عانا ەمەس, سونىمەن قاتار, شەت ايماقتى دا قامتيتىنىن اتاپ ءوتتى. بولاشاق دامۋ بارىسىندا بىرقاتار سەبەپ بويىنشا كەنجەلەپ قالعان قالانىڭ بارلىق ۋچاسكەلەرىندە ءتيىستى ينفراقۇرىلىمدار پايدا بولادى.
قالالىق ەنەرگوتيىمدىلىك جانە ينفراقۇرىلىمدىق دامۋ باسقارماسىنىڭ باسشىسى اسەت ماساباەۆ الماتى وبلىسىنىڭ جەرلەرى قوسىلىپ, قالانىڭ ۇلعايۋى بارىسىندا بىرقاتار اۋداندا كوشە جارىقتارىنىڭ بولماۋى پروبلەما تۋعىزعانىن اتاپ ءوتتى. بۇل اۋدانداردا جارىقتاندىرۋدان وزگە سۋ جانە گاز قۇبىرلارىن تارتۋ قاجەت.
«بۇگىنگى كۇنى قالاداعى كوشەلەردىڭ جالپى سانى 2746, سونىڭ ىشىندە 1 500 كوشە تولىق جارىقتانعان, قالعاندارى جارتىلاي, ال 873 اۋلادا كوشە جارىعى مۇلدەم جوق. قازىرگى كەزدە مەملەكەتتىك ساتىپ الۋ اياسىندا وسى پروبلەمالاردى شەشۋ ءۇشىن كەلىسىمشارتتارعا قول قويۋ شارالارى جۇرۋدە. كەلەر جىلدىڭ اياعىنا دەيىن قالاعا قوسىلعان اۋدانداردىڭ كوشەلەرى تولىق جارىقتانادى. سونىمەن قاتار قالانىڭ بىرقاتار كوشەسىندەگى ەسكى شامدار جارىق جينايتىن جاڭالارىمەن اۋىستىرىلۋدا», — دەپ حابارلادى اسەت ماساباەۆ.
قالالىق جاسىل ەكونوميكا باسقارماسىنىڭ باسشىسى ەرجان سەيتەنوۆ الماتىدا 1200 كيلومەتردەن استام ارىق بارىن, ولاردىڭ 1102,3 كم ارىق جۇيەسىنە اۋدان اكىمدىكتەرى قىزمەت كورسەتەتىنىن ايتتى. قالعاندارى اۋلالار اۋماقتارىندا نەمەسە يەسىز.
قالادا سوڭعى 3 جىل ىشىندە 302,5 كم ارىق سالىندى جانە جوندەلدى, وسىنىڭ ارقاسىندا كەيبىر اۋماقتاردى سۋ باسىپ قالۋ ءۇش ەسە ازايدى.
2019 جىلى اۋداندار اكىمدىكتەرى 28,5 كم ارىق جۇيەسىن اعىمداعى جوندەۋدەن (اۋداندارعا بولگەندە: الاتاۋ — 4,4 كم, المالى — 1 كم, اۋەزوۆ — 4 كم, بوستاندىق — 3,5 كم, جەتىسۋ — 3,8 كم, مەدەۋ — 3,3 كم, ناۋرىزباي — 3,2 كم جانە تۇركسىب — 5,3 كم) وتكىزدى.
سونىمەن قاتار باسقارما باسشىسى قۇنى 554 ملن تەڭگە بولاتىن 376,26 كم ارىق جۇيەسىن سالۋ مەن رەكونسترۋكتسيالاۋدىڭ جوبالىق-سمەتالىق قۇجاتىن ازىرلەۋگە جانە بۇرىننان بار ارىق جۇيەلەرىنە ينۆەنتاريزاتسيالاۋعا, ونىڭ ىشىندە قالاعا قوسىلعان ەلدى مەكەندەردەگى ارىق جۇيەلەرىنە كۇردەلى جانە اعىمداعى جوندەۋ جۇمىستارىن جۇرگىزۋگە, جاڭا ارىق جۇيەلەرى مەن جاۋىن كارىزدەرىن سالۋعا كونكۋرس جاريالانعانىن حابارلادى.
«ينۆەنتاريزاتسيالاۋدان سوڭ بىرىڭعاي ارىق جۇيەسى مەن جاۋىن كارىزىن سالۋ بويىنشا كەشەندى شارالار قابىلداۋ جوسپارلانعان, ال بۇل جاۋىن سۋلارىنىڭ قالا اۋماعىنان, اسىرەسە, قالاعا قوسىلعان ەلدى مەكەندەردەن تولىق سىرتقا اعۋىنا مۇمكىندىك بەرەدى», — دەپ اتاپ ءوتتى ەرجان سەيتەنوۆ.
الماتى